Mei he Fakapoʻulí ki he Māmá

ʻIkai fakahā e hingoá

Te tau lava ʻo ʻilo pau ʻi he taimi ʻoku pōpōʻuli ai ʻetau moʻuí, ʻe lava ke liliu ia ʻe Sīsū Kalaisi mei he fakapoʻulí ki he māmá ʻo ka tau ka fakatomala moʻoni.

Ne ʻi ai ha taimi ʻi heʻeku moʻuí naʻá ku ongoʻi ai ʻo hangē kuo ʻikai ha toe ʻamanaki te u toe fiefia pe ke toe foki ki heʻetau Tamai ʻi Hēvaní. Naʻe fakamavahe au ʻi he ngaahi taʻu kuo hilí mei he Siasí. Naʻá ku moʻui hīkisia mo angahalaʻia peá u moʻui mamahi koeʻuhí ko ʻeku ngaahi angafaí. Naʻe ʻikai ola lelei ʻeku fakamaʻu mo e fefine naʻá ku ʻofa aí, uesia mo hoku vā fetuʻutaki mo e niʻihi kehé, pea naʻe ʻikai ke u fiefia.

Neongo naʻá ku fakaʻamu ne u fili ke loto-fakatōkilalo kimuʻa ai, ka naʻe fakamālohiʻi au ke u loto-fakatōkilalo mo feinga ke fai e finangalo ʻo e ʻEikí. Naʻe kamata ke u toutou lau lahi ange ʻa e folofolá, lotu tuʻo lahi ange, mo feinga ke tokoni ki he niʻihi kehé. Naʻá ku feinga ke fakaleleiʻi ʻa e ngaahi vā fetuʻutaki naʻá ku fakaliʻeliʻaki fuoloá, kau ai mo hoku vā fetuʻutaki mo e Tamai Hēvaní. Naʻá ku fakaʻānaua moʻoni ki ha liliu ʻo e lotó.

Naʻe kei pongipongia ʻi ha ʻaho ʻe taha, ʻi heʻeku fononga meʻalele atu ki he akó, pea naʻe teʻeki ke hopo ʻa e laʻaá. Naʻe maamangia ʻa e tafaʻaki langi fakahahaké, kae fakapoʻuli ʻa e tafaʻaki langi fakahihifó, pea tāitō hifo ai e māhina kātoá. Naʻá ku fakatupulaki ha faʻahinga ʻulungaanga ke u fefolofolai ai mo ʻeku Tamai Hēvaní lolotonga ʻeku fakaʻulí. Pea ʻi heʻeku lotu lolotonga ʻeku fononga ko ʻeni he kaá, naʻe fakamāmaʻi hoku ʻatamaí, pea ʻi ai ha ʻamanaki foʻou ki hoku lotó.

Naʻá ku fakatokangaʻi kuo maamangia ʻeku moʻuí pea fakautuutu ʻene maamangiá, ʻo tatau mo e tafaʻaki langi fakahahaké. Naʻe mahuʻi atu ʻa e fakapoʻulí, pea mo ʻeku ngaahi angahalá, ʻa ia naʻe lahi tatau mo e māhina kātoá, naʻe fakaʻau ke hōloa. Naʻe teʻeki ai ke nau mole kotoa, ka naʻá ku ʻiloʻi ʻe vave pē haʻanau mole kapau ʻe hoko atu ʻeku fakatomala fakamātoató. Naʻá ku fakaʻamu pehē ange mai ʻe ʻi ai ha ʻaho ʻe maamangia ai ʻeku moʻuí hangē ko e hoʻatā mālié.

ʻI he fakalau ʻa e taimí mo ʻeku lotua ha ʻofa mei heʻeku Tamai Hēvaní mo e niʻihi kehé, naʻe fakaʻau ke u toe loto fakatōkilalo ange. Naʻe taki au ʻe he fakatupulaki ʻo e loto fakatōkilaló ke u tauhi ki he ʻOtuá mo ha niʻihi kehe ʻi ha tuʻunga taʻe-siokita lahi ange, pea naʻe fakafoʻou mo toe fakalahi ʻeku ʻamanaki ki he moʻui taʻengatá mo ha kahaʻu lelei ange. ʻI he tupulaki ʻa e ʻamanaki lelei ko iá, naʻe pehē ai pē mo ʻeku tui ki hoku Fakamoʻui ko Sīsū Kalaisí, ʻoku māfimafi ke Ne fakamoʻui mo fakamaʻa au mei he taʻe-māʻoniʻoni kotoa pē. ʻOku ou ʻilo ʻoku moʻoni e lea ʻa Molomoná: “Te mou maʻu ʻa e ʻamanaki leleí ʻi he Fakalelei ʻa Kalaisí pea mo e mālohi ʻo ʻene toetuʻú, ke fokotuʻu hake ki he moʻui taʻengatá” (Molonai 7:41).

Fiefia tuʻunga he Fakatomalá

“[ʻOku mahino ʻapē kiate kitautolu e [vēkeveke] ʻetau Tamai Hēvaní ʻi heʻetau feinga kotoa pē ke toe foki kiate Iá? Naʻa mo ʻetau kei fuʻu mamaʻó, ʻokú ne talitali lelei ʻetau foki angé. ʻOku tau aʻusia ha fiefia ʻi hono fakapapauʻi mai ʻe he ʻofa ʻa hotau Fakamoʻuí ʻe lava pē ke tau maʻa, pea te tau toe foki ki ʻapi ʻi ha ʻaho. ʻOku toki maʻu pē ʻa e fiefia ko ʻení ʻi he fakatomalá.]

“[Ko e taimi ʻoku tau tuku ai ki mui ʻa e faihalá kae ngāue ʻaki ʻa e tui kia Sīsū Kalaisí, ʻoku tau maʻu ha fakamolemole ʻo ʻetau ngaahi angahalá. ʻOku tau ongoʻi ʻoku fai ʻe hotau Fakamoʻuí maʻatautolu ʻa e meʻa he ʻikai ke tau lava ʻo fai ʻiate kitautolu peé.]”

ʻEletā Neil L. Andersen ʻo e Kōlomu ʻo e Kau ʻAposetolo ʻe Toko Hongofulu Mā Uá, “The Joy of Becoming Clean,” Ensign, Apr. 1995, 51.

Ko e Hā ʻa e Ngaahi Tuʻunga ʻo e Fakatomalá?

Naʻe akoʻi ʻe he palōfita ko Hilamaní ʻoku ʻi ai ha ngaahi tuʻunga ʻo e fakatomalá:

“Kuo pau ke hāʻele mai ʻa e ʻEikí ke huhuʻi ʻa hono kakaí, ka …ʻe ʻikai te ne hāʻele mai ke huhuʻi ʻa kinautolu ʻi heʻenau ngaahi angahalá, kae huhuʻi ʻa kinautolu mei heʻenau ngaahi angahalá.

“Pea kuo tuku kiate ia ʻa e mālohi ʻe he Tamaí ke huhuʻi ʻa kinautolu mei heʻenau ngaahi angahalá koeʻuhí ko e fakatomalá; ko ia kuó ne fekau mai ʻene kau ʻāngeló ke fakahā ʻa e ngaahi ongoongo ʻo e ngaahi tuʻunga ʻo e fakatomalá, ʻa ia ʻokú ne ʻomi kiate kinautolu ʻa e mālohi ʻo e Huhuʻí, ke fakamoʻui ʻa honau laumālié” (Hilamani 5:10–11; ko e toki tānaki atu hono fakamamafaʻí).

Fakakaukau ke ako e ngaahi potufolofola ko ʻení ke mahino lelei ange ha niʻihi ʻo e ngaahi tuʻunga ko iá: Loma 3:23; 1 Nīfai 10:21; 2 Nīfai 2:8; Mōsaia 4:9–10; Tokāteline mo e Ngaahi Fuakava 58:42–43.