Tauhi ʻo e ʻAho Sāpaté

Ko e Sāpaté ia ki ha kakai tokolahi, ko ha toe ʻaho pē ʻi he fakaʻosinga ʻo e uiké ke fai ai ha toe mālōlō mo ha fakafiefia. Neongo ia, kuo ʻosi akoʻi ʻe he fakahā ʻi he kuonga muʻá mo onopooni hono mahuʻinga ke tauhi ʻa e ʻaho Sāpaté ke māʻoniʻoní. ʻI he peesi 56–57 ʻo e makasini ko ʻení, ʻoku fakamatalaʻi ai ʻe Leli M. Kipisoni ko e tokoni ʻuluaki ʻi he kau palesitenisī lahi ʻo e Kau Talavoú, ʻa e fatongia mahuʻinga ʻo e tauhi ʻo e ʻaho Sāpaté. ʻOku pehē ʻe Misa Kipisoni, “Ko e anga ʻo ʻetau tauhi ʻa e ʻaho Sāpaté ke māʻoniʻoní ko e fakafōtunga atu ia ki tuʻa ʻo ʻetau fuakava ke manatuʻi maʻu ai pē ʻa Sīsū Kalaisí.”

ʻI he ako ko ia hoʻomou fānaú ke tauhi ʻa e ʻaho Sāpaté ke māʻoniʻoní, te nau mateuteu ai ke maʻu ha ngaahi tāpuaki lahi. Hangē ko e lea ʻa Misa Kipisoní, “Kapau te tau muimui mo moʻui ʻaki e tuʻutuʻuni fakalangi ke tauhi ʻa e ʻaho Sāpaté ke māʻoniʻoní, ʻe hanga ʻe he ʻEikí ʻo tāpuakiʻi kitautolu, tataki kitautolu, pea mo fakahinohinoʻi fakalaumālie kitautolu ʻi hono fakaleleiʻi e ngaahi palopalema ʻoku tau fehangahangai mo iá.”

Ngaahi Fokotuʻu ki hono Akoʻi ʻo e Toʻu Tupú

Lau e fakamatala ʻa Misa Kipisoni ʻi he peesi 56–57. Hili ia pea aleaʻi e meʻa ʻe lava ke fai ʻe homou fāmilí he uike takitaha ke teuteu ai ke tauhi ʻa e ʻaho Sāpaté ke māʻoniʻoní. Te mou lava ʻi he efiafi fakafāmili ʻi ʻapí ke hivaʻi ʻa e “Ke Tau Ngāue Mālohí” (Ngaahi Himi, fika 76) pe ko ha himi kehe fekauʻaki mo e Sāpaté pea aleaʻi e meʻa ʻe lava ke fai ʻe homou fāmilí ke tauhi ai ʻa e ʻaho Sāpaté ke māʻoniʻoní.
Fakakaukau ke mou lau mo hoʻomou fānau toʻu tupú ʻa e konga ki hono tauhi ʻo e ʻaho Sāpaté ʻi he Ki Hono Fakamālohia ʻo e Toʻu Tupú, kau ai mo e ngaahi potufolofola ʻoku lisi ʻi he ngataʻangá. Te mou lava ʻo kumi fakataha ha ngaahi potufolofola kehe fekauʻaki mo hono tauhi ʻo e ʻaho Sāpaté ke māʻoniʻoní pea aleaʻi ʻa e ngaahi tefitoʻi moʻoni fekauʻaki mo e tauhi ʻo e ʻaho Sāpaté.
Mahalo te mou fie mamata ʻi ha ngaahi vitiō fekauʻaki mo ia mo lau fakataha mo hoʻomou toʻu tupú ha ngaahi fakamatala. ʻAlu ki he youth.lds.org ʻo lomiʻi ʻi he “Ki Hono Fakamālohia ʻo e Toʻu Tupú.” Pea lomiʻi ʻi he konga ki he tauhi ʻo e ʻaho Sāpaté, pea te mou maʻu ai ha ngaahi vitiō fekauʻaki pea mo ha ngaahi fakamatala ʻi he tafaʻaki toʻomataʻú mo e konga ki lalo ʻo e pēsí.

Ngaahi Fokotuʻu ki hono Akoʻi ʻo e Fānaú

Lau ʻa e “Tīkoni Foʻou ʻAupito” ʻi he Liahona ʻo ʻOkatopa 2013, pea aleaʻi hono mahuʻinga ʻo e sākalamēnití ʻi he tauhi ʻo e ʻaho Sāpaté ke māʻoniʻoní.
Fakakaukau ke mou lau ʻa e “Ko ha Lēsoni ʻi he Loto ʻApasiá” ʻi he Liahona ʻo Māʻasi 2010; mahalo te mou fie fakahoko ʻa e ʻekitivitī ʻoku ʻoatu fakataha mo e fakamatalá. Aleaʻi mo hoʻomou fānaú e founga ʻoku tokoni ai ʻa e ʻapasia ʻi he lotú ki hono tauhi ʻo e ʻaho Sāpaté ke māʻoniʻoní.
Aleaʻi e meʻa ʻe lava ke fai ʻe homou fāmilí he ʻaho Sāpaté ke fakaʻapaʻapaʻi ai e ʻEikí. Mahalo te mou fie lau ʻa e “Fakapapauʻi he Taimi Ní” mei he Liahona ʻo Māʻasi 2012 ke maʻu ha sīpinga ʻo ha taha ʻokú ne tauhi ʻa e ʻaho Sāpaté ke māʻoniʻoni ʻi ha tūkunga faingataʻa.
Te mou lava ʻo hivaʻi mo hoʻomou fānaú ha ngaahi hiva fekauʻaki mo e Sāpaté, kau ai ʻa e “ʻAho Tokonakí” (Tohi Hiva ʻa e Fānaú, 105). Talanoa ki ha meʻa ʻe lava ai ʻe homou fāmilí ʻo fakaʻaongaʻi ʻa e ʻaho Tokonakí mo ha ngaahi ʻaho kehe ʻo e uiké ke teuteu ki he Sāpaté.

Tā fakatātaaʻi ʻe Taia Morley