Ko Hai ʻOku Fie Lotu?

Sēilolo M., Filipaini

Naʻá ku akoʻi mo hoku hoá ha fāmili ne ʻi ai ha longaʻi fānau lolotonga ʻeku ngāue fakafaifekaú. Naʻá ma lotu mo aleaʻi he lolotonga ha taha ʻo homa taimi palaní, ʻa e lēsoni ʻoku totonu ke ma akoʻi ki he fānaú, peá ma lototaha ke akoʻi ʻa e lotú.

Ko e taimi naʻá ma ō mai ai ki honau falé, naʻe mātuʻaki fiefia ʻa e kui-fefiné mo e longaʻi fānaú. Naʻá ma kamata ʻaki e lēsoní ha lotu. Naʻe fakalongolongo ʻa e fānaú mo mateuteu ke fanongo. Naʻá ma fakamatalaʻi ange ʻa e founga mo e ʻuhinga ke lotu aí. Ofi ki he ngataʻanga ʻo e lēsoní, ne ma fehuʻi ange, “Ko hai ʻokú ne fie fai e lotu tukú?” Naʻa nau fie lotu kotoa! Ko ia naʻá ma fokotuʻu leva ha taimi-tēpile ke nau fakahoko ai e lotú ʻi he taimi kotoa pē ne ma ō ange ai ke fai ha lēsoni. Naʻá ma toe fakaafeʻi foki kinautolu ke nau lotu ʻi he taimi naʻe ʻikai ke ma ʻi ai aí.

Naʻá ku fakakaukau ʻi he ʻosi ʻa e lēsoní, “Ko e hā ʻoku faingofua ai ke lotu ʻa e fānau īkí kae faingataʻa ke lotu ʻema kau fiefanongo matuʻotuʻa angé?” Naʻá ku maʻu ha tali ʻi he Bible Dictionary: “[Ko e taimi pē ʻoku mahino kiate kitautolu ʻa ʻetau vā fetuʻutaki totonu pea mo e ʻOtuá (ʻa ia, Ko ʻetau Tamaí ʻa e ʻOtuá, pea ko kitautolú ko ʻEne fānau), ʻi he taimi pē ko iá ʻoku fakanatula leva ʻa e lotú mo mahino ʻetau tafaʻakí (Mātiu 7:7–11). Ko e lahi ʻo e ngaahi meʻa ʻoku ui ʻoku faingataʻa fekauʻaki mo e lotú ʻoku tupu ia mei he ngalo ʻo e vā fetuʻutaki ko ʻení” (vakai foki, Ko e Fakahinohino ki he Ngaahi Folofolá, “Lotú,” scriptures.lds.org).

Talu mei ai, mo ʻeku feinga ke tokoni ke mahino ki he kakaí ʻenau vā fetuʻutaki totonu mo ʻetau Tamai Hēvaní. ʻOku fie folofola ʻetau Tamai Hēvaní ki Heʻene fānaú, ʻo tatau pē mo e fie talanoa ʻetau mātuʻa ʻi māmaní kiate kitautolú. ʻOkú Ne ʻofa ʻiate kitautolu, ʻoku fie folofola mai kiate kitautolu, pea ʻoku finangalo ke tau fakataufolofola ange kiate Ia.