Ko e Hūʻanga ʻo e Ikuná
“Hono ʻikai ke maʻongoʻonga ʻa e palani ʻa hotau ʻOtuá” (2 Nīfai 9:13).
Naʻá ku ʻalu mo hoku husepānití he lolotonga ʻo e faʻahitaʻu failaú ki he tauʻakapulu homa kiʻi mokopuna tangata taʻu faá. Naʻe ongo fiefia ʻa e meʻa kotoa ʻi he felēleaki ʻa e fānaú ʻo tuli ʻa e foʻi pulú. Naʻe ʻikai ke ʻilo ʻe he kau vaʻingá ia ʻi he ifiʻi fakaʻosi ʻo e meʻaifí pe ko hai naʻe mālohí pe foʻí. Ko e meʻa pē ne nau faí ko e vaʻinga.
Naʻe kole ʻa e ongo faiako ʻakapulú ki he kau vaʻingá ke nau lulululu mo e timi ʻe tahá. Peá ma fakatokangaʻi leva ha meʻa mātuʻaki mālie. Naʻe ui heʻenau faiakó ke nau faʻu ha hūʻanga ʻo e ikuná.
Naʻe tuʻu ʻa e mātuʻá, ngaahi kuí, mo ha taha pē naʻe haʻu ki he vaʻingá ʻi ha laine ʻe ua ʻo fehāngaaki. Pea hiki leva honau nimá ʻo faʻu ha foʻi ʻaleso. Naʻe kikī ʻa e fānaú ʻi heʻenau lele mai ʻi lalo he ngaahi nima ʻo e kakai lalahi ne nau hiki tueé, pea hoko atu ai.
Naʻe ʻikai fuoloa kuo fakakaukau ʻa e fānau mei he timi ʻe tahá ke nau kau mai he meʻa mālié ni. Naʻe fakaʻaiʻai ʻa e taha vaʻinga kotoa pē ʻe he kakai lalahí ʻi heʻenau lele ʻo hū mai he hūʻanga ʻo e ikuná.
Ka ʻi heʻeku fakakaukaú, naʻá ku sio ki ha ʻīmisi ʻe taha. Naʻá ku ongoʻi ko ʻeku mamata ʻeni ki hono moʻui ʻaki ʻe he fānaú ʻa e palani ʻa e Tamai Hēvaní naʻe fokotuʻu maʻá e fānaú takitaha. Naʻa nau lele ʻi he hala lausiʻi mo fāsiʻí, ʻi lalo he nima ʻo e kakai naʻe ʻofa ʻiate kinautolú. Naʻe ongoʻi ʻe he fānaú takitaha ʻa e fiefia ʻo ʻenau ʻi he halá.
Kuo ʻosi “[fakaʻilongaʻi mo taki ʻa e halá]” ʻe Sīsū Kalaisi maʻatautolu takitaha.1 Kapau te tau muimui ki Heʻene tatakí, te tau foki kotoa ki hotau ʻapi fakalangí ʻo malu ʻi he toʻukupu ʻo e Tamai Hēvaní.
Faitā ʻa e Busath Photography; tā fakatātaaʻi ʻe Katie McDee