Pōpoaki ʻa e Faiako ʻAʻahí

Ko e Misiona Fakalangi ʻo Sīsū Kalaisí: Ko e Faʻifaʻitakiʻanga

Ako ʻi he faʻa lotu ʻa e fakamatala ko ʻení mo feinga ke ke ʻilo e meʻa ke vahevahé. ʻE fakatupulaki fēfē ʻe he mahino ʻo e moʻui mo e misiona ʻo e Fakamoʻuí hoʻo tui kiate Iá mo tāpuekina ai kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.

Tuí, Fāmilí, Fakafiemālié

Ko e konga ʻeni ʻo ha ngaahi pōpoaki ʻa e Faiako ʻAʻahí ʻoku fakatefito ʻi he konga ʻo e misiona ʻo e Fakamoʻuí.

ʻI he mahino kiate kitautolu ko Sīsū Kalaisi hotau faʻifaʻitakiʻanga ʻi he meʻa kotoa peé, ʻe lava leva ke fakatupulaki ʻetau holi ke muimui ʻiate Iá. ʻOku fonu ʻa e folofolá ʻi he ngaahi fakalotolahi ke tau molomolomuivaʻe ʻia Kalaisi. Naʻe folofola ʻa Kalaisi ki he kakai Nīfaí “He ko e ngaahi ngāue ʻa ia kuo mou mamata kuó u faí, ke mou fai foki ia” (3 Nīfai 27:21). Naʻe folofola ʻa Sīsū kia Tōmasi, “Ko au ko e hala, mo e moʻoni, pea mo e moʻui: ʻoku ʻikai haʻu ha tangata ʻe taha ki he Tamaí, kae ʻiate au” (Sione 14:6).

ʻOku fakamanatu mai ʻe hotau kau takí he ʻahó ni ke tau fokotuʻu ʻa e Fakamoʻuí ko hotau faʻifaʻitakiʻanga. Naʻe pehē ʻe Linitā K. Pētoni, ko e palesiteni lahi ʻo e Fineʻofá, “ʻI he taimi kuo tohi ai ʻi hotau lotó takitaha ʻa e tokāteline ʻo e Fakaleleí, ʻe toki kamata leva ke tau hoko ko e faʻahinga kakai ʻoku finangalo e ʻEikí ke tau hoko ki aí.”¹

Naʻe pehē ʻe Palesiteni Tōmasi S. Monisoni, “Ko hotau ʻEiki mo e Fakamoʻui ko Sīsū Kalaisí, ko hotau Faʻifaʻitakiʻanga mo hotau mālohi.”²

Tau tukupā muʻa ke tau ʻunu ʻo ofi kia Sīsū Kalaisi, ke talangofua ki Heʻene ngaahi fekaú, pea mo feinga ke toe foki ki heʻetau Tamai Hēvaní.

Mei he Folofolá

2 Nīfai 31:16; ʻAlamā 17:11; 3 Nīfai 27:27; Molonai 7:48

Mei Hotau Hisitōliá

Naʻe tohi ʻe ʻIlaisa R. Sinou, ko e palesiteni lahi hono ua ʻo e Fineʻofá, fekauʻaki mo e ngāue ʻi he moʻui fakamatelie ʻa Sīsū Kalaisí, “[Naʻá Ne fakaʻilongaʻi ʻa e halá mo taki e fonongá]”.³ Naʻá Ne tokoni ki he niʻihi fakafoʻituituí—fakatāutaha. Naʻá Ne akoʻi ʻoku totonu ke tau tuku ʻa e toko hivangofulu mā hivá kae fakahaofi ʻa e taha kuo heé (vakai, Luke 15:3–7). Naʻá Ne fakamoʻui mo akoʻi ʻa e fakafoʻituituí, pea aʻu ʻo tuku ha taimi ki he tokotaha takitaha ʻi ha kakai tokolahi ʻe 2,500 (vakai, 3 Nīfai 11:13–15; 17:25).

Naʻe pehē ʻe Palesiteni Tietā F. ʻUkitofa ʻo e Kau Palesitenisī ʻUluakí, fekauʻaki mo e Kau Fefine ʻo e Ngaahi ʻAho Kimui Ní: “ʻOku hanga ʻe he kau fafine lelei ko kimoutolú, ʻo fai e tokoni ʻofa ʻi ha ngaahi ʻuhinga ʻoku mahulu hake ia hoʻomou lelei fakafoʻituituí. ʻOku mou faʻifaʻitaki ai he foungá ni ki he Fakamoʻuí. … Naʻe tukutaha maʻu pē ʻEne tokangá [ki] hono tokoniʻi ʻo e niʻihi kehé.”⁴

Maʻuʻanga Fakamatalá

1. Linda K. Burton, “Kuo Tohi Koā ʻi Hotau Lotó ʻa e Tui ki he Fakalelei ʻa Sīsū Kalaisí?” Liahona, Nōvema 2012, 114.

2. Thomas S. Monson, “Meeting Life’s Challenges,” Ensign, Nov. 1993, 71.

3. “Naʻe Lahi Fau ʻa e ʻOfa,” Ngaahi Himi, fika 105.

4. Dieter F. Uchtdorf, “Fiefiá, Ko ho Tukufakaholo,” Liahona, Nōvema 2008, 117– 120.

Ko e Hā Te u Lava ʻo Faí?

1. Ko e hā e ʻuhinga mo e founga ʻoku hoko ai ʻa Sīsū Kalaisi ko hoku faʻifaʻitakiʻangá?

2. ʻOku tokoni fēfē ʻeku tokoniʻi e kau fafine ʻoku ou ʻaʻahi ki aí ke u muimui ʻi he Fakamoʻuí?

KO E TOETUʻÚ, tā ʻe Harry anderson