Mwakoron ni Kauoua Kakabwaia

Iroun Brittany Beattie

Ana Maekatin te Ekaretia

Kakawaran te tembora ao rongorongon te utu a bon uaia ni kakawaki, ngkana a ikotaki, a uoti kakabwaia aika raka.

Ngkana ko tara te rongorongo rinanon te Riaona ibukin te namwakaina aei, tarai rinanin taian kara ake a botaki ni karaoi tamnei, korobanna, ke aron bairean karaoan te bwai teuana bwa e aonga ni kakaongora ao ni katika te nano. Angin taian kara a kona n riki man karaoaki ibukina bwa taian buraimwari kara aika uoua—uraura, babobo, ke te buruu—a kona n ikotaki ao ni kaotinakoa te kara ae boou, teuana are e aki kona n riki ngkana a kamaenakoaki taian buraimwari kara.

Rongorongon te Utu ao te mwakuri n te tembora a tibwaua naba aron tein kaara aikanne: ao ikanne are ko kona ni karekei riki kakabwaia man ikotakin mwakuri aika uoua aika kakawaki aikai. Anne ibukina bwa rongorongon te utu ma te mwakuri n te tembora bon mwakoro raoi aika uoua man te mwakuri ae teuana—te mwakuri ni kamaiu. E koaua ko na teimatoa ni karekei kakabwaia man buokakia tabeman ma rongorongon aia utu ao nanakom n te tembora ni karaoa te mwakuri ibukia aomata ake a katauraoaki araia ikekei. Ma ko na karekei riki kakabwaia aika korakora—ao ni kukurei ni bwaninin rinanin nako kaara—ngkana ko ikoti mwakoro aika uoua ao ni kunei oin araia am utu ao i mwina ni karaoa te mwakuri ibukia am bakatibu inanon te tembora.

N aron are e a tia n taku Unimwaane Richard G. Scott man te Koram n Abotoro n te Tengaun ma Uoman:

“Te tembora ao te mwakuri ibukin rongorongon te utu bon teuana te mwakuri ae kamaenakoaki inanon uoua te mwakoro. …

“Te Tama are i karawa e tangirira n tatabemanira nako bwa ti na karekei mwakoron kakabwaia aika uoua ibukin te mwakuri ae koro kakawakina aei. E a tia n kairia tabeman bwa a na kaotia nakoira bwa ti na kanga n tau iai. E bon nakoim ao nakoiu karekean kakabwaia akanne.

“Te mwakuri are ko karaoia n te tembora e materaoi kabanean te tai iai, ma karekean otenanti aika kakawaki ibukin temanna oin am bakatibu e na karika te tai ae tabu inanon te tembora, ao kakabwaia naba aika korakora a na karekeaki.”¹

Ngaia are, baikara tabeua mai buakon “kakabwaia aika korakora” ake a na roko ngkana ti karekei “mwakoron uoua kakabwaia”? N iteran te rongorongo are man te angatai aei bon berita aika mwaiti mairouia Abotoro ni boong aikai.

Kaitiakan, te Namakin n Tamnei

“Mwakuri n rongorongon te utu mairouia kaain te Ekaretia bon te namakin ae itiaki, ao n anainano n te maiu n tamnei i aoia naake a kabaeaki inanona. A matata bwa a kabaeia aia utu ni kabane. … Ngkana ti ukoukori oin ara bakatibu iai nanora riki nakon taian ara. … Nanora a rairaki nakoia ara karo—ti ukeuke ni kakaeia ao n ataiia ao ni beku ibukia.”²

Mwakoron te Mwakuri ae Korakora

“Te reitaki n te tamnei … a bon karaoaki. … Ngkana nanora a rairaki nakoia ara bakatibu, iai te bwai ae bitaki inanora. Ti namakinna mwakoron te bwai teuana ae korakora riki nakoira.”³

Te Katantan ni kaitara te Kariiri

“Ngaira n tatabemanira nako ti kakabwaiaki mairouia aomata akana a maiu mai i mwaira. N reiakinam man karaki akanne a buokira bwa ti na ota raoi bwa antai ngaira ao ti roko mai ia … Ko karaoa am kakae (n rongorongon n am utu) ao ni buokia tabeman aomata ma aia kakae? Anne ibukin te aomata ae te kairake bwa e na rinanon te aonaaba ae buakaka aei are ti maeka inanona n te bong aei bwa bon teuana mai buakon te katantan ae korakora ni kaitara ana kariiri te tia kakaitara.”⁴

Buoka man te Aonaaba n Tamnei

“Tao ngkana ti karaoa ara mwakuri n tei ibukia naake n te aonaaba n tamnei ake a ingainga ni kan ukoukoraki ao n tataro ibukin te mwakuri are ti kona ni karaoi ibukia, te aonaaba n tamnei ni kabooan mwin anne e na anganira buokara n te bong aei inanon kainnanora ae katawe. A mwaiti riki ake n aonaaba ake tabeua ake a mena ikai. E mwaiti riki te mwaaka ao te korakora ikekei nakon are ti karekea ikai i aon te aonaaba.”⁵

Tera Ae Ko na Karaoia?

Tera ae ko na karaoia ni “karekean kakabwaia akanne” ni kakaei aara ao n uoti rake nakon te tembora? Karaoa am baire n te bong aei n uoti berita ni karekei mwakoron kakabwaia aika uoua inanon maium.

Bwaai aika a na taraki

1. Richard G. Scott, “The Joy of Redeeming the Dead,” Liahona, Nobembwa 2012, 93–94.

2. Boyd K. Packer, “Your Family History: Getting Started,” Liahona, Aokati 2003, 17.

3. Russell M. Nelson, “Generations Linked in Love,” Liahona, Meei 2010, 92.

4. David A. Bednar, “The Time Is Now,” lds.org/youth/family-history/leaders.

5. John A. Widtsoe, in Conference Report, Eberi 1943, 39.

I Kunea te Ara

“Ni katauraoia kairake ibukin mwanangaia nakon te tembora, ara uoote a na botira bwa ti na karaoa te waaki ni kakukurei ibukin te Iwawaki ni kakaei araia utu ake ti kona ni uoti. I tekateka irarikia raoraou ao ni ngurengure bwa akea te ara ae I kona ni kakaea are e kainnanoaki ibukin karaoan taian otenanti. I mwin te kakae i aonafamilysearch.org, I a kunea te ara. I bon rangin kukurei!

“I kawaekoai ni biri nakon ara tia kairiiri ibukin rongorongon te utu ao ni bubutia bwa tera te mwaneka are i mwina. E kaotia nakoiu bwa N na kanga ni kawakina te ara (ngaia anne, te ara are n te rekooti) ao ni kaotinakoa bwa I aonga ni karaoa te mwakuri n te tembora. E taku naba bwa te aine aio bon te aomata raoi ao tiaki ti te ara are i aon te tikuriin. I namakina te Tamnei ao n ataa te aomata anne bwa e a kaman tataninga ni karaoan te mwakuri ibukina ao ibukiu bwa N na kunea. I a kona n uota arana nakon te tembora. I rangin kakaitau ibukin au tai ni beku ibukia au bakatibu ao ni buokiia n uotiia nakon kimwareirein te euangkerio.”

Leah G., New York, USA

Tera Ngkana I Aki Rin n te Intanete?

E ngae ngke araia am utu ake ko kunei rinanon am kakaei a kainnanoa karinakia aonraain bwa e aonga ni karaoaki te mwakuri n te tembora ibukia, ko aki kainnanoa rinim n te Intanete ni mwengam. Ikoikoti aara, rongorongo, ao karakinaia am utu mairouia am koraki aika maiu, ao ngkanne taraia ngkana iai te tienta ibukin rongorongon te utu i abam ike ko kona n kanakoi iai aarafamilysearch.org. N aono ake e karako iai te toma ma te intanete, taetae nakoia taan kairiiri ibukin rongorongon te utu n te uote ke titeiki n taekan bwai n ibuobuoki ake iai irouia ibukin karekean waare ake a karinaki n te kombiuta ibukim.

E Nanonaki Bwa I Aki Riai n Nakon te Tembora Ngkana Akea Irou Araia Au Utu?

Tiaki, te reirei n te beeba ni kaongora aei e aki nanona anne. Kakawaran te tembora e uoti kakabwaia aika bati ibukim ao ibukia ake a bwabetitoaki ao ni kamatoaki ibukia, ngkana am bakatibu ke tiaki. Ko riai ni kateimatoa nanakom n te tembora e ngae ngke akea araia am utu. E taku te Moan Beretitentii: “Kaain te Ekaretia aika karako aia konabwai ni karaoi kakae i aon rongorongon aia utu a kaungaki bwa a na karaoi otenanti ibukin araia tabeman ake a katauraoaki irouia tabeman kaain te aro ke man te tembora” (Ana Moa n Reta te Moan Beretitentii, Okitobwa 8, 2012).

Te Kakao man te Moan Beretitentii

“Ngkana a kunei araia aia bakatibu kaain te Ekaretia ao n uoti aara akanne nakon te tembora ibukin mwakurian otenanti, te taneiai inanon te tembora e kona n rangin tamaroa riki. … Ti kaungaia riki kairake n ti ngaiia … ni mwakuri araia aia utu inanon te tembora ke araia aia bakatibu kaain te uote ke kaain te titeiki.”

Ana reta te Moan Beretitentii, Okitobwa 8, 2012.

Kamatata n te korotamnei iroun Welden C. Andersen ao Steve Tregeagle; tamnein John A. Widtsoe iroun R. E. Bird

• Bwanaia Kairake