O Lo’u Tino o se Malumalu
A tatou tausia o tatou tino i le ala ua poloaiina ai e le Atua, o le a faamanuiaina i tatou! (Tagai Mosaea 2:41; MF&F 89:18–21.)
Aisea ua maua ai o tatou tino?
Ae tatou te le’i fananau mai, sa avea i tatou ma ni agaga e aunoa ma ni tino faaletino. Sa i ai le tele o mea e le mafai ona tatou faia sei vagana ua i ai so tatou tino. Na auina mai e le Atua i tatou i le lalolagi ina ia maua ni tino. Tatou te manaomia uma se agaga ma se tino ina ia avea faapei o le Tama Faalelagi. (Tagai MF&F 88:15.)
O le a se mea maoae e uiga i le i ai o se tino?
O tatou tino e taua tele ma paia lea ua ta’ua ai e le Alii o malumalu (tagai 1 Korinito 3:16–17). Ma o le i ai o se tino e malie foi! O tino e mafai ona tamomoe, pepese, fepe’ei, toe, tusi ata, aau, sisiva, ma faia isi gaoioiga malie. E faapea foi, e mafai ona tatou faaaogaina o tatou tino e aoao, fesoasoani i tagata, foafoaina ni aiga, ma faia le lalolagi o se nofoaga e sili atu ona lelei.
Aisea e le foliga tutusa ai tagata uma?
O tino e o mai i siepi, o lanu, ma ituaiga lapopoa e tele, ma o le vaega lenei o le fuafuaga a le Tama Faalelagi. E ui e eseese tino taitasi, o i tatou uma ua foafoaina i le faatusa o le Atua (tagai Kenese 1:26). O lona uiga o o tatou tino ua mamanuina e pei o Lona tino atoatoa. E matagofie uma tino taitasi talu ai o tagata taitoatasi o se meaalofa mai lo tatou Tama Faalelagi alofa.
Ae faapefea pe afai o loo i ai ni mea ou te le fiafia ai i lo’u tino?
O nisi taimi o o tatou tino e le foliga, minoi, pe galue i le ala tatou te mananao ai. E tusa lava po o le a le tulaga o i ai nei o tatou tino, e mafai ona tatou filifili ia loto faafetai mo na tino ma faaaoga e fai ai mea lelei iinei i le lalolagi. Ae e i ai se aso, o le a tatou toetutu ai taitoatasi ma maua se tino e atoatoa (tagai Alema 40:23). E alofa le Atua ia i tatou e tusa lava pe faapei o tatou tino, ma e mafai ona tatou alolofa ia i tatou lava.
E faapefea ona ou tausia lo’u tino?
E tatau ona tatou tausia o tatou tino i le ala o le a tatou tausia ai soo se oa e le mafaatauina—i le alofa ma le faaaloalo. E ala i perofeta ma le Upu o le Poto, ua tau mai e le Tama Faalelagi ia i tatou mea e leaga mo o tatou tino ma mea e lelei. E tele lava mea e mafai ona tatou faia e tausia ai o tatou tino:
-
Ai meaai maloloina ma faamalositino.
-
Ia laei tauagafau ma tausia o tatou tino ia mama.
-
Faaaloalo i tino o isi tagata.
-
Aua nei faailogaina o tatou tino i pe’a po o le tatuiiina.
-
Aua le faaaogaina fualaau faasaina, ava malosi, tapaa, kofe, po o le lauti.
-
Taaalo i taaloga e saogalemu ma fiafia ma aloese mai gaoioiga e matautia.
Pe a tatou tausia o tatou tino, e sili atu ona mafai ona tatou lagonaina le Agaga Paia.