Taulai Atu Lau Vaai i le Matafaga

Saunia e Richard M. Romney

Mekasini a le Ekalesia

Sa aoao mai e lo’u atalii ia te au se lesona mamana po o fea e taulai atu i ai le vaai ma le auala e tumau ai.

O se malaga i le paopao i se motu i se paka lata ane o le atunuu na foliga mai o le avanoa silisili lea e latalata atili atu ai i lo’u atalii. O taitai o le Perisitua Arona ma alii talavou i la matou uarota sa fuafuaina le malaga mo ni masina, ma sa mafai ona ou faatasi atu ma i latou.

O lo’u atalii o Makei sa i ai i se tulaga maoae, e auai i taaloga e tolu i le aoga maualuga. Atonu o le tasi lea o mafuaaga na tuu ai i maua i le paopao lava lea e tasi sa latou iloaina o le a ia alo malosi pe a manaomia. Sa i ai si ou malamalama i le taialaina o se paopao, o lea na foliga mai ai o i maua o se au lelei.

Sa ou naunau foi ia maua le taimi i luga o le vaituloto e talanoa ai. Sa mafatia tele Makei talu mai le maliu o lona tina, ma sa le masani ona mafai ona ou tali atu i le auala sili i ona manaoga ma mea e fiafia i ai.

Sa ma aooga faamasani, sa i ai o ma ofu faaola, sa ma iloa aau, ma sa i ai ni o ma taitai talenia e taialaina i maua.

O le mea sa ma le faitauina o le matagi. Sa ma aloalo mo ni nai maila, ona sopo faalava atu lea i le ogatotonu o le vaituloto ma ua latalata atu i le matafaga ae faafuasei loa ona osofaia i maua e se matagi e maoae lava le malosi o agai mai ia i maua.

Sa mafai e isi paopao ona taunuu i le matafaga, ae o maua ma Makei sa i ai i le vaa mulimuli. Sa faateteleina galu, ma sa ma se ese mai le ala, a o ma alo ma alo, ma taumafai ia agai i luma. Sa amata ona ou lē lavā ma faapopoleina. Sa ou matuai alo i totonu o le vai ma tosoina i lo’u malosi atoa, ma taumafai e toe faafoi i maua i le ala, ae sa foliga mai o loo ma tumau pea i le tulaga lava e tasi.

Sa lamatia i maua i le ono sa’e o le paopao ina ua iu lava ina ou taliaina leotele ou te le iloa pe o i ai sou malosi e faaauau ai. Ona fai mai lea o lou atalii, “o loo e tilotilo i galu, Tama. O le a e le taunuu i se mea i le faia o lena mea. E tatau lava ona taulai atu lau vaai i le matafaga. O e vaai atu i lena laau i le mauga? O la ta sini lena. Taulai atu i ai, ma o le a ta mafaia.”

Na sa’o lava o ia. O le taimi lava na ou taulai atu ai i le laau, sa mafai ona ou tumau i le ala. Sa lagonaina e o’u lima le malosi faafouina. Na valaau e Makei le televave mo le alo—“Toso. Malolo Toso. Malolo Ma le mausali, na ma see atu i luma.

Na ma taunuu i le matafaga, na aapa mai isi e fesoasoani, ae na ma saofafai ma tau manavanava. O lena po i lo ma faleie na ma talanoa, o le tama ma le atalii, e uiga i lo ma aafiaga.

Na ma manatuaina faatasi, mea na aoao mai e Peresitene Thomas S. Monson i le moli o le ava a le Alii: “E emoemo mai lava i taimi o afa o le olaga. E valavalaau mai lava, ‘O le auala lenei i le saogalemu; o le auala lenei i le fale.’”¹

I lena aoauli, sa avea se laau i luga o le matafaga ma a ma moli o le ava. Ina ua ou latalata i le faavauvau, na fautua mai lo’u atalii ma le atamai e aua le vaai atu i galu, ae taulai atu lau vaai i le matafaga. Ma sa ma toso faatasi, i le sili atu ma le tasi le auala.