Ofoina Atu e Taitai le Faamafanafanaga, Lagolago i Filipaina

Ia Fepuari, i le mavae ai o le 100 aso talu ona faataumaoia e le Afa o Haiyan ia Tacloban, o Sister Linda K. Burton, o le peresitene aoao o le Aualofa, ma Sister Carol F. McConkie, fesoasoani muamua i le au peresitene aoao o Tamaitai Talavou, na malaga atu i le eria na pagatia e ofo atu le lagolagosua ma le faamafanafanaga.

“Sa ou iloaina e tatau ona ou opo mai uso,” o le tala lea a Sister Burton. “Sa ou iloaina e le tele ni mea e mafai ona ou faia, ae sa ou iloaina e manaomia lou alu i Tacloban ma opoina ia tagata na mafai ona ou opoina.”

Na faatamaia e le afa o Haiyan le sili atu ma le 1.1 miliona o fale i Filipaina tutotonu, ma tuua ai le sili atu ma le 6,100 tagata ua maliliu, e aofia ai tagata o le Au Paia o Aso e Gata Ai e 42. I le mavae ai o le afa, na auina atu e le Ekalesia ni sapalai mo toomaga ma sa faia se tulaga faapaaga ma faalapotopotoga i le lotoifale ma faavaomalo e fesoasoani ai i meaai, fale, faamamaina o le vai, aveesea o le otaota, ma le toe faatulagaina o galuega.

Na lipotia uma mai e Sister Burton ma Sister McConkie e faapea na la mauaina le faamoemoe ma le mautinoa i totonu o le Au Paia, o e ua toefausia o latou aiga ma faamalolosia a latou molimau e ala i le auauna atu i le tasi ma le isi.