Faaatoatoaina ia Keriso
O le malamalama i le alofa togiola mauafua na tuuina mai e le Faaola e mafai ona faasaolotoina ai i tatou mai avega faaletagata, faamoemoega sese ma le le tonu o le uiga sa’o o le atoatoa.
Light of the World,[Malamalama o le Lalolagi], saunia e Howard Lyon, e le mafai ona kopiina
Tatou te usuina faatasi ma a tatou fanau, “Le alofa o lou Faaola, siomia ai au i mea uma.”1
O lona alofa togiola, na tuuina fua mai, e pei “o le susu ma le meli, e aunoa ma se tupe ma aunoa ma se tau” (2 Nifae 26:25). E lē gata ma faavavau (tagai Alema 34:10), e valaaulia i tatou e le Togiola e “o mai ia Keriso, ma faaatoatoaina ia te ia” (Moronae 10:32).
O le malamalama i le alofa togiola mauafua na tuuina mai e le Faaola e mafai ona faasaolotoina ai i tatou mai avega faaletagata, faamoemoega sese ma le le tonu o le uiga sa’o o le atoatoa. O lea ituaiga malamalama e mafai ai ona tatou faagalo lagona fefe faapea tatou te le atoatoa—fefe faapea tatou te faia mea sese, fefe faapea tatou te toilalo pe a faatusatusa i isi, fefe faapea e le o lava lo tatou agavaa mo Lona alofa.
O le alofa togiola mauafua na tuuina mai e le Faaola e fesoasoani ia i tatou ina ia sili atu ona loto faamagalo ae faaitiitia le faamasinoina o isi ma i tatou lava. O lenei alofa e faamalolo ai a tatou sootaga ma tatou maua ai avanoa e alolofa, malamalama, ma auauna atu ai e pei ona faia e lo tatou Faaola.
O Lona alofa togiola e suia ai lo tatou manatu faavae o le atoatoa. E mafai ona tuu atu lo tatou faatuatuaga ia te Ia, tausia ma le filiga Ana poloaiga, ma faaauau pea i le faatuatua (tagai Mosaea 4:6)—e tusa lava po o tatou lagonaina foi le lotomaualalo sili atu, agaga faafetai, ma le faalagolago i Ana galuega, alofa mutimutivale, ma le alofa tunoa (tagai 2 Nifae 2:8).
I se tulaga lautele, o le o mai ia Keriso ma faaatoatoaina ia te Ia ua avea ai le atoatoa o se vaega o le malaga e faavavau o lo tatou agaga ma le tino—i le tulaga silisili, o le malaga e faavavau a lo tatou tagata (tagai MF&F 88). O le faaatoatoaina o se taunuuga mai la tatou malaga i le olaga faaletino, oti, ma le toetu, pe a toefuataiina mea uma “i o latou autino e tatau ai ma le atoatoa” (Alema 40:23). E aofia ai le faagasologa o le fanau faaleagaga, lea e aumaia ai “se liuga tele” i o tatou loto ma manao (Mosaea 5:2). E atagia ai lo tatou faamamaina i le olaga atoa e ala i auaunaga faaKeriso ma le usiusitai i poloaiga a le Faaola ma a tatou feagaiga. Ma e iloa ai le faaatoatoaina o le sootaga i le va o e soifua ma e ua maliliu (tagai MF&F 128:18).
O le upu atoatoa, ae peitai, o nisi taimi e sese ai faapea o le uiga o le le faia lava o se mea sese. Atonu o oe po o se tasi e te iloa o loo taumafai malosi ina ia atoatoa i lenei auala. Ona o lena atoatoa e masani lava e foliga mai e le mafai ona ausia, e oo lava ia tatou taumafaiga e sili ona lelei e mafai ona maua ai i tatou i le popole, lotovaivai, po o le le lavā. Tatou te taumafai ma le le faamanuiaina e pulea o tatou tulaga ma tagata o siomiaina i tatou. Tatou te popole i vaivaiga ma mea sese. O le mea moni, o le tele lava o lo tatou taumafai, o le mamao foi lea o lo tatou lagonaina o le tulaga atoatoa o tatou sailia.
I mea nei, ou te saili e faateleina lo tatou agaga faafetai mo le aoaoga faavae a le Togiola a Iesu Keriso ma le agalelei ma le alofa mutimutivale ua foai fua mai e le Faaola ia i tatou. Ou te valaaulia oe e faaaoga lou malamalama i le aoaoga faavae o le Togiola e fesoasoani ai ia te oe lava ma isi, e aofia ai faifeautalai, tamaiti aoga, talavou nofofua matutua, tama, tina, ulu o aiga nofofua, ma isi o e atonu o loo pagatia i le sailia o le atoatoa po o le taumafai ia atoatoa.
O Le Togiola a Iesu Keriso
Na saunia talu le faavaeina o le lalolagi (tagai Mosaea 4:6–7), o le Togiola a lo tatou Faaola ua mafai ai ona tatou aoao, salamo, ma tuputupu ae i o tatou lava aafiaga ma filifiliga.
I lenei olaga faataitai, o le tuputupu ae faaleagaga i lea “fasifuaitau ma lea fasifuaitau” (MF&F 98:12) faapea ma le “liuga tele” o le loto (Alema 5:12, 13; Mosaea 5:2) ua fesoasoani aafiaga faaleagaga ia i tatou ia o mai ia Keriso ma faaatoatoaina ia te Ia. O le faaupuga masani “tumau seia oo i le iuga” ua faamanatu mai ai ia i tatou o le tuputupu ae faavavau e masani lava ona aofia ai le taimi ma le faagasologa.
I le mataupu faaiu o le Tusi a Mamona, ua aoaoina i tatou e le perofeta maoae o Moronae i le auala e o mai ai ma faaatoatoaina ia Keriso. Tatou te “faafiti [i tatou] lava mai i mea e le faaleatua uma.” Tatou te “alolofa i le Atua ma o tatou manatu atoa, mafaufau, ma le malosi atoa.” Ona lava lea o Lona alofa tunoa mo i tatou, “ona o lona alofa tunoa e mafai ai ona tatou atoatoa ia Keriso.” Afai tatou te “le faafitia” le mana o le Atua, e mafai ona tatou “faapaiaina lea o [tatou] ia Keriso i le alofa tunoa o le Atua,” lea “ua i ai i le feagaiga a le Tamā mo le faamagaloina o a [tatou] agasala,” ina ia mafai ona tatou maua le “paia, ua aunoa ma se ila” (Moronae 10:32, 33).
I le iuga, o le “taulaga tele ma mulimuli” a le Faaola e aumaia ai le “alofa mutimutivale, ua faumalo i le faamasinoga tonu, ma aumai ai ala i tagata e mafai ai ona latou maua o le faatuatua e salamo ai” (Alema 34:14, 15). E moni lava, o lo tatou “faatuatua e salamo ai” e taua mo i tatou e o mai ai ia Keriso, ia faaatoatoaina ia te Ia, ma olioli i faamanuiaga o le “fuafuaga tele ma faavavau o le togiolaina” (Alema 34:16).
O le taliaina atoatoa o le Togiola a lo tatou Faaola e mafai ona faateleina ai lo tatou faatuatua ma tuuina mai ai ia i tatou le lototele e tuu ese ai faamoemoega e saisaitia ai i tatou lea tatou te manaomia i se isi itu ina ia avea ai po o le faia o mea ia atoatoa. O le mafaufau uliuli-ma-paepae e fai mai o mea uma a le o le atoatoa a’ia’i po o le matuai sese lava e aunoa ma se faamoemoe. Ae e mafai ona tatou talia ma le agaga faafetai, i le avea ai ma atalii ma afafine o le Atua, o i tatou o le palealii o Ana galuega (tagai Salamo 8:3–6; Eperu 2:7), e ui lava o i tatou o se galuega o loo faagasolo pea.
A tatou malamalama i le alofa togiola na tuuina fua mai e lo tatou Faaola, e muta lo tatou fefefe faapea o Ia o se faamasino saua, ma saili masei. Na i loo lena, tatou te mautinoaina, “E lei auina mai e le Atua lona Atalii i le lalolagi ina ia faasala i le lalolagi; a ia faaolaina le lalolagi ia te ia” (Ioane 3:16–17). Ma ua tatou malamalama o le taimi ma le faagasologa e manaomia mo le tuputupu ae (tagai Mose 7:21).
O La Tatou Faataitaiga Atoatoa
Ua na o lo tatou Faaola lava sa soifua i se olaga atoatoa, ma e oo lava ia te Ia sa aoao ma tuputupu ae i le olaga faaletino. E moni lava, “Ma sa lei maua e Ia le atoatoaga i le amataga, ae sa alualu pea mai lea alofa tunoa i lea alofa tunoa, seia oo ina maua e ia le atoatoaga” (MF&F 93:13).
Sa ia aoaoina e ala i le olaga faaletino e “ave i ona luga o [tatou] vaivaiga … ina ia mafai ona ia silafia e tusa ai ma la le tino, le ala efesoasoani ai i ona tagata” (Alema 7:12). Na te lei gauai atu lava i faaosoosoga, agasala, po o faaosoosoga i aso taitasi, ae na Ia alu ifo i lalo o tofotofoga ma luitau uma o le olaga (tagai MF&F 122:8).
I le Lauga i luga o le Mauga, na poloaiina ai i tatou e le Faaola: “O lenei ia atoatoa ona lelei la outou amio” (Mataio 5:48). O le upu Eleni mo le atoatoa e mafai ona faaliliuina o le “atoa, maea, atiina ae atoatoa” (i le Mataio 5:48, vaefaamatalaga e). Ua poloaiina i tatou e lo tatou Faaola ina ia tatou atoa, maea, atiina ae atoatoa—ina ia atoatoa i amioga mama ma uiga faaalia ua faataitaia e Ia ma lo tatou Tama oi le Lagi.2
Sei o tatou vaai pe faapefea e le faaaogaina o le aoaoga faavae o le Togiola ona fesoasoani ia i latou o e lagonaina latou te manaomia le mauaina o le faaatoatoaina po o le avea ma tagata atoatoa.
Fiaatoatoa
O se malamalama sese i le uiga o le ia atoatoa e mafai ona iu i le fiaatoatoa—o se uiga faaalia po o se amioga e avea ai se manao matagofie ina ia lelei ma faaliliuina i se faamoemoega le talafeagai ina ia atoatoa nei. O le fiaatoatoa o nisi taimi e oo mai i le lagona faapea ua na o i latou e atoatoa e tatau i ai le alofaina po o le faapea tatou te le agavaa mo le fiafia seiloga ua tatou atoatoa.
O le fiaatoatoa e mafai ona mafua ai le le moe, popole, faatuai, o le lotovaivai, faamasinoga faaletagata, ma le faanoanoa. O nei lagona e mafai ona tuleia ese le filemu, olioli, ma le faamautinoaga lea e finagalo lo tatou Faaola ia tatou maua.
O faifeautalai ia e mananao ia atoatoa nei e ono avea ma tagata atuatuvale pe lotovaivai pe afai o le aoaoina o la latou gagana i le misiona, o le vaaia o tagata ua papatisoina, po o le mauaina o ni tofiga faaletaitai o le misiona e le vave ona tulai mai. Mo tagata talavou malolosi ua masani i le faamanuiaina, o se misiona atonu o le luitau maoae muamua lea o le olaga. Ae e mafai e faifeautalai ona matuai usiusitai e aunoa ma le atoatoa. E mafai ona latou fuaina lo latou faamanuiaina muamua lava e ala ia latou tautinoga e fesoasoani atu i tagata taitoatasi ma aiga ia “avea ma ni tagata faamaoni o le Ekalesia e olioli i le mafutaga o le Agaga Paia.”3
O tamaiti aoga e amata i se tausaga fou o le aoga, aemaise lava i latou e tuua le fale mo le kolisi, e feagai ma le fiailoa ma popolega. O tagata atamamai aoaoina, tagata taaalo, tusiata, ma isi foi e o mai mai le avea ma se “i’a tele i se vaituloto laitiiti” i le lagona e pei o se tamai ia i se vasa sou ma le peau aave e le masani ai, ma e lei mafaufauina. E faigofie lava mo tamaiti aoga e i ai faanaunauga fiaatoatoa le lagonaina faapea, e tusa lava pe o le a lo latou taumafai malosi, ua latou toilalo pe afai latou te le muamua i mea uma.
I le mafaufau i manaoga o le olaga, e mafai ona aoao tamaiti aoga faapea o nisi taimi e matuai lelei atoatoa lava le faia o mea uma latou te mafaia, ma e le mafai lava i taimi uma ona avea ma tagata silisili.
Tatou te tuuina atu foi faamoemoega o le atoatoa i o tatou lava aiga. E mafai ona lagonaina e le tama po o le tina le uunaia ia avea ma se toalua, matua, tausiaiga, tagata faigaluega, po o se vaega o se aiga atoatoa o le Au Paia o Aso e Gata Ai—i le taimi nei.
O le a le mea e fesoasoani ia i latou o e tauivi ma faanaunauga o le fiaatoatoa? Amata ni talanoaga, tuuina atu i ai ni fesili lagolagosua ma tali faamaoni e lagonaina ai le taliaina ma le alofa. Latou te valaaulia isi e taulai atu i le lelei. Latou te faatagaina i tatou e faauigaina o le a se mea tatou te lagona o le a lelei. O aiga ma uo e mafai ona aloese mai faatusatusaga faatauva ae ofoina atu le faamalosiauga faamaoni.
O le isi itu o le matuia o le fiaatoatoa o le tuuina lea o isi i o tatou tulaga faatonuina le talafeagai, faamasinosino, po o le le faamagaloina. O na ituaiga o amioga atonu, o le mea moni, e teena pe faatapulaa ai faamanuiaga o le Togiola a le Faaola i o tatou olaga ma olaga o isi. Mo se faataitaiga, atonu e fai e talavou nofofua matutua se lisi o uiga auau mama i se toalua e mananao i ai ma lē mafai ai ona faaipoipo ona o faamoemoega lē talafeagai mo le soa atoatoa.
O lea la, atonu e le manao se tuafafine e mafaufau e tafafao faamasani i se alii ona e le atoatoa i lana fua o le fiaatoatoa—e le lelei sana siva, e le o fuafua e avea ma se tagata mauoa, e lei auauna atu faamisiona, pe ua tautino mai se faafitauli ua tuanai i ponokalafi ae ua uma ona foia e ala i le salamo ma fautuaga.
E faapena foi, i se alii po o se uso e ono lē mafaufauina le tafafao faamasani ma se tuafafine lelei, agavaa e le fetaui ma lana faatulagaga le talafeagai—e le fiafia o ia i taaloga, se peresitene o le Aualofa, se masiofo lalelei faapaleina i se tauvaga, se tagata poto faapitoa i le paketiina o tupe, pe sa ia tautino mai i se vaivaiga ua tuanai, ua foia nei i le Upu o le Poto.
O le mea moni, e tatau ona tatou mafaufau i uiga tatou te manaomia mo i tatou lava ma i se toalua faaolioli. E tatau ona tatou faatumauina lo tatou faamoemoega sili ona maualuga ma tulaga faatonuina. Ae afai tatou te lotomaualalo, o le a faateia i tatou e ala i le agalelei i nofoaga e le’i faamoemoeina, ma e mafai ona tatou fatuina ni avanoa e latalata atu ai i se tasi e pei o i tatou, e le atoatoa.
Ua faailoa mai e le faatuatua, e ala i le salamo ma le mana o le Togiola, e mafai ona faamalosia se vaivaiga ma faamagaloina moni lava ni agasala ua salamoina.
O faaipoipoga fiafia e le o le taunuuga o ni tagata atoatoa e toalua e osia ni feagaiga. Nai lo o lena, o le tuuto ma le alofa e faatupulaia e ni tagata le atoatoa se toalua ao la fausia, faamanuiaina, fesoasoani, ma faamagalo i le aluga o le olaga. Sa fesiligia i se tasi taimi le ava a se perofeta o ona po nei pe faapei le faaipoipo i se perofeta. Sa ia tali mai ma le atamai e lei faaipoipo o ia i se perofeta; ua na ona faaipoipo atu o ia i se alii e tuuto atoatoa i le Ekalesia e tusa lava po o le a le valaauga na te mauaina.4 I se isi faaupuga, i le aluga o le taimi, o tane ma ava e tutupu faatasi—taitoatasi ma avea o se ulugalii.
O le faatali mo se toalua atoatoa, atoatoa le a’oga, atoatoa le galuega, po o se fale atoatoa o le a umi ma tuua toatasi. Tatou te popoto pe a mulimuli i le Agaga i faaiuga taua o le olaga ma lē faatagaina masalosaloga e fatuina e manaoga fiaatoatoa e faalavefau i lo tatou alualu i luma.
Mo i latou o e e mafai ona lagona faasoloatoa le mamafatu po o le popole, ia fesili ia te oe lava ia ma le faamaoni, “Pe ou te faauigaina le atoatoa ma le manuia e ala i aoaoga faavae o le alofa togiola a le Faaola po o tulaga faatonuina a le lalolagi? Pe ou te fuaina manuia po o le toilalo e ala i le Agaga Paia e faamauina o’u manaoga amiotonu po o ni tulaga faatonuina o le lalolagi?”
Mo i latou o e lagonaina le vaivai faaletino, pe faalelagona, ia amata ona faia se moe ma se malologa masani lelei, ma ia faaavanoa se taimi e ai ai ma malolo. Ia iloaina o le pisi tele e le tutusa ma le agavaa, ma o le agavaa e le manaomia ai le atoatoa.5
Mo i latou e mafai ona vaai i o latou lava vaivaiga po o faaletonu, faatauaina ma le agaga faafetai mea ua lelei ona outou faia, po o le a lava le tele pe itiiti.
Mo i latou o e fefefe i le toilalo ma e faatuutuu, o nisi taimi e ala i le ova saunia, ia mautinoa ma lototele e le manaomia fua ona aloese mai gaoioiga faigata e mafai ona aumai ai le tuputupu ae tele!
Pe a manaomia ma talafeagai, saili atu i fautuaga faaleagaga po o se fautuaga faafomai atamai e fesoasoani ia te oe e maua ai le toafilemu, atiina ae ni auala lelei e mafaufau ai ma faatulagaina ai lou olaga, faaitiitia amioga faatoilalo tagata, ma ia maua ma ia sili atu le faailoaina atu o le agaga faafetai.6
O le le onosai e faatuai ai le faatuatua. O le faatuatua ma le onosai o le a fesoasoani i faifeautalai e malamalama ai i se gagana po o aganuu fou, i tamaiti aoga e malamalama ai i ni mataupu fou, ma talavou nofofua matutua e amata ai le fausiaina o fegalegaleaiga, ae le o le faatalitali mo mea uma seia atoatoa. O le faatuatua ma le onosai o le a fesoasoani foi ia i latou o loo faatalitali mo le faamaoniaina o faamauga i le malumalu po o le toefuataiga o faamanuiaga o le perisitua.
A o tatou gaioi ma faagaioi (tagai 2 Nifae 2:14), e mafai ona tatou folau i le va oi uiga mama ma ausia ai le tele o le tuputupu ae o le olaga. E mafai ona oo mai i “se faafeagai” e tatau ai “ona tuufaatasi mea uma o se mea e tasi” (2 Nifae 2:11).
Mo se faataitaiga, e mafai ona tatou tuu le faapaie (tagai MF&F 88:124) e aunoa ma le momo’e televave atu nai lo le malosi ua ia i tatou (tagai Mosaea 4:27).
E mafai ona tatou “auai ma le naunautai i se faamoemoega lelei” (MF&F 58:27) a o taumafai e taofi mai lea taimi i lea taimi ia “filemu ma iloa o au o le Atua” (Salamo 46:10; tagai foi MF&F 101:16).
E mafai ona tatou maua o tatou ola e ala i le faamaumau o o tatou ola ona o le Faaola (tagai Mataio 10:39; 16:25).
E mafai ona aua nei o tatou “faavaivai i le faia o mea lelei” (MF&F 64:33; tagai foi Kalatia 6:9) a o faaavanoa le taimi talafeagai e toe faafou ai faaleagaga ma faaletino.
E mafai ona tatou talasua malie e aunoa ma le le faaaloalo.
E mafai ona matua talie fiafia ae le o le talie aamu i isi.
Ua valaaulia i tatou e le Faaola ma Lana Togiola ia “o mai ia Keriso, ma faaatoatoaina ia te ia.” A o tatou faia lena mea, ua Ia folafola mai o Lona alofa tunoa ua “lava lea mo outou, ma o lona alofa tunoa e mafai ai ona outou atoatoa ia Keriso” (Moronae 10:32).
Mo i latou ua mafatia i le popole e maua le faaatoatoaina po o le atoatoa i le taimi nei, ua faamautuina mai e le alofa togiola ua tuuina fua mai e lo tatou Faaola ia i tatou:
“O mai ia te au, o outou uma o e tigaina ma mafatia i avega, o au foi e malolo ai outou.
“… Aua e avegofie la’u amo, o la’u avega foi e mama ia” (Mataio 11:28, 30).7