Pe a ou talanoa i a’u uo e uiga i le Ekalesia, latou te fai mai latou te le fiafia i ai ona e tele naua tulafono. O le a se mea e mafai ona ou ta’u atu ia te i latou?

O o tatou uiga faaalia i soo se “tulafono” e tele lava lona aafiaga i mea ua tatou masani ai. Afai sa masani au uo i le le fufuluina o o latou nifo ma ua e tau atu ia i latou e te fufuluina ou nifo i aso uma ona sa aoaoina ai oe e fai, latou te ono vaai i lenei mea o se tulafono ogaoga. Ae e te le manatu moni lava i ai o se tulafono aua ua avea o se mea masani, o se ala e ola ai. E ui latou te manatu o le le fufuluina lava o o latou nifo o se ituaiga o saolotoga, ua e iloa faafitauli e taunuu i ai ma le sili atu o le lagona e maua i le i ai o ni nifo mama, ma maloloina.

Ua faapena foi i “tulafono” a le Ekalesia. Atonu e manatu au uo i tulaga faatonuina tatou te mulimuli ai o ni papupuni, ae ua e iloa ua tuuina mai e le Alii ma Ana auauna ia i tatou e fesoasoani ia i tatou ina ia ola ai i se olaga sili atu ona lelei ma toe foi atu ai i le Tama Faalelagi. E faapena foi, o le usiusitai i poloaiga a le Atua e aumaia ai faamanuiaga i taimi uma, ma o se tasi o na faamanuiaga o le mafutaga a le Agaga Paia. E mafai ona e taumafai e faamatala atu nei mea aoga ma faamanuiaga i au uo, ma e mafai ona e tau atu ia te i latou pau lava le ala e iloa ai pe o “tulafono” e mai le Atua o le faataitai lea e ola ai (tagai Ioane 7:17).