O Tusi e Lua mai ia Tina
Ken Pinnegar, Kalefonia, ISA
I le 1996 na toalua le ma fanau tama ma lou toalua, e fa ma le fitu tausaga. O i matou o se aiga talavou masani ma pisi . I le tuneva o se tasi po sa faaalu ai e lo’u toalua se taimi e tusi ai se tusi i lo’u tei, o Keleni, o le sa auauna faamisiona i Finelani.
Mo nisi mafuaaga, sa ia lagonaina le tatau ona ia tusia se tusi umi—lea e tumu i le auiliiliga o mea a tagata taitoatasi o le aiga na faia, i mea faaleagaga, o mea na tutupu i lo’u valaauga i le Ekalesia ma i lona valaauga i le Ekalesia, le tala i lona liliu mai, o ona lagona e uiga i le galuega faafaifeautalai, ma lana molimau o le talalelei.
O se tusi maoae, ae sa ou mafaufau pe manaomia moni lava e si o’u tei le tele o na faamatalaga. Mulimuli ane sa ia toe tusi atu foi ia te ia.
I le ono tausaga mulimuli ane, a o ou auauna atu o se epikopo ma ua 10 ma le 13 tausaga o le ma fanau tama, sa faafuasei lava ona suia lo’u lalolagi. I le aso 2 o Ianuari, 2002, na maliu ai lo’u toalua, e na o le 42 tausaga le matua, i le fatu.
Sa ou taumafai i le fale e faaauau ona mulimuli i mataupu faavae o i le “O Le Aiga: O Se Folafolaga i le Lalolagi.”1 Sa ou iloa e mafai ona ou pulefaamalumalu ma tausia le aiga, ae sa ou lagona le le lava o le tuuina atu i o’u atalii o le tausiga sa la manaomia. E ui i lea, na matou ola i le mea sili matou te mafaia.
Ia Iuni 2012 o lo’u atalii laitiiti, o Sam, lea sa auauna atu faamisiona i le Misiona o Colorado Denver i Saute, na auina mai ia te au se i-meli. “Sa tupu se mea e matuai manaia lava i lenei vaiaso,” na ia tusia. “Sa ou maua ni tusi se lua mai ia Tina.”
Na ia faamalamalama mai faapea na ia mauaina se afifi mai lona tausoga o Keleni, lea na aofia ai ni tusi na ia[tina] tusia ia te ia a o i ai o ia i Finelani.
“Na ia ta’u mai ia te au o nei tusi e lua na auina atu e Tina ia te ia i lana misiona, na tusia moni lava mo au ao i ai i la’u misiona,” o le tusi mai lea a Sam. “O lea na ia auina mai ai na tusi ia te au, ma sa ofoofogia!”
O le iloaina o le liua o lona tina, molimau, ma lagona e uiga i le galuega faafaifeautalai o “se fesoasoani maoae moni i le taimi lenei”, o le tusi mai lea a Sam. Sa ia fai mai ua ia fuafua e fai ni kopi o tusi ma auina mai i le fale ia uluai pepa.
“Ou te lei iloaina lava sa avea oe ma se peresitene o le korama a toeaina po o le taitai misiona a le uarota,” na tusia e Sam. Sa ia iloaina, ina ua fa ona tausaga, sa ia “osooso i luga o le moega pe a uma tatalo ma alaga atu “Ou te manao e avea ma se faifeautalai.”
Ona ia faaopoopo mai lea o se mea sa ia aoaoina e uiga i lona tina: “Masalo na iloa e Tina o le a avea au ma se tagata pii aua sa ia fai mai o le a mafai ona ou faamanetaina ese totini o se tagata pii faapolofesa. :)”
Sa ootia au i loimata i uiga faaalia a Sam i tusi. I ni nai vaiaso mulimuli ane, sa ia lafoina mai tusi i le fale. Sa mamana tusi, na patino, ma faamomoiloto ina ua tusia i le 1996, ae o mea na tutupu i tausaga mulimuli ane, ua sili atu ai le mamana.
O tusi a lo’u toalua na faamalosia ai si o’u tei, ae sa pei o le “lafo ia lau mea e ai i luga o le vai” (tagai Failauga 11:1), na toe foi mai i tausaga mulimuli ane, ina ia faamanuiaina ai lana tama tama faifeautalai ma le toalua ua maliu lana ava.