Aisea na foafoaina ai e le Atua i tatou?

E taua le malamalama faapea e lei “foafoaina” e le Atua i tatou mai le tulaga o le leai o se mea i le avea ma se tagata. Sa i ai ni vaega autu o i tatou a o lei fananau mai o tatou agaga: “Sa i ai foi le tagata i le amataga ma le Atua. O le atamai, po o le malamalama o le upu moni, sa lei foafoaina pe na faia, pe mafai moni lava ona foafoaina pe gaosia” (MF&F 93:29). Aua ua tatou iloa lenei mea, ua tatou iloa foi o le uunaiga a le Tama Faalelagi i le foafoaina o i tatou e le o se mea na tupu fua pe na faafuaseia ae o se faamoemoega loloto. Na aoao mai le Perofeta o Iosefa Samita, “O le Atua lava ia, i le silafia ai ua i ai o Ia i le lotolotoi o agaga ma le mamalu, ma talu ai e sili atu lona atamai, sa silasila atu ai e tatau ona faatulagaina ni tulafono e mafai ai e le toatele ona maua le avanoa e alualu ai i luma e pei o Ia lava.” (Aoaoga a Peresitene o le Ekalesia: Iosefa Samita [2007], 210; tagai foi Mose 1:39). Aua e finagalo le Tama Faalelagi ia i tatou ia maua le avanoa e alualu ai i luma ma avea faapei o Ia, sa Ia foafoaina o tatou agaga, ma sa Ia tuuina atu se ata o le faaolataga ma le fiafia lea e manaomia le aofia ai o lenei aafiaga faalelalolagi. Atonu, ona o lea, o le tali faigofie ma sili ona lelei i lenei fesili o le tali foi lea i le fesili pe aisea e fai ai e le Atua o soo se mea lava: aua e alofa o Ia ia i tatou.