Sa Ou Vaai i Foliga o Lou Tina

Randi Reynolds Allen, Kalefonia, ISA

I se tasi Aso Sa i le taumafanafana o le 2002, sa ou ala ae i luga o mafaufau i lo’u tina, e lei leva ona maliu. Sa ou asiasi atu i la’u uarota tuai i Pasefika Palisades, Kalefonia, ISA, lea sa tapuai ai lo’u tina mo le toeitiiti atoa le 50 tausaga.

Sa ou tootuli i le tatalo e ta’u atu i le Alii lou misia tele lava o ia ma ole atu mo se aafiaga faaleagaga i lena aso.

Sa ou fuafua e auai i le faasalalauga o le toe faapaiaina o le Malumalu o Navu Ilinoi i le falesa o le siteki i Santa Monika, Kalefonia i lena aoauli. Ae paga lea, sa ou tuai atu e ulufale i le sauniga. Sa ou toe foi i la’u taavale ma toe agai atu i luga o le auala televave.

A o aveina lau taavale, sa ou faalogoina se leo o fai mai, “Randi, alu e siaki Mary!” O Mary o se uo pele o lo matou aiga ma o se tagata faamaoni o se isi faatuatuaga. O ia ma lana tama teine o Natasha sa tuaoi ma le uso o tina o Ruby mo le silia ma le 25 tausaga. Talu ai sa leai so latou aiga sa lata ane, sa avea i latou ma se vaega o i matou. Ina ua maliu le uso o lo’u tina i le 1984, e masani ona asia e lo’u tina Mary, ma aumaia i taimi uma se meaalofa laitiiti po o se mea sa ia taoina.

I le taimi muamua sa ou le amanaiaina le musumusuga. E le mafai ona tu atu faafuasei, ma e lei i ai lau telefoni feaveai e valaau atu ai ia te ia. Na faafuasei ona toe sau le leo, ua leotele atu i le taimi lenei: “Randi, alu e siaki Mary!” O le taimi lea sa ou faalogo ai i le fautuaga, e ui lava toeitiiti le lava se taimi ou te aluese ai mai le auala televave pisi.

Ina ua ou taunuu atu i le fale o Mary, na ia faafeiloai mai ia te au ae sa foliga ma’i. Sa ou iloa atu sa tagi o ia. Sa ou fesili atu po o le a le mea ua tupu. Sa tali mai o ia ua matua ma’i lava ma o loo tigaina mai se manua o le ua. E le gata i lena, sa matua leai ni ana meaai. Sa fai mai o ia o lona ma’i tele ua le mafai ai ona savali i le faletalavai po o le maketi.

Ina ua ou fesili atu ia te ia pe aisea na te lei valaauina ai se tagata i lo matou aiga, sa ia fai mai, “Sa ou tatalo ma ole atu i le Tama Faalelagi e auina mai se tasi e fesoasoani ia te au.”

Sa ou fai atu ia te ia na faafofogaina ana tatalo e le Tama Faalelagi ma auina mai au. Sa ma feopoai, ona ia faamatala mai lea ia te au o se mea o le a le galo lava ia te au. Sa ia fai mai, “Ina ua e taunuu mai i lo’u faasitepu, sa ou vaaia foliga o lou tina, ae le o oe.”

Sa vave ona ou lagonaina le agaga matagofie o lo’u tina i tafatafa o au, ma sa ou lagonaina le uunaiga e auauna atu e pei lava ona auauna atu lo’u tina. O lona olaga, i mea uma, sa faatumulia i le auauna atu i isi.

Ou te faamoemoe o le a ou le faagaloina lava le taua o le faalogo i le siufofoga o le Agaga ma le faataitaiga na faia e lo’u tina mo au o le auauna atu i isi.