Ua E Laveaiina La’u Faaipoipoga

Neil S. Roy, Yorkshire, Egelani

A o ou faia ni galuega kamuta i Oman mai le 1979 i le 1986, sa ou galue mo le matagaluega o le puipuiga. Sa tuuina mai e le matagaluega ia te au ni galuega faatino i vaega e sili ona faigata ona oo i ai o le atunuu, ma o le tele o taimi sa na o au le supavaisa e vaaia galuega faatino. Sa na o au foi le tagata o le Ekalesia e faigaluega mo le matagaluega.

I se tasi aso i le laumua o lo matou kamupani, sa ou feiloai ai i se enisinia eletise, e pei o le taimi ua tuanai, sa ia faia ni faamatalaga le lelei e uiga i le Ekalesia. Sa ou taliaina ana faamatalaga ona sa masani ona ou i ai i le laumua mo na o sina taimi puupuu ae ou te le’i aluese atu i se isi galuega faatino.

Ae, mulimuli ane, sa tofia lenei tagata e siakiina le tulaga o galuega faaeletise i galuega faatino o loo fausiaina i tuaoi o Oman ma Yemen. Na faatulagaina e faaalu se itula ma te faatasi ai a o lei toe lele atu o ia i le laumua.

Ina ua taunuu mai o ia, sa ia siakiina le galuega ma sa faamalieina o ia i mea uma. I le taimi na ma faatasi ai, sa ou tataiina le ma talanoaga i le galuega ona aveina atu lea o ia i le tamai malae vaalele e faatofa i ai.

O le vaitau lenei o timuga ma afa, ma o le tulaga o le tamai malae vaalele, lea sa i luga o le mauga maualuga e 6,000 futu (1,830 m) i luga ae o le Vasa Initia, sa ufitia i ao. O le a faatuai le faigamalaga a la’u paaga faigaluega.

Sa matuai tatavale lo’u fatu ina ua ou iloaina e tatau ona ou faatali i le taavale ma lenei tagata. Ina ua uma ona ou faia se tatalo le leoa, sa oo mai se manatu i lo’u mafaufau e fesili atu i le alii e uiga i lona aiga, ae maise lava lona toalua.

Na ou faia lena mea, ma na faafuasei lava ona matuai maligi loimata o le inisinia, ma faapea mai o lea faatoa ia maua se tala ua manao lona toalua la te tetea. O le upu alofa na vave oo mai i lo’u mafaufau, ma o le isi lua itula na ma talanoa ai e uiga i le alofa e tatau ona tatou maua mo isi, ma le alofa o loo i ai o le Alii o Iesu Keriso mo i tatou uma. E lei leva lava, ae avea i maua ma uo. A o faaiuiu le ma talanoaga, na lagilelei le aso ma na malaga atu loa le enisinia i lana vaa. E lei umi ae ou faalogo ua faamavae o ia mai lana galuega ma toe foi atu i le aiga.

I ni nai tausaga mulimuli ane, a o ou i ai i se tafaoga ma alii talavou o le Perisitua Arona i Plymouth, o se aai i le talafatai i saute o Egelani, sa ou matauina se alii o loo agai mai ia te au. A o latalata mai o ia, sa ia fai mai, “Na ou manatu lava o oe lea, Neil.”

O le enisinia eletise mai Omana. O isi upu na ia saunoa ai o loo tumau pea i lo’u fatu: “Faafetai mo lou talanoa mai ia te au e uiga i le alofa i lena aso i luga o le mauga. Na e laveaiina la’u faaipoipoga, ma e faavavau pea lou agaga faafetai.”

Sa ma fefaasoaa’i ni nai isi upu, ona ia tuumuli ai lea. Ou te lei toe vaai lava ia te ia.

O le a faafetaia pea lava le musumusuga na ou maua i Omana. Sa faamanuiaina ai le enisinia ma ou maua ai le malosi e faatumauina ai o’u talitonuga i le Ekalesia pe a tuua na o au ma mamao ese mai le aiga.