Auaunaga i le Ekalesia

Taitai e Pei o le Faaola

Saunia e Ryan Carr

Mekasini a le Ekalesia

Woman Healed, saunia e J. Kirk Richards

O loo i ai se eseesega maoae i le va o le taitai sili ona leaga i le lalolagi ma le taitai e sili ona atoatoa, o le Faaola o le lalolagi. Na faamalamalamaina e Peresitene Spencer W. Kimball (1895–1985): “O na taitai i le talafaasolopito o e ua sili ona matautia i lo latou aafiaga i tagata sa matautia ona latou te lei mauaina toeitiiti lava a leai sina vaega o uiga o le Tagata o Kalilaia. O Iesu sa agalelei, o i latou sa manatu faapito. O Iesu sa popole i le saolotoga, o i latou sa popole i le puleaina. O Iesu sa popole i le auauna atu, o i latou sa popole i lo latou tulaga. O Iesu sa tali atu i manaoga moni o isi, sa latou popole i o latou lava manaoga ma mea e fiafia i ai. O Iesu sa popole i le atiina ae o ona soo, sa latou saili e faatiga i tagata soifua. O Iesu sa faatumulia i le agaalofa e ogatusa ma le faamasinoga tonu, e masani ona faatumulia i latou i le saua ma le le tonu.”¹

Ina ia faamanuiaina i le avea ai ma taitai i le ekalesia a le Alii, e tatau ona tatou mulimuli i Lana faataitaiga. O manatu nei e mafai ona fesoasoani ia i tatou ia avea atili ai faapei o Keriso i la tatou taitaiga.

O taitai e faapei o Keriso e auauna atu “ma le manatu tasi i le mamalu o le Atua” (MF&F 4:5), ma saili e fai le finagalo o le Tama Faalelagi. Sa fetalai le Faaola, “Ou te le’i alu ifo mai le lagi e fai lo’u lava loto, ao le finagalo o Le ua auina mai a’u” (Ioane 6:38).

O taitai e faapei o Keriso e le faalagolago i le “lima o le tagata” (2 Nifae 4:34). Latou te tatalo ma le lotomaualalo mo le taitaiga. Latou te faatalitali i le Alii ma saili e fai Lana galuega i Lana taimi ma Lana ala nai lo o le faalagolago i a latou lava taleni ma tomai.

O Taitai e faapei o Keriso e le saili mo tofiga i le Ekalesia; latou te vaai i valaauga o ni avanoa e auauna atu ai, ae le o ni siitaga. Pe latou te vaai foi i faamalologa faapea ua pauu agai i lalo. O le faamaloloina o se tulaga masani i soo se valaauga.

O taitai e faapei o Keriso o ni auauna; e fesoasoani, aoao atu, ma uunaia i latou o loo latou auauna atu i ai. Latou te saili e faamanuia isi, e pei ona faia e le Faaola: “E lē faia e Ia se mea vagana ua mo le manuia o le lalolagi” (2 Nifae 26:24). Latou te vaaia i latou lava o ni sui o le Alii e fesoasoani i isi e toe foi atu ia te Ia.

O taitai e faapei o Keriso e fesoasoani i isi e atiina ae. Na aoao mai foi Peresitene Kimball:

“E lava le faatuatuaina e Iesu o ona soo lea ua faasoa atu ai lana galuega ia i latou ina ia mafai ona latou tuputupu ae. O se tasi lea o lesona silisili o lana taitaiga. Afai tatou te tuleiese isi tagata ina ia mafai ona vaai ua sili atu ma lelei le faataunuuina o se galuega, e mafai lava ona fai le galuega, ae e aunoa ma le tuputupu ae ma le alualu i luma i soo lena e taua tele. …

“Na tuuina atu e Iesu i tagata upumoni ma galuega e talafeagai ma lo latou malosi. Sa ia le lofituina i latou i le sili atu nai lo le mea e mafai ona latou gafatiaina, ae tuuina atu ia lava e faamalosia ai lo latou tulaga faaleagaga.”²

Na faamatalaina e le Perofeta o Iosefa Samita le ala na matuai lelei ai lana taitaiga o tagata: “ou te aoaoina i latou i le mataupu faavae sa’o, ona latou pulea lea o i latou lava.”³ O le fatu lenei o le ala a le Alii i le taitaiga.

Faamatalaga

1. Spencer W. Kimball, “Iesu: Le Taitai Atoatoa, Liahona, Mati 1980, 7.

2. Spencer W. Kimball, “Iesu: Le Taitai Atoatoa, 6.

3. Aoaoga a Peresitene o le Ekalesia: Iosefa Samita (2007), 301.

4. Aoaoga a Peresitene o le Ekalesia: Lorenzo Snow (2012), 160.

5. Tagai Thomas S. Monson, “Tiute o Valaauga, Liahona, Iulai 1996, 51.

“Ae Ou Te Lei Maua Se Poto Masani o le Taitaiga!”

Aua e te popole pe afai e lei i ai sou poto masani. Ua valaauina oe e ala i le musumusuga, e se tasi ua i ai le pule (tagai Mataupu Faavae o le Faatuatua 1:5). E silasila le Alii i le tagata o le a avea ai oe. E mafai e lou valaauga e taitai ona avea ma se avanoa e atiina ae ai ou malosiaga ma faatoilalo vaivaiga.

I pisinisi ma isi faalapotopotoga, o le aoga ma le poto masani o se taitai e masani lava o agavaa autu ia, ae e ese ai le ala a le Alii. Na aoao mai Peresitene Lorenzo Snow (1814–1901): [O] aposetolo na valaauina e le Atua, lea na valaauina e Iesu, le Alo o le Atua, … sa lei aoaoina lelei i latou; sa lei malamalama i latou i le faasaienisi, latou te lei umiaina ni tofiga maualuluga i Iutaia—na matitiva i latou ma le iloa tusitusi; e tusa ma tofiga maualalo o le olaga. … O le mea lea, i lena taimi, e ese lava le Alii. Sa ese le faatinoina o Ana tofiga mai na tofiga e faia e tagata.”¹ O le mea e laki ai, o e na valaauina e le Alii Na te faaagavaaina!²

Mo Taitai e Fefautuaai ma Tagata o le Ekalesia

Pe a outou fono faatasi ma tagata o le Ekalesia o loo manaomia la outou fesoasoani, atonu latou te mananao tou te foia o latou faafitauli mo i latou. Ae o le faia o lea o le a taofia ai i latou mai le tuputupu ae faaletagata lava ia. E mafai ona latou o mai ma le faamoemoe mo se fofo vave, ae o o latou faafitauli e masani lava o le a tele atu se taimi e manaomia e foiaina ai e i latou i latou lava. O nisi nei o luitau masani. O fesili nei, sa fautuaina mai e taitai perisitua, e mafai ona fesoasoani a o e saunia e fefautuaai ma tagata o le ekalesia:

• Pe e te fefautuaai ma fesoasoani i tagata i se auala e tumau ai pea le faatoilaloina o o latou luitau e avea ma o latou lava tiutetauave?

• Pe o e taialaina tagata ina ia sue a latou lava tali?

• Pe o e tulitataoina galuega na latou malilie e faia?

• Pe o e fesoasoani ia i latou e maua punaoa e foia ai o latou lava faafitauli?

• Pe o e uunaia i latou e augani atu i le Alii?

• Pe o lau fautuaga e uunaia ai tagata o le ekalesia e agai i luma?

Ioe, e eseese uma lava tulaga, o lea e taua ai le mulimuli i le taitaiga a le Agaga. O le auauna atu i le alofa, onosai, ma lagona faaleagaga o le a taitai atu i taunuuga lelei.