Savali a le Au Peresitene Sili
O Le Folafolaga i Loto e Liliu Atu
Sa ola ae lo’u tina, o Mildred Bennion Eyring, i le nuu faifaatoaga o Granger, Iuta, ISA. O se tasi o ona tuagane, o Roy, na mulimuli i le pisinisi o le aiga o le tausiga o mamoe. A o avea ma alii talavou na ia faaaluina le tele o vaiaso e aluese ai mai le aiga. I le aluga o taimi sa iu ina faaitiitia lona fiafia i le Ekalesia. Na iu lava ina siitia atu o ia i Idaho, ISA, faaipoipo, ma maua se fanau e toatolu. Na maliu o ia i le 34 o tausaga a o 28 tausaga o lona toalua ma sa laiti le la fanau.
E ui lava o le aiga laitiiti o Roy sa i Idaho ma sa siitia lou tina pe a ma le 2,500 maila (4,025 km) i New Jersey, ISA, sa masani ona ia tusi atu ni tusi o le alofa ma faamalosiauga. Sa faaigoa ma le alofa e le aiga o le tuagane o lo’u tina lo’u tina o “Aunt Mid.”
Na mavae tausaga, ma na ou maua se telefoni i se tasi aso mai se tasi o o’u tausoga. Sa tau mai ia te au ua maliu le toalua o Roy. Na fai mai lo’u tausoga, “O le a manao Aunt Mid ia e iloa.” Ua leva ona maliu Aunt Mid, ae na lagona pea e le aiga lona alofa ma taumafai e tau mai ia te au.
Sa ou mafaufau lava i le ala na faataunuuina ai e lou tina se matafaioi i lona aiga e talitutusa ma le matafaioi a perofeta sa Nifae sa faataunuuina i o latou aiga e ala i le faalatalata atu i tagata o le aiga sa latou mananao e aumai i le talalelei a Iesu Keriso. Na tusia e Nifae se faamaumauga na faamoemoe o le a uunaia ai le fanau a ona uso e toe foi atu i le faatuatuaga a lo latou peteriaka, o Liae. Na faaalia lena lava alofa e atalii o Mosaea a o latou talai atu le talalelei i e tupuga mai ia Liae.
Ua tuuina mai e le Alii auala mo i tatou e lagona ai le alofa i aiga lea e mafai ona faaauau e faavavau. O tagata talavou i le Ekalesia i le taimi nei ua lagonaina le liliu atu o o latou loto i o latou aiga. Ua latou saili mo igoa o tagata o aiga e le i maua le avanoa e maua ai sauniga o le faaolataga i lenei olaga. Latou te avatu na igoa i le malumalu. A latou ui ifo i le vai o le papatisoga, o le a latou maua le avanoa e lagonaina ai le alofa o le Alii ma tagata o le aiga o loo latou faatinoina sauniga sui mo i latou.
Ou te manatuaina pea le alofa i le siufofoga o lo’u tausoga o le na valaau mai ma fai mai, “Ua maliu lo matou tina, ma e manao Aunt Mid ia e iloa.”
O outou o e faatinoina ia sauniga mo tagata o le aiga o loo aapa atu i le alofa, e pei ona faia e atalii o Mosaea ma le perofeta o Nifae. E pei o i latou, o le a e lagona le olioli mo i latou e taliaina lau taulaga. E mafai foi ona e faamoemoe ia lagona lea lava faamalieina maoae e tasi e pei o Amona, lea na fai mai e uiga i lana auaunaga faafaifeautalai i tagata o aiga taumamao:
“O lea, ia tatou mitamita ai, ioe, o le a tatou mitamita i le Alii; ioe, o le a tatou olioli, ona ua atoatoa lo tatou olioli; ioe, o le a tatou viia lo tatou Atua e faavavau. Faauta, o ai ea e mafai ona tele naua lona mitamita i le Alii? Ioe, o ai e mafai ona tele naua upu na te faia e uiga i lona mana tele, ma e uiga i lona alofa mutimutivale, ma i lona tali-tiga i le fanauga a tagata? Faauta, ou te fai atu ia te outou, e le mafai ona ou fai atu se vaega itiiti o le mea ua ou lagona.” (Alema 26:16).
Ou te tuuina atu lau molimau o lagona o le alofa e te maua mo tagata o lou aiga—po o fea lava o loo latou i ai—o se faataunuuga o le folafolaga o le a oo mai Elia. Sa oo mai o ia. Ua liliu atu loto o fanau i o latou tamā, ma ua liliu atu loto o tamā i a latou fanau (tagai Malaki 4:5–6; Iosefa Samita—Talafaasolopito 1:38–39). Pe a e lagona le naunautaiga ina ia maua igoa o ou tuaa ma avatu na igoa i le malumalu, ua e aafia i le faataunuuina o lena valoaga.
O se faamanuiaga le ola i le taimi ua faataunuuina ai le folafolaga o loto e liliu atu. Na lagona e Mildred Bennion Eyring lena uunaiga i lona loto. Sa ia alofa i le aiga o lona tuagane, ma sa ia aapa atu ia te i latou. Sa latou lagonaina o latou loto ua liliu atu i le alofa ia Aunt Mid ona sa latou iloaina lona alofa mo i latou.