Mo Le Malosi o le Autalavou
GaluegaO Ai e Manao I Ai?
O le galue atonu e le masani ona manaia, ae e mafai ona e ofo i le matua lelei o le lagona e te maua mai ai.
Ata na tusia e Brian Call
A o avea ma se alii talavou, sa ou fiafia e taalo ma maua se taimi fiafia e pei lava o isi. Ae ina ua atoa lo’u 16, sa ou fiafia e tafao faamasani ma faifai mea faatasi ma au uo. E sili atu lou fiafia i na gaoioiga nai lo le galue.
Peitai, e pei o le toatele o outou, sa ou maua se galuega. Sa galue lo’u tama i se pisinisi kamuta, fausiaina o fale, ma sa masani lava ona ia tusia au ma ou uso e toatolu e fesoasoani ia te ia. Sa vevela ma faigata le galuega; sa i ai taimi sa ou matua le fia faigaluega ai lava. Ae sa i ai taimi faatulagaina e tausisia ma galuega faatino e faamaea, o lea sa matou galulue malosi ai i aso taitasi seia oo ina maea le galuega. E ui lava ou te lei iloaina i lena taimi, o le galulue faatasi ma lo’u aiga na aoaoina ai au i ni lesona.
O Le Faamalieina e Oo Mai i se Galuega na Lelei ona Fai
O le fausiaina o fale e manaomia ai le tele o taimi, taumafaiga, ma le sa’o atoatoa. O se tasi o eria lea sa ou manatu e le tatau ona matou manaomia ai le matua sao atoatoa o le eliga o le fusi faavae mo se fale. Na ese le manatu o lo’u tama.
Ina ia faataatia le faavae mo se fale, e muamua ona e eli ma faatumu le fusi faavae. O fusi faavae o ni vaega o le sima e lautele atu nai lo le faavae. O le taimi lava e fatumu ai fusi faavae ma ua malo, e te sasaa ai loa le faavae i luga o fusi faavae. Ona e toe faatumuina lea i palapala luga o fusi faavae.
Sa masani ona ou mafaufau pe matuai taua tele lava le atoatoa o le faatafafa o fusi faavae. Aua foi, a tanumia e le palapala, e leai se tasi o le a vaai lava i ai, ma e le faavaivaia ai i le faatulagaga o le lagolago o le fale. Ae sa manao lava lo’u tama i fusi faavae ina ia faatafafa ma mafolafola, fuaina ia sa’o ma le faaeteete, ma sa ia faia lenei mea i fale uma na ia fausia.
I le toe tepa i tua, ua ou iloa ai na taulimaina e lo’u tama mea uma sa ia faia i lana galuega i le faaeteetega lava lea e tasi, e oo lava i mea e le iloa lava e le ona le fale. O lona taulai atu i le sao o faamatalaga e mafai ai e tagata ona talitonuina o ia e faia galuega lelei, ma sa ia maua le faamalieina i le iloaina o lana galuega o le tulaga sili ona lelei ma o le a talisapaia e tagata e ona galuega.
Atonu e i ai taimi e leai se tasi ae na o oe ma le Alii o le a iloa le lelei sa e faia ai le galuega e tatau ona e faia. Ia mautinoa e silafia e le Alii lau taumafaiga. A o e faia le mea sili, o le a e maua se lagona lelei ia te oe lava ia, i le iloaina ua e atinaeina le amiosao, faamoemoeina, ma tomai aoga.
O le a e aoao e ala i lou aafiaga le taua o le tulafono a le Alii o le seleselega: “O le mea e luluina e le tagata, o le mea lava lea e seleseleina mai ai e ia” (Kalatia 6:7; tagai foi MF&F 130:20–21).
E Aafia Mea Uma i le Uiga Faaalia
O le eliina o le fusi faavae e alu ai se taimi umi, ma vevela, ma ou te tautino atu, ou te lei maua i taimi uma se uiga faaalia lelei i ai. Soo se taimi lava e maua ai au e lo’u tina o loo faitio e uiga i le tatau ona galue, e fai mai o ia, “Faaeteete. O le a e le maua lou faamanuiaga, ma e tatau lava ona e galue!” (Tagai MF&F 58:28–29.) Sa sa’o o ia. O le faitio e le aveesea ai le galuega; e na o le aveese ai o le faamalieina ma le tele o faamanuiaga o le faia o lena mea.
Sa ou iloaina ina ua ou filifili e faalogo i lo’u tina ma faia le galuega ma le loto fiafia, e vave ona uma le taimi, sa sili atu ona lelei le faiga o le galuega lava ia, ma sa sili atu ona atoatoa lou fiafia nai lo le taimi na ou faitio ai. E aafia mea uma i le uiga faaalia.
O Le Galuega Aupito Sili Ona Taua o le Galuega Lea a le Atua
O le auauna atu i se misiona o se aafiaga taua ia te au. Na ou iloaina e leai se isi galuega e sili atu ona taua nai lo le galuega a lo tatou Tama Faalelagi, lea o le a faamanuia ai olaga o i tatou, o Lana fanau: “Aua faauta, o la’u galuega ma lo’u mamalu lenei—ia aumaia le tino ola pea ma le ola e faavavau o le tagata” (Mose 1:39).
A o e auai i le galuega a le Tama Faalelagi e auauna atu i Ana fanau, o le a e mauaina, e pei ona faia e Alema, le olioli tele i le “o se auupega i aao o le Atua e aumai ai se agaga i le salamo; ma o [lou] olioli lea” (Alema 29:9).
O Se Valaaulia
O lea la, o ai e manaomia e galue? Tatou te manaomia uma lava! O le punavai o le ola tutoatasi, faamanuiaina, ma le olioli i lenei olaga. A o e auai ma le fiafia i galuega, o i latou uma o loo siomia ai oe o le a selesele ona o fatu ua e lulu.
A o e galue ai i lou vaiaso, ou te valaaulia oe e mafaufau e uiga i lesona sa ou aoaoina ona taumafai lea o lenei faataitaiga: o le isi taimi e tuuina mai ai ia te oe se galuega e fai, tuu atu i ai lau taumafaiga aupito sili, ia faaalia le uiga fiafia, ma vaai po o le a le mea o le a tupu. O le a e matuai ofo lava i le tele o le fiafia ma le manaia o le lagona e te maua ai.