Sa Tali e Nifae La’u Fesili

Judy M. Smith, Kansas, ISA

Sa ou fanau i le Ekalesia, ae sa seasea auai lo’u aiga a o ou tuputupu ae. E ui o lea, sa ou mauaina pea se auala ou te alu ai lava au ia i le lotu. I le amataga o le vaitau o le 1970, sa ou auauna atu o se faiaoga seminare i Pittsburg, Kansas, ISA. Ina ua matou aoaoina le Tusi a Mamona, sa ou luiina le vasega—e aofia ai au lava ia—e faitau le tusi atoa. I se tasi aso a o ou faitauina, sa ou mauaina se molimau mamana e moni le tusi.

I ni nai tausaga mulimuli ane, na o mai ai o’u matua mo se asiasiga. A o matou talatalanoa, na taua e lo’u tama nisi o mataupu ma te le fiafia faatasi i ai ma ou te lei manao e talanoaina ma ia. E ui i lea, sa ia faaauau, seia oo ina ua tau le lava lou onosai. Sa ou tuumuli ese mo sina taimi ma alu i lo’u potumoe, lea sa ou tootuli ai ma tatalo i le Tama Faalelagi ma fesili atu ia te Ia mo se fesoasoani i le feagai ai ma lo’u tama. Na oo mai le tali i se manatu: le tala ia Nifae ma le aufana gau.

Sa ou liliu atu i le tala i le 1 Nifae mataupu 16. Sa ou manatu e uiga ia Nifae i le lava o le lotomaualalo e alu atu ai i lona tama, o le na muimui i le Alii, e fesili atu i ai po o fea e alu i ai o ia e maua ai ni meaai (tagai fuaiupu 23). Faatasi ai ma lena manatu, sa uunaia au e alu i lo’u tama ma fesili atu mo lana taitaiga faapea foi ma se faamanuiaga faaleperisitua.

Ina ua ou toe foi atu i le potu malolo ma fesili atu ia Tama mo se faamanuiaga, sa ootia lona loto ma sa amata ona tagi. “Tuu mai sei ou mafaufau i ai,” o lana tala lea.

I le aluga o nai aso na sosoo ai sa ia anapogi ma tatalo. Ma, a o lei malaga ese Tama ma Tina, sa ia tuuina mai ia te au se faamanuiaga matagofie.

Ina ua mavae lena aafiaga, sa amata ona toe suia le olaga o Tama. I lo latou agai atu i le aiga mai Kansas, na asiasi atu ai o’u matua i Atamu-onai-Amani, Misuri, ISA, lea sa maua ai e lo’u tama se aafiaga mamana faaleagaga.

E lei umi, ae amata ona avea o’u matua ma ni Au Paia o Aso e Gata Ai toaaga ma tuuto. I ni nai tausaga na sosoo ai, na la auauna atu faatasi ai i ni misiona se lua—o le tasi i Siamani ma le tasi i le Lotoa o le Malumalu i le Aai o Sate Leki. Sa avea Tama ma se peteriaka o le siteki i le taimi na maliu ai o ia i le 1987.

Na silafia e le Alii o Tama o se tagata lelei. Sa ala mai i le Tusi a Mamona lou mauaina o la’u tali, ma sa ala mai i lo’u faatinoina o lena uunaiga na iloa ai e Tama e tatau ona avea o ia ma se taitai mo lo matou aiga. O lenei aafiaga na suia ai mea uma mo i matou.

Ua ou iloaina o le Tusi a Mamona e moni lava o se tasi molimau ia Iesu Keriso ma ua tusia mo o tatou aso. Ou te iloa e mafai ona ou liliu atu i ai pe a ou lotovaivai, ma i soo se tulaga lava. O loo i ai tali iina.

E moni lava, “o afioga a Keriso o le a taʼu mai ai ia i [tatou] mea uma e tatau ona [tatou] faia. (2 Nifae 32:3).