Tatou Te Aoao Atu e ala i le Mana o le Agaga Paia

Tatou te talitonu o le aoaoina atu o le talalelei a Iesu Keriso e ala i le mana o le Agaga Paia e taua i le galuega o le faaolataga a le Atua. O le aoaoga mataalia e fesoasoani i tagata e tuputupu ae ai i lo latou faatuatua ma le manao ia ola i le talalelei. E mafai ona faatino le aoao atu i le tele o faatulagaga, e pei o le tuuina atu o lesona ma lauga i le lotu; ae tatou te aoao atu foi pe a tatou talanoaina se mau ma se tagata o le aiga po o lo tatou faamalamalamaina atu i se tuaoi po o le a le perisitua.

Mafaufau i nei mataupu faavae e fa mo le aoao atu mataalia:

Alofa ia i latou e te aoaoina. Ia faamasani ia i latou. Mafaufau ma le agaga tatalo i mea latou te manaomia a o e sauni e aoao atu. Taumafai e faaaoga metotia faafaiaoga eseese: e eseese metotia e mafai ona oo atu i tagata eseese (tagai i nisi o manatu i le itu taumatau).
Aoao atu e ala i le Agaga. Na aoao mai Nifae, “Pe a tautala se tagata i le mana o le Agaga Paia, e moliooina ai i le mana o le Agaga Paia i loto o le fanauga a tagata” (2 Nifae 33:1). A o e aoao atu, e mafai ona e valaaulia le uunaiga a le Agaga e ala i le tuuina atu o le molimau ma e ala i le faaaogaina o mau ma aoaoga a perofeta o aso e gata ai. Tatalo mo le taitaiga a le Agaga Paia a o e sauni e aoao atu. E mafai ona Ia musuia oe e iloa le auala sili e aoao atu ai.
Aoao atu le aoaoga faavae. O mataupu faamaonia e aoaoina mai i le Ekalesia, e pei o tusitusiga paia, saunoaga o konafesi aoao, ma tusi lesona, o loo i ai aoaoga faavae—o upumoni e faavavau mai le Atua.
Ia valaaulia le aoaoina ma le filiga. A o e aoao atu, ia manatua o e o loo faalogologo e nafa mo lo latou lava aoaoina. Uunaia i latou e fai ni fesili, faasoa mai o latou manatu i le autu, ma mafaufau loloto i auala e mafai ona latou ola ai i mataupu faavae o le talalelei. O le a tuputupu ae la latou molimau e uiga i na mataupu faavae a o latou ola ai (tagai Ioane 7:17).

Na saunoa Peresitene Gordon B. Hinckley (1910–2008) i le taua o le lelei o le aoao atu: “O le ola e faavavau e mafai ona maua pe afai ua lelei ona aoaoina alii ma tamaitai, e suia ai i latou ma pulea o latou olaga. E le mafai ona faia faamalosia i latou ia amiotonu, pe o i le lagi. E tatau ona taitaiina i latou, ma o lona uiga o le aoao atu” (sii mai Jeffrey R. Holland, “O Se ua Maliu Mai Mai le Atua, Liahona, Iulai 1998, 29).