Galue ma le Faalagolago o le Tagata ia te Ia Lava

A o aoao talavou ma fanau e galulue malosi ma ia ola tutoatasi, ua saunia i latou e “saofaga ai i le lalolagi o loo [latou] ola ai” (Mo le Malosi o le Autalavou [2011], 40).

I itulau 56–57 o le lomiga lenei, ua faasoa mai ai e Randall L. Ridd, fesoasoani lua i le au peresitene aoao o Alii Talavou, mea sa ia aoaoina a o la galulue i le fausiaina o fale ma lona tama. Sa ia talanoaina le taua o le galue malosi, le i ai o se uiga faaalia lelei, ma le fausiaina o le malo o le Alii. Ua faamanatu mai e Uso Ridd ia i tatou: “A o ai e manaomia le galuega? Tatou te manaomia uma lava! O le amataga lea o le ola tutoatasi, faamanuiaina, ma le olioli i lenei olaga. A o e auai ma le fiafia i galuega, o i latou uma o loo siomia oe o le a selesele se seleselega tele ona o le fatu laau e te totoina.”

Fautuaga mo le Aoaoina o le Autalavou

Fai mai le Mo le Malosi o le Autalavou, “Ia faatuina ni sini maualuluga mo oe lava ia, ma ia naunau e galue malosi e ausia na sini” (40). Atonu e te manao e matamata ma lau fanau le vitio o Savali Faamamona mo le Autalavou “A Work in Progress” (tagai i vitio o le Faaipoipoga ma Aiga i mormonchannel.org/come-follow-me). Ona galulue faatasi lea e faatutu ni sini ma fai ni fuafuaga e ausia ai na sini.
E sili atu le faigofie o le galuega pe a tatou maua se uiga faaalia lelei. Faitau “Fesiitaiga o Paipa i Seevae Palapala” o loo i itulau 58–59 o lenei lomiga ma talanoaina pe faapefea e lou uiga faaalia ona aafia ai lau galuega.
“O se tasi o ituaiga o le paie o le faaaluina lea o le tele o taimi i gaoioiga lea e taofia ai oe mai galuega tupuolaola, e pei o le faaaogaina o le Initoneti, taalo i taaloga vitio, ma le matamata televise” (Mo le Malosi o le Autalavou, 40). Fesili atu i lau fanau e uiga i le aoga ma le matautia o le Initoneti, taaloga vitio, ma le televise. O le a le taimi e liua ai nei meafaigaluega i mea faalavefau? O a faamanuiaga e oo mai mai galuega tupuolaola? Mafaufau e fesoasoani i lau fanau e maua nei faamanuiaga e ala i le tuueseina o tekinolosi uma mo se taimi ma galulue faatasi i se galuega faatino.

Fautuaga mo le Aoaoina o Tamaiti

O le galuega faafaifeautalai o se galuega faigata, ma o le aoao ia ola tutoatasi o le a fesoasoani i tamaiti ia saunia ai mo lena galuega. Faatasi ai ma lau fanau, faia se lisi o feau i le fale e tatau ona iloa e faifeautalai ona fai (fai tagamea, kuka, ma faamamaina, mo se faataitaiga). Ona faia lea faatasi o nisi o na feau.
I lana tusiga, ua faamanatu mai e Uso Ridd ia i tatou “o le galuega aupito sili ona taua o le galuega a le Atua.” E mafai faapefea e lou aiga ona faalautele le galuega a le Alii? Mafaufau i se gaoioiga e mafai ona outou faia faatasi o le a fesoasoani e aumai ai isi e latalata atili atu ia Keriso.
O se vaega o le ola tutoatasi o le auala e pulea ai tupe. Aoao lau fanau i mataupu faavae o le paketiina ma le taua o le faia o le sefuluai o se vaega o la latou paketi.