O Feagaiga Paia e Malolosi Ai Kerisiano
Mai se saunoaga o le konafesi aoao ia Aperila 2009, “O Le Mana o Feagaiga.”
Aisea e mafai ai e le osia ma tausia o feagaiga ma le Atua ona tatou maua le mana?
I le aso 15 o Aokuso, 2007, sa mafatia ai Peru i se mafuie matautia na toeitiiti faaumatia ai aai tumatafaga o Pisco ma Chincha. E pei o le tele o isi taitai ma tagata o le Ekalesia, o Wenceslao Conde, le peresitene o le Paranesi o Balconcito o le Ekalesia i Chincha, na vave lava ona faatulagaina le fesoasoani i isi na faaleagaina o latou fale.
E fa aso talu ona mavae le mafuie, ae oo mai i Chincha Elder Marcus B. Nash o le Fitugafulu e fesoasoani e faamaopoopo taumafaiga laveai a le Ekalesia iina ma feiloai ma Peresitene Conde. A o la talanoa e uiga i le faafanoga lea na tupu ma mea ua uma ona faia e fesoasoani ai ia i latou na aafia, na oo mai le faletua o Peresitene Conde, o Pamela, o loo sii mai se tasi o lana fanau laiti. Sa fesiligia e elder Nash Sister Conde po o faapefea mai lana fanau. Faatasi ai ma se ataata, sa ia tali mai faapea na ala mai i le agalelei o le Atua o loo saogalemu uma ma manuia. Sa ia fesili e uiga i le fale o le au Conde.
“Ua leai se mea,” lana tali faigofie mai.
“A e a outou meatotino?» sa ia fesili atu ai.
“Sa tanumia mea uma i le faatafunaga o lo matou fale,” o le tali mai lea a Sister Conde.
“Ae o lena lava,” o le matau lea a Elder Nash, “o loo e ataata a o ta talanoa.”
“Ioe,” sa ia fai mai, “sa ou tatalo ma ua ou maua le filemu. Ua ia i matou mea uma matou te manaomia. Ua matou maua le tasi ma le isi, o loo i ai le ma fanau, ua faamauina i matou i le malumalu, ua matou maua lenei Ekalesia ofoofogia, ma ua matou maua le Alii. E mafai ona matou toe atiae faatasi ma le fesoasoani a le Alii.”
O Le Mana o Feagaiga
O le a le punavai o lena ituaiga mana mama ma faaleagaga, ma e faapefea ona tatou mauaina? O le punavai o le Atua. O le ala tatou te maua ai lena mana o a tatou feagaiga ma Ia. O se feagaiga o se maliega i le va o le Atua ma le tagata, o se maliega ua faatulagaina e le Atua ona tuutuuga.1 I nei maliega paia, ua noatia e le Atua Ia lava e lagolagoina, faapaia, ma faaeaina i tatou o se taui mo la tatou tautinoga e auauna atu ia te Ia ma tausi Ana poloaiga.
O le a se mea o i le osia ma le tausia o feagaiga ma le Atua lena e tuuina mai ai ia i tatou le mana e ataata ai i taimi faigata, e liliu puapuaga i le manumalo, ina ia “auai ma le naunautai i se faamoemoega lelei, … ma aumai le amiotonu tele” (MF&F 58:27)?
Faamalosia e ala i Meaalofa ma Faamanuiaga
Muamua, a o tatou savavali i le usiusitai i mataupu faavae ma poloaiga o le talalelei a Iesu Keriso, tatou te olioli i se soloaiga faifai pea o faamanuiaga na folafola mai e le Atua i Lana feagaiga ma i tatou. O na faamanuiaga e maua ai punaoa e tatau ona tatou gaoioi ai nai lo le faagaoioia a o tatou i ai i le olaga. Mo se faataitaiga, o poloaiga a le Alii i le Upu o le Poto e faatatau i le tausiga o o tatou tino faaletino e faamanuiaina i tatou ma e muamua ma sili le taua i le “poto ma oa silisili o le malamalama ma oa natia” (MF&F 89:19). E le gata i lea, latou te taitai atu ai i se olaga e masani lava ona sili atu le maloloina ma le saoloto mai vaisu faataumaoi. O le usiusitai e mafai ai ona sili atu lo tatou pulea o o tatou olaga, le gafatia sili atu e o mai ai ma o atu, e galulue ai ma fatufatu. O le mea moni, o tausaga, faalavelave, ma gasegase o le a i ai o latou aafiaga le lelei, ae ui lava i lea, o lo tatou usiusitai i tulafono o lenei talalelei e faaleleia ai lo tatou malosi e feagai ai ma nei luitau.
I le ala o le feagaiga, tatou te maua ai se sapalai tumau o meaalofa ma le fesoasoani. “E le uma le alofa” (1 Korinito 13:8; Moronae 7:46), o le alofa e maua mai ai le alofa, agaalofa e maua mai ai le agaalofa, o le mama e maua mai ai le mama, o le tuuto e maua mai ai le faamaoni, ma le auaunaga e maua mai ai le olioli. O i tatou o se vaega o tagata o le feagaiga, o se vaega o le Au Paia e faamalosiau, lagolago, ma auauna atu ai le tasi i le isi. E pei ona faamalamalama mai e Nifae, “Ma afai e tausi e le fanauga a tagata poloaiga a le Atua, e tausi o ia ia te i latou, ma faamalolosi i latou,” (1 Nifae 17:3).
Faamalosia i le Faateleina o le Faatuatua
O lenei mea e aumaia ai i tatou i se auala lona lua lea e aumaia ai e a tatou feagaiga le malosi—latou te aumaia le faatuatua e manaomia e faaauau ai ma faia ai mea uma e tatau i le Alii. O lo tatou naunau e tauave i o tatou luga le suafa o Keriso ma tausi Ana poloaiga, e manaomia ai se faailoga o le faatuatua, ae a o tatou faamamaluina a tatou feagaiga, e faateleina lena faatuatua. O le mea muamua, o faamanuiaga na folafolaina o le usiusitai ua manino mai, lea e faamautu ai lo tatou faatuatua. Lona lua, o le Agaga e faaali mai ai le olioli o le Atua, ma tatou te lagonaina le saogalemu i Ana faamanuiaga ma le fesoasoani faifai pea. Lona tolu, po o a lava mea e oo mai, e mafai ona tatou ola i le olaga ma le faamoemoe ma le mafanafana, i le iloaina o le a tatou manuia i le faaiuga aua ua tatou maua le folafolaga a le Atua ia i tatou taitoatasi, i le igoa, ma ua tatou iloa e le mafai ona Ia pepelo (tagai Enosa 1:6; Eteru 3:12).
O taitai i le popofou o le Ekalesia i lenei tisipenisione na faamautuina mai faapea o le faaauau ona osi o feagaiga e aumai ai le faamalosiauga tatou te manaomia i taimi o tofotofoga: “O [le malamalama faapea a ogatasi o latou ala i le olaga ma le finagalo o le Atua] o le a mafai e le au paia anamua ona onosaia uma o latou puapuaga ma sauaga, ma tauave … e le gata o le faaleagaina o a latou oloa, ma le faamaumauina o a latou mea e ola ai, e fiafia pea, ae e mafatia foi i le oti i ona tulaga sili ona matautia; i le iloaina (e le na ona talitonu) pe a soloia i lalo lenei fale faalelalolagi o lo latou tapeneko, o loo i ai so latou fale o le Atua, o se fale e lei faia e lima, e faavavau i lagi. (2 Korinito 5:1).”2
Na latou toe faailoa mai o le ofoina atu o soo se taulaga e ono manaomia mai e le Atua ia i tatou, tatou te maua ai le molimau a le Agaga e sao lo tatou ala ma e fiafia i ai le Atua.3 Faatasi ai ma lena malamalama, o lo tatou faatuatua ua le faatuaoia, ua mautinoa lava o le a i ai se taimi o le a liliu ai e le Atua mafatiaga uma mo lo tatou manuia. (Tagai MF&F 97:8–9.)
Faamalolosia e ala i le “Mana o le faale-Atua”
Ua tatou talanoaina, muamua, o faamanuiaga mamana ma, lona lua, o le faaeega o le faatuatua e tuuina mai e le Atua ia i latou o e tausia a latou feagaiga ma Ia. O se vaega mulimuli o le malosi e ala i feagaiga o le a ou ta’ua o le faaeeina mai o mana paia. O la tatou tautinoga o le feagaiga ia te Ia ua faatagaina ai lo tatou Tama Faalelagi ina ia tuu mai Lana uunaiga paia, “le mana o le faaleatua” (MF&F 84:20), e tafe mai i o tatou olaga. E mafai ona Ia faia lena mea ona o lo tatou auai i sauniga o le perisitua, tatou te faaaogaina lo tatou faitalia ma filifili e taliaina. O lo tatou auai i na sauniga ua tatou faaalia ai lo tatou saunia e talia le tiutetauave faaopoopo lea e oo mai faatasi ma le malamalama faaopoopo ma le mana faaleagaga.
I sauniga uma, ae maise lava i totonu o le malumalu, e faaeeina ia i tatou le mana mai luga (tagai MF&F 109:22). O lenei “mana o le faaleatua” e oo mai i le tagata ma e ala mai i le uunaiga a le Agaga Paia. O le meaalofa o le Agaga Paia o se vaega o le feagaiga fou ma le faavavau. O se vaega taua o lo tatou papatisoga, o le papatisoga a le Agaga. O le avefeau o le alofa tunoa lea e faaaoga ai le toto o Keriso e aveese ai a tatou agasala ma faapaiaina ai i tatou (tagai 2 Nifae 31:17). O le meaalofa lea na “faaolaolaina i totonu o lona tagata” ia Atamu (Mose 6:65). O le Agaga Paia lea na onosaia ai e Aposetolo anamua mea uma na latou onosaia ma e ala mai i a latou ki o le perisitua na tauaveina ai le talalelei i le lalolagi i o latou aso.
Ina ua tatou ulufale atu i feagaiga faalelagi, o le Agaga Paia o lo tatou faamafanafana, o lo tatou taiala, ma la tatou soa. O fua o le Agaga Paia “o mea filemu o le mamalu ola pea; o le upumoni o mea uma; o lē e faavaveina mea uma, lea na te faaolaina mea uma; o lē na te silafia mea uma, ma ua i ai le mana uma tau i le atamai, alofa mutimutivale, upumoni, fai mea tonu, ma le faamasinotonu” (Mose 6:61). O meaalofa a le Agaga Paia o molimau, faatuatua, malamalama, poto, faaaliga, vavega, faamalologa, ma le alofa, ua taua na o ni nai meaalofa (tagai MF&F 46:13–26).
O le Agaga Paia lena e molimau atu i au upu pe a e aoao ma molimau atu. O le Agaga Paia lea e, a o e tautala atu i nofoaga o le tetee, e tuuina i totonu o lou loto le mea e tatau ona e fai atu ma e faataunuuina ai le folafolaga a le Alii e faapea “o le a le faafememeaiina oulua i luma o tagata” (MF&F 100:5). O le Agaga Paia lea e faaalia ai le auala e mafai ai ona e manumalo i le isi tofotofoga e sili atu le faigata. E ala mai le Agaga Paia o ia te outou atonu e mafai ai ona lagonaina e isi le alofa mama o Keriso ma mauaina le malosi e fetaomi atu ai i luma. O le Agaga Paia foi, i Lona tulaga o le Agaga Paia o Folafolaga, e faamautuina le aoga ma le taua o au feagaiga ma faamauina ai folafolaga a le Atua i ou luga (tagai MF&F 88:4–5; 109:14–15).
O Le a Faatasi le Tama Faalelagi Ia te Outou
O Feagaiga Paia e malolosi ai Kerisiano. Ou te uunaia tagata taitoatasi ina ia agavaa ma mauaina sauniga uma o le perisitua e te mafaia, ona tausia lea ma le faamaoni o folafolaga na e osia i le feagaiga. I taimi o faanoanoaga, ia avea au feagaiga ma faatumutumuga taua ma ia tonu a’ia’i lou usiusitai. Ona mafai lea ona e ole atu i le faatuatua, ia leai se masalosalo, e tusa ai ma mea e te manaomia, ma o le a tali mai le Atua. O le a Ia lagolagoina oe a o e galue ma matamata. I Lona lava taimi ma le ala o le a Ia faaloaloa atu Lona aao ia te oe, ma faapea atu, “O Au lenei.”