O La Tatou Avanoa

Papatisoga mo Lo’u Tamamatua

Ou te faafetai na fuafuaina e o matou taitai o le autalavou se malaga i le malumalu. A o matou saunia mo lenei malaga i Apia, Samoa, sa matou fiafia lava mo lenei avanoa tulaga ese. Sa matou o i totonu o le malumalu ma le fiafia e faia papatisoga mo e ua maliliu— mo i latou o loo i ai i le lalolagi o agaga o loo faatalitali mai mo i tatou e saili lo tatou talafaasolopito o aiga ma faia galuega mo i latou.

I le taimi o papatisoga, sa ou vaaia se alii talavou i la matou vaega ua papatisoina mo Faataga Agavale, o lo’u tamamatua. Sa ou lagonaina loimata o le fiafia i ou mata, ma sa ou iloa sa i ai lona agaga iina. Sa ou matuai fiafia lava sa mafai ona matou faia galuega mo ia i le malumalu.

Saini Agavale, Samoa

Faamatalaga Taua mai se Uo

A o talavou, ou te lei fiafia e alu i le lotu, ma ou te le’i iloa tele ni mea e uiga i le Tusi Paia, po o le Atua, ma ou te lei manao foi i ai. Ina ua 17 o’u tausaga, sa tau mai e se uo ia te au o ia o se Mamona. Ou te matuai le iloa lava po o le a le Mamona. Sa ou fai atu i la’u uo, “Afai ou te fia iloa se mea e uiga i lena ekalesia, o le a ou sailia e a’u lava ia.”

I le vaai mai sa ou le popole tele e uiga i mea tau lotu, sa ia tuuina mai ai ia te au se Tusi a Mamona ma fai mai ou te faitau ma tatalo e uiga i ai. Na te lei faamalosia mai au. Mulimuli ane i lena po a o ou susueina le tusi, sa ou matauina lana molimau na tusia i le pito i luma. A o ou faitau i ai, sa ou lagonaina e tatau ona ou aoao atili e uiga i le Tusi a Mamona. O lea sa amata ai ona ou faitauina le 1 Nifae. Ou te lei mafai ona toe tuu le tusi i lalo. Sa ou fia iloa atili.

I se afiafi faaleaiga, na aoaoina ai au e lona aiga e uiga i le talalelei a Iesu Keriso. Na foliga mai e talafeagai mea uma. E lei umi ae aoaoina au e faifeautalai ma papatisoina ma faamauina o se tagata o le Ekalesia moni a le Alii. Na fesoasoani le talalelei ia te au e iloa ai po o ai au, le mea na ou sau ai, ma le mea e mafai ona ou alu i ai pe afai ou te faamaoni.

A ou toe tepa i tua, e mafai ona ou iloa le ala na fesoasoani ai le Agaga Paia ia te au ia manao e aoao atili. A o ou aoao atili, na suia o’u uiga faaalia e uiga i ekalesia ma le Atua. Mo le taimi muamua i lo’u olaga, sa ou manao e fai le mea sa Ia finagalo ou te faia.

Na suia e le Tusi a Mamona lo’u olaga, ma ou te faafetai mo la’u uo lea na faasoa maia ia te au. O se uo moni e faasoa mai ni faamatalaga taua e pei o lenei.

Michael P., Ohaio, ISA