Ko ha Timi Fakafāmili
ʻOku nofo ʻa e tokotaha naʻá ne faʻú ʻi ʻAlapeta, Kānata.
ʻOku faingofua ange ke ikuna ʻi he taimi ʻoku ngāue fakataha ai e tokotaha kotoa pē.
“Fiefia he tokoní” (Tohi Hiva ʻa e Fānaú, 108).
Naʻe māpuhoi ʻa ʻĀmoni heʻene mavahe mo ʻene Tamaí mei he vaʻinga ʻakapulú. Naʻá ne pehē, “ʻOku ʻikai ke mahino ia kiate au. ʻOku tokolahi ʻetau kau vaʻinga leleí. Ko e hā ʻoku ʻikai ke tau tataʻo aí?”
Naʻe vaʻinga ʻakapulu lelei ʻeku Tangataʻeikí. Mahalo ʻe lava ʻo tokoni.
Naʻe pehē mai ʻeku Tangataʻeikí, “ʻOku ou tui ʻoku totonu ke ke ako ke ngāue ko ha timi. ʻOku mou fie maʻu kotoa pē ke tataʻo, ʻikai ko ia?”
Naʻe pehē mai ʻa ʻĀmoni, “ʻIo. Ka he ʻikai ke tau tataʻo kotoa pē. Ko hoʻo ʻuhingá ia?”
Ne kamokamo ange ‘ene tangataʻeikí. “He ʻikai lava ke ke tataʻo ʻiate koe pē. ʻOku fie maʻu e timi fakafepakí ke toʻo e pulú mei he timi ʻe tahá, ʻikai ko ia?”
Naʻe kata ʻa ʻĀmoni. “ʻOku faingataʻa ke tataʻo kapau ʻoku ʻikai ke ke maʻu e pulú.”
Naʻe pehē mai e tangataʻeikí, “Ko ia. Pea ʻe ʻoange leva ia ʻe he timi fakafepakí ki ha tokotaha ʻe lava ʻo tataʻó. He ʻikai lava ʻe ha taha ʻo fai toko taha ia.”
Naʻe pehē ʻe ʻĀmoni, “ʻOku ou tui ki ai.”
ʻI heʻenau aʻu ki ʻapí, naʻe pukepuke ʻe he Fineʻeikí e pēpeé lolotonga ʻene ngaohi e meʻakai efiafí. Naʻá ne fehuʻi mai, “Naʻe hā e vaʻingá?”
Naʻe pehē ange ʻe ʻĀmoni, “Ne mau toe foʻi. Ka te mau lelei ange he hoko maí.”
Naʻe pehē ange ʻe he Fineʻeikí, “Ko ha ʻulungaanga lelei ia.”
Naʻe kaila ʻa Maikeli ʻi heʻene lele mai mo Samuela mo Lūkasi ki lotó, “Fiekaia au!”
Naʻe kole ange ʻe he Fineʻeikí, “Fānau, te mou lava nai ʻo fokotuʻutuʻu e tēpilé pea fakamaau e meʻa vaʻingá?”
Naʻe laulau e fānau tangata ʻe toko faá.
Pehē mai ʻa Samuela, “Naʻe ʻikai ke u vaʻinga ʻaki e meʻavaʻingá.”
Ne hanu mai ʻa Maikeli, “ʻE fuʻu fuoloa!”
Naʻe kata e tangataʻeikí. “ʻOku ou tui ʻoku palopalema tatau hotau fāmilí mo e timi ʻa ʻĀmoní.”
Naʻe fehuʻi ʻe Samuela, “Ko e hā ia?”
Naʻe pehē mai ʻe ʻĀmoni, “ʻOku ʻikai ke tau ngāue fakataha. ʻOku tau fie maʻu kotoa pē ke kai ʻi haʻatau maʻu meʻatokoni efiafi. Ka ʻoku tau tuku kotoa pē ia kia Mami.”
Naʻe pehē ʻe Teti, “Ko ia! Te tau ngāue fēfē ko ha timí?”
Naʻe ʻi ai ha fakakaukau ʻa ʻĀmoni. “Fēfē kapau te u fokotuʻutuʻu mo Samuela e tēpilé? ʻE lava ke tufi e meʻavaʻingá ʻe he tamaiki tangata kehé.”
Naʻe pehē ʻe Teti, “Fakakaukau lelei ia!”
Ne vave pē maau ʻa e meʻatokoni efiafí. Naʻe kūnima ʻa ʻĀmoni ke lotu. Naʻe fiefia he ngāue fakataha hono fāmilí ko ha timi. Naʻá ne fakaʻamu ʻe lava heʻene timi ʻakapulú ʻo fai e meʻa tatau.
Tā fakatātā ʻa Mark Jarman