Fakakaungāmeʻa mei he Funga Māmaní
Ko Papulā Au mei Silei
ʻOku nofo ʻa e tokotaha naʻá ne faʻu ʻení ʻi ʻIutā, USA
¡Hola, amigos!*
ʻOku nofo ʻa Papulā ʻi Silei, ko ha fonua ʻi he matāfanga fakahihifo ʻo Saute ʻAmeliká. ʻOku lōloa pea lausiʻi hangē ha līpiné. ʻOku vela mo pakukā ha ngaahi ʻēlia ʻe niʻihi (hangē ko e Toafa ʻAtakamá), pea ʻuluʻakauʻia mo faʻa ʻuha e niʻihi (hangē ko ʻIsitā ʻAilení). ʻOku nofo ʻi he kolomuʻa ʻo Sileí, ko Sanitiako.
Ko au toko taha pē ʻoku Siasi ʻi heʻeku kalasi he akó. ʻOku ou maʻu ai e ngaahi faingamālie ke talanoa ki hoku kaungāmeʻá kau kia Sīsū Kalaisi mo e Tohi ʻa Molomoná. Naʻe kole mai hoku kaungāmeʻa ke akoʻi ange e founga ʻo e lotú. Ne u fai ia. Pea ne ma fakatou fai ha lotu ʻi he kai hoʻataá he akó.
ʻOku ou taʻu hiva pea ʻi ai mo hoku ongo tuongaʻane. ʻOku ou feinga ke u hoko ko ha tuofefine lahi lelei pea tokoni ki hono tokangaʻi kinauá pea vaʻinga mo kinaua. ʻOku ou saiʻia ʻi hono tokangaʻi e fānaú. ʻOku ou fie hoko ko ha faiako ʻi haʻaku tupu hake.
Ne u taʻu valu ʻi he 2013 pea papitaiso mo hilifakinima au ʻe heʻeku tamaí. Ne u fuʻu fiefia! Ko ha aʻusia makehe te u manatuʻi maʻu pē.
Ne mau fakafiefiaʻi ha ngaahi ʻaho mālōlō ʻi Silei. ʻAho 18 ʻo Sepitemá e ʻAho ʻo e Tauʻatāiná, pea ʻaho 19 ko e ʻAho ʻo e Kau Tau Maluʻi Fonuá. Lolotonga e ongo ʻaho ko ʻení, ne mau fai ʻemau tauʻolunga fakafonua ko e “La Cueca” pea kai ha meʻakai ifo ko e ʻemipanatasi (empanadas).
ʻI he fakaʻosinga ʻo e uiké, ne saiʻia hoku fāmilí ke lue mo fakaʻuli ʻi he 4WD ʻi he ʻotu moʻunga ofi ki homau ʻapí. Ne mau saiʻia foki ke ʻalu ki he matātahí.
Ne mau maʻu ha meʻatokoni Kilisimasi makehe—ko e temata ne fakapitoi ʻaki e tuna. ʻI Sileí, ʻoku haʻu ʻa Sanitā Kolosi ʻi he vaeuaʻanga mālie ʻo e pō kimuʻa he Kilisimasí. ʻOku mau faʻa ʻā kae ʻoua kuó ne haʻu!
Toʻomataʻú: tā fakatātā ʻo e kató ʻe Thomas S. Child