Kau Palōfita ʻo e Fuakava Motuʻá
Selemaia
“Ne moʻui ʻa Selemaia ʻi ha taimi mo ha feituʻu faingataʻa, ka ne tuku ʻe he ʻEikí ke ne “tomuʻa mamata ki ha kuonga ʻo e ʻamanaki leleí lolotonga hono tānaki fakataha ʻo ʻIsileli he ngaahi ʻaho kimui ní.’”1 —Linda K. Burton, palesiteni lahi ʻo e Fineʻofá
Faitā ʻo e takainga tohí ʻe dimdimich/iStock/Thinkstock; Selemaia, tā ʻe Walter Rane © IRI
Ko e foha au ʻo Hilikia, ko ha taulaʻeiki ne nofo ʻi ʻAnatoti ofi ki Selusalema. Lolotonga ʻeku kei tamasiʻí, “naʻe hoko kiate au ʻa e folofola ʻa [e ʻEikí] ʻo pehē,
“Naʻá ku ʻilo koe ʻi he heʻeki ai te u fakatupu koe ʻi he fatú; pea naʻá ku fakatapuʻi koe, pea tuʻutuʻuni koe, ko e palōfita ki he ngaahi puleʻangá, ʻi he teʻeki ai te ke haʻu mei he manavá.”
Ne u ongoʻi taʻe mateuteu ki he fatongiá ni, pea naʻá ku tali ange, “Vakai, ʻoku ʻikai te u faʻa lea: he ko e tamasiʻi au.”
Naʻe tali mai ʻe he ʻEikí, “ʻOua naʻá ke pehē, ko e tamasiʻi koe: ka ke ʻalu kiate kinautolu kotoa pē ʻoku ou fekau koe ki aí, pea ko ia te u fekau kiate koe ke ke lea ʻakí.
“Pea ʻoua naʻá ke manavahē ki honau matá: ʻoku ou ʻiate koe ke fakamoʻui koe. Pea toki “ala ki hoku ngutú” ʻa e ʻEikí ʻo fakalea ia.2
Naʻá ku kikite ʻi Selusalema ʻi ha taʻu ʻe 40, mei he 626 ki he 586 k.m., lolotonga e pule ʻa Sosaia, Sihoakimi, mo Setikiá.3 Ne u ʻi he kuonga tatau mo e palōfita ko Līhai ʻi he Tohi ʻa Molomoná. Ne ma fakatou fakamalaʻiaʻi e fai angahala ʻa e kakai ʻi Selusalemá pea kikiteʻi ʻa hono fakaʻauha ʻo e kolo lahi ko iá.4
Naʻe fekauʻi au ʻe he ʻEikí ke lekooti ʻa ʻeku ngaahi kikité ʻi ha “takainga tohi.”5 ʻI he fanongo ʻa e Tuʻi ko Sihoakimí ki he ngaahi kikité, naʻá ne tutu ʻa e takainga tohí. Naʻe fekauʻi au ʻe he ʻEikí ke toe hiki ʻa e ngaahi kikité pea tānaki atu ha ngaahi meʻa lahi ange.6
Naʻá ku fehangahangai hokohoko mo ha fakafepaki ʻi heʻeku malangaʻi e folofola ʻa e ʻEikí. Naʻe taaʻi au ʻe Pasuli ko e foha ʻo e fungani pulé ʻo tuku ki he fale fakapōpulá. Naʻe fie maʻu ʻe he kau fakatangá ke tamateʻi au koeʻuhí ko ʻeku malangá. Ko ha palōfita au ne ʻikai manakoa he naʻe faʻa lī ki ha ngaahi ʻana mo e fale fakapōpula. Ne u moʻui ʻi ha taimi ʻo e fuʻu faiangahala lahi moʻoni.7
Ka neongo ʻa e moʻui ʻi he lotolotonga ʻo e faingataʻá, ne fakaʻatā au ʻe he ʻEikí ke u sio ki hono tānaki fakataha e kau ʻIsilelí ʻi he ʻaho fakaʻosí, pea tohi ʻe he ʻEikí ʻEne fonó “ʻi honau lotó,” pea te Ne ʻomi ha “toko taha ʻi ha kolo, pea mo e toko ua ʻi ha faʻahinga” ki Saione.8
ʻI heʻeku hokohoko atu hono malanga ʻaki e folofola ʻa e ʻEikí—neongo e taimi faingataʻá—ne u ʻilo ʻoku maʻu ʻa e nongá ʻi he tukupā fakatāutaha ki he ongoongoleleí. Te tau aʻusia kotoa ʻa e ʻamanaki leleí lolotonga ʻa e faingataʻá mo e ʻahiʻahí ʻi heʻetau fakatupulaki ha feohi fakafoʻituitui mo e ʻEikí.