Fakafepaki ki Hoku Misioná
ʻOku nofo ʻa e tokotaha naʻá ne faʻú ʻi Manau, Palāsila.
Hili hono ʻinitaviu au ke ʻalu ʻo ngāue fakafaifekaú, naʻe pehē ʻe heʻeku palesiteni fakasiteikí, “ʻE hoko ha ngaahi meʻa ngali kehe ʻi hoʻo moʻuí ke feinga ke liliu hoʻo fakakaukaú.”
Tā fakatātā ʻa Greg Newbold
Naʻá ku kau ki he Siasí ʻi hoku taʻu 15, pea hili ha taʻu ʻe fā ne u fakahū ʻeku foomu kole ke ngāue fakafaifekaú. ʻI heʻeku ʻinitaviu mo e palesiteni fakasiteikí, naʻá ne fakahīkihikiʻi au ʻi he fili ke ngāue ko ha faifekau taimi kakato maʻá e ʻEikí. Pea naʻe lea ʻaki ʻe he kau taki ueʻi fakalaumālie ko iá ha meʻa ne nofoʻia ʻiate au: “Tokoua, ʻe hoko ha ngaahi meʻa ngali kehe mei he taimí ni ʻo fai atu ʻi hoʻo moʻuí ʻo feinga ke liliu hoʻo fakakaukau ki hoʻo fili ke ngāue maʻá e ʻEikí.”
Lolotonga ʻeku tatali ki hoku uiuiʻi ke ngāue fakafaifekaú, ne u akoako ngāue ai ʻi Xerox. Naʻe lava e ngāue ko ʻení ʻo ʻai ke u maʻu ha niʻihi ʻo e ngaahi meʻa te u fie maʻu ki he ngāue fakafaifekaú pea tokoni ki heʻeku faʻeé ʻi he ngaahi fakamole ʻi ʻapí. Naʻe lelei e ngaahi meʻá.
Meʻapango, naʻe kamata ke hoko e “ngaahi meʻa ngali kehé.” ʻUluakí, naʻe fakalaveaʻi ʻeku faʻeé peá ne mei mate mei hono laveá, ka naʻe fakaofo hono fakahaofi ia ʻe ha Tamai Hēvani ʻofa.
ʻI he taimi ko iá, ne u nofo mo e ongo tehina ʻeku faʻeé ʻi ha ʻapi nofo totongi. Ne mau moʻui pē ʻi heʻeku vahé pea mo ha kiʻi paʻanga ne maʻu ʻe heʻeku faʻeé koeʻuhí ko e mālōlō ʻeku tamaí ʻi he ngaahi taʻu kuohilí.
ʻE fehuʻi ʻe ha niʻihi, kau ai e kāingalotu ʻo e Siasí, “Te ke maʻu nai e lototoʻa ke tuku hoʻo faʻeé ka ke ʻalu ʻo ngāue fakafaifekau?” Ne kamata ke kiʻi puputuʻu hoku lotó ʻi he toutou fanongo ki he fehuʻi ko ʻení.
Naʻe ui mai ʻeku palesiteni fakasiteikí ʻi he ʻaho ʻe taha ʻo fakahā mai kuo maʻu hoku uiuiʻí pea kole mai ke u ʻalu ange ki hono ʻōfisí he efiafi ko iá ke ʻomai e sila ne u tatali lahi ki ai mei he hetikuota ʻo e Siasí. Ne u fakatou tailiili mo fiefia ʻi he ongoongó.
ʻI he ʻaho tatau, ne kole mai ʻe heʻeku pule ngāué ke talanoa mai kimuʻa he taimi kai hoʻataá. ʻI heʻeku hū ki hono ʻōfisí, ne talitali fiefia au peá ma talanoa ʻi ha ngaahi miniti kau ki heʻeku akó mo e meʻa ne u ako ʻi he kautahá. Pea ne lea ʻaki ʻe he tangata mālohi ʻi he ngāue ko ʻení ha meʻa ʻoku misi ki ai e kakai tokolahi ʻi he koló: “Kuó ke fai ha ngāue lelei ko ha tokotaha akoako, pea ʻoku mau fie fakangāueʻi koe pea ke ke ʻi heʻemau timí. Ko e hā hoʻo fakakaukaú?”
Ko e taha ʻeni ʻo e ngaahi fili faingataʻa taha ʻi heʻeku moʻuí. Naʻe hangē e lau sekoní ia ko ʻitānití. Ne hangē ʻoku ou lava ʻo fanongo ki he fehuʻi mai ʻa e kakaí pe te u liʻaki nai ʻeku faʻeé taʻe kau ki ai ʻeku tokoni fakapaʻangá pea ʻalu ki he malaʻe ʻo e ngāue fakafaifekaú.
Ka neongo iá, ne u manatuʻi e ngaahi meʻa ne u ako mei he folofolá mo e kau taki ʻo e Siasí, pea ʻi ha founga toputapu ʻaupito, naʻá ku ʻiloʻi fakapapau taʻeueʻia ʻoku finangalo ʻa e ʻOtuá ke u ngāue fakafaifekau taimi kakato ʻi Hono Siasí. ʻOku ou ʻilo te Ne tokangaʻi hoku fāmilí, pea te u lava ʻo falala kiate Ia, pea ʻe lelei e meʻa kotoa pē.
Naʻá ku fakamatalaʻi e tūkungá ki hoku pulé, pea ʻoku ou kei fakakaukau pē ki heʻene talí: “Naʻá ku pehē ko ha talavou poto koe, pea ko ʻeni kuó ke siʻaki ʻa e faingamālie ʻo hoʻo moʻuí.”
Naʻá ku fakamālō ange ʻaki e kotoa hoku lotó ki heʻene ʻofá, hili ha ʻaho ʻe 28 ne u lipooti ki he senitā akoʻanga faifekau ʻi Sao Paulo, Palāsilá.
Lolotonga ʻeku ngāue fakafaifekaú, naʻe tokangaʻi ʻe he ʻEikí e fie maʻu hoku fāmilí fakafou ʻi he kaungāmeʻa he Siasí pea ʻi ha ngaahi founga fakaofo. Naʻe toe moʻui lelei ʻeku faʻeé pea ne ʻi ai ha faingamālie ngāue maʻa hoku tuofāfiné mo ia foki.
ʻOku hoko ha “ngaahi meʻa ngali kehe” ʻi heʻeku fili ke ngāue maʻá e ʻEikí. Ka te u tānaki atu ʻi he loto fakatōkilalo ʻeku fakamoʻoni ki he ngaahi fakamoʻoni ʻe lauiafe kuo nau kau ʻi he ngāue tokoni ʻa e ʻOtuá ʻa ia kuo tokoniʻi lahi ai ʻeku moʻuí.