Pōpoaki ʻa e Kau Palesitenisī ʻUluakí
Ko e Lotu ʻi he Tuí
Fai ʻe Palesiteni Henry B. Eyring
Tokoni ʻUluaki ʻi he Kau Palesitenisī ʻUluakí
Ko e lotú ʻoku mahulu hake ia ʻi heʻetau fakataufolofola pē ki he ʻOtuá. Ko ha fetalanoaʻaki ia ʻi he vahaʻa ʻo e ʻOtuá mo ʻEne fānaú.
Ka ngāue ʻa e lotú ʻo hangē ko ia ʻoku totonu ke hokó, ʻoku tau fakahaaʻi leva e ongo hotau lotó ʻi ha ngaahi lea faingofua. ʻOku faʻa tali mai ʻe he Tamai Hēvaní ʻaki hano ʻomai ha ngaahi fakakaukau mo ha ongo. ʻOkú Ne fanongo maʻu pē ki he lotu fakamātoato ʻoku tau faí ʻi heʻetau lotu mo ha tukupā ke talangofua kiate Iá, ʻo tatau ai pē pe ko e hā ʻEne talí mo e taimi ʻoku fai mai aí.
Naʻe fai ʻe he ʻEikí e talaʻofa ko ʻení kiate kinautolu kotoa ʻoku nau lau mo lotua e Tohi ʻa Molomoná:
“Pea ʻi hoʻomou maʻu ʻa e ngaahi meʻá ni, ʻoku ou fie naʻinaʻi kiate kimoutolu ke mou kole ki he ʻOtua, ko e Tamai Taʻengatá, ʻi he huafa ʻo Kalaisí, pe ʻoku ʻikai ke moʻoni ʻa e ngaahi meʻá ni; pea kapau te mou kole ʻi he loto-fakamātoato, mo e loto-moʻoni, ʻo maʻu ʻa [e] tui kia Kalaisí, te ne fakahā ʻa hono moʻoní kiate kimoutolu, ʻi he mālohi ʻo e Laumālie Māʻoniʻoní.
“Pea ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē” (Molonai 10:4–5).
ʻOku pau e talaʻofa ko iá. Kuo ʻahiʻahiʻi pea fakapapauʻi ʻe ha lauimiliona e talaʻofa fakaʻofoʻofa ko ia fekauʻaki mo e lotú ʻaki hono maʻu ha tāpuaki kuó ne fakafonu ʻenau moʻuí ʻi he nēkeneka mo e fiefia ʻoku tolongá. ʻOku ʻaonga e talaʻofa ko iá ki heʻetau ngaahi lotu kotoa pē ke ʻiloʻi e fakakaukau mo e finangalo ʻo e ʻOtuá maʻatautolú. Te tau lava ʻo fakaʻaongaʻi ia ʻi heʻetau maʻu e akonaki mei ha tamaioʻeiki ʻa e ʻOtuá kuo fakamafaiʻi ke fakahinohinoʻi kitautolú. Hangē ko ʻení, te tau lava ke fakafalala ki ai ʻi heʻetau fakafanongo ki ha malanga ʻi he konifelenisi lahí. Te tau lava ke fai ia ʻi hano akoʻi kitautolu ʻe ha kau faifekau loto fakatōkilalo ne ui ʻe he ʻOtuá ʻo fakafou ʻi he palōfita moʻuí. ʻOku toe ʻaonga foki ki he akonaki ʻoku tau maʻu mei heʻetau pīsopé pe palesiteni fakakoló.
Ke ngāue e lotú ʻi heʻetau moʻuí, ʻoku faingofua ʻa e ngaahi laó. Kuo pau ke tau kole ke ʻiloʻi e meʻa ʻoku moʻoní ʻaki haʻatau lotu ki he Tamaí ʻi he huafa ʻo Sīsū Kalaisí. Kuo pau ke tau kole ʻi he loto fakamātoato, ʻa ia kuo pau ke tau maʻu ai ha taumuʻa totonu ke fai ha meʻa pē ʻe fie maʻu meiate kitautolu ʻi he tali ʻa e ʻOtuá. Pea kuo pau ke tupu ʻetau taumuʻa totonú mei heʻetau tui kia Sīsū Kalaisí.
Mahalo ʻe maʻu ʻe he fiefanongo ʻokú ne lau e Tohi ʻa Molomoná kimuʻa pea papitaiso mo hilifakinimá ha fakapapau ʻoku moʻoni e tohí pea mo ha fakamoʻoni ne liliu ia ʻe Siosefa Sāmita ʻi he mālohi ʻo e ʻOtuá. Hili e hilifakinima ko ha mēmipa ʻo e Siasí, te tau lava ke maʻu e Laumālie Māʻoniʻoní ko hotau takaua ke fakapapauʻi e ngaahi moʻoni kehé. Pea ʻi heʻetau lotu ʻi he tuí, te tau lava ʻo ʻilo ʻe fakamoʻoniʻi ʻe he Laumālie Māʻoniʻoní kiate kitautolu ko Sīsū ʻa e Kalaisí, ʻoku moʻui ʻa e ʻOtua ko e Tamaí, pea ʻoku Nau ʻofa kiate kitautolu mo e fānau kotoa ʻa e Tamai Hēvaní.
Ko e ʻuhinga ia ʻe taha ʻoku ʻi ai ai ha talaʻofa ʻi he Tohi ʻa Molomoná he te tau maʻu ʻa e manavaʻofá ʻi hotau lotó ʻi hono fakamoʻoniʻi mai ʻe he Laumālie Māʻoniʻoní ko Sīsū ʻa e Kalaisí: “Pea kapau ʻoku angamalū mo loto-fakatōkilalo ha tangata, ʻo ne fakamoʻoniʻi ʻi he mālohi ʻo e Laumālie Māʻoniʻoní ko Sīsū ʻa e Kalaisí, kuo pau ke ne maʻu ʻa e manavaʻofá” (Molonai 7:44).
ʻOku ʻi ai ha faingamālie lahi ke tupulaki fakalaumālie ʻi he Sāpate ʻaukai kotoa pē. ʻE lava ʻo tokoniʻi kitautolu ʻe he Sāpate ʻAukaí ke aʻusia e ngaahi aʻusia ʻa ʻAlamā mo e ngaahi foha ʻo Mosaiá, ne nau lotua mo ʻaukai ke ʻilo e moʻoni taʻengatá ke nau lava ʻo akoʻi e kau Leimaná ʻi he mālohi, mafai mo e ʻofa (vakai, ʻAlamā 17:3, 9).
ʻOku tau fakatahaʻi ʻi he Sāpate ʻAukaí ʻa e lotú mo e ʻaukaí. ʻOku tau foaki lahi ha foaki ʻaukai ʻoku feʻunga mo e fakamole ki ha houakai ʻe ua pe lahi ange ʻo ʻave ki he pīsopé pe palesiteni fakakoló ke faitāpuekina ʻaki e masivá. ʻOku tau fakakaukau leva ki he Fakamoʻuí mo kinautolu naʻá Ne mei finangalo ke tau tokoniʻí ʻaki hono tokoniʻi ʻenau ngaahi fie maʻu fakalaumālie mo fakatuʻasinó.
ʻOku ofi ange ʻetau ngaahi lotú mo hotau lotó ki he ngaahi lotu mo e finangalo ʻo e Fakamoʻuí ʻi heʻetau ʻaukai ke hoko ʻo angamalū, akoʻingofua mo angaʻofa angé. Pea hangē ko ia naʻá Ne faí, ʻoku tau lotua ke ʻilo e finangalo ʻo e Tamaí maʻatautolú pea ke fai ia.