Founga ʻo Hono Fai e Ngaahi Fehuʻi ʻOku Mahuʻingá

Fai ʻe David A. Edwards

Ngaahi Makasini ʻa e Siasí

ʻI hono fai e ngaahi fehuʻi totonú, ʻe tokoni ia ke fakaava e loto ʻo e kakaí ki ha fakamoʻoni ʻo e moʻoní.

ʻOkú ke maʻu ha ngaahi faingamālie ke akoʻi ʻi ha faʻahinga founga, tatau ai pē pe ko ha fepōtalanoaʻaki ʻi ha pasi, lēsoni ʻi he lotú, fakamatala ʻi he ʻinitanetí pe ko ha talanoa fakatāutaha fakamātoato mo ha kaungāmeʻa.

Ko e kiʻi tokoni ʻeni ki he akoʻí ʻi ha faʻahinga tūkunga pē: fai ha ngaahi fehuʻi.

ʻOku fakatau ʻa e ngaahi fehuʻi leleí ki ha ako lelei, pea ko e meʻa mālié, ko hono fai ʻo e fehuʻi leleí ko ha meʻa te ke lava ʻo ako, ʻahiʻahi fakahoko pe ako ke fai leleiʻi. Ko hono foungá ʻeni.

Fai e Ngaahi Fehuʻi ʻOku Mahuʻingá

Ko e ngaahi fehuʻi ʻaongá ʻa ē ʻoku nau ʻai ke ke fakakaukau mo ongoʻi moʻoní, ʻa ē ʻoku nau tataki koe ki he moʻoní, fakamoʻoní mo e liliú. Te nau lava ʻo akoʻi e ngaahi kaveinga kehekehe, ka ʻoku ʻi ai pē ha ngaahi meʻa ʻoku fai tatau: (1) ʻoku ʻikai ke nau fakangalingali pe hā ngali moʻoni (neongo ʻe lava ke hoko ko hano toe muimuiʻi e ngaahi fehuʻi moʻoní), (2) ʻoku ʻi ai ʻeneu kaunga ki heʻetau moʻui fakaʻahó, pea (3) ʻoku nau fakatukupaaʻi kitautolu ke foaki lahi ange ʻi ha tali pē ki he polokalama ne tomuʻa faʻú.

Manatuʻi e ʻUhinga ʻOku Tau Fai Ai ha Ngaahi Fehuʻi

ʻOku fakakau kitautolu ʻe he fehuʻi ko ʻení ʻaki hono fakahaaʻi mai ha konga ʻoku fie maʻu ke fakafonu ʻi hotau ʻatamaí. ʻE lava ke hoko ʻa e founga ko ʻení tautautefito ʻi hono fai e ngaahi fehuʻi ʻoku fakatupu fakakaukau fakatāutahá:

1. ʻOku kamata ke saiʻia e kakaí ʻi he meʻa ʻokú ke lea ʻakí.

2. ʻOku nau fakaʻaongaʻi ʻenau tauʻatāina ke filí ke fakakaukau mo fai ha tali.

3. ʻOku fakaʻatā ʻe hono fakaʻaongaʻi ko ʻeni ʻo e tauʻatāina ke filí e Laumālie Māʻoniʻoní ke fakamoʻoniʻi kiate kinautolu ʻa e moʻoní.¹

ʻI hoʻo fakakaukau ki he founga ko ʻení, te ke ongoʻi ʻo ʻilo e faʻahinga fehuʻi ke ʻeké mo ia ʻoku totonu ke taʻofí.

Hangē ko ʻení: ʻIkai ko e fehuʻi pē, “Ko e hā ʻoku mhuʻinga ai ʻa hono lau e folofolá?” Mahalo te ke fehuʻi, “ʻOku liliu fēfē hoʻo moʻuí ʻi hono ako e folofolá?”

Manatuʻi ʻOkú ke Akoʻi e Kakaí, ʻIkai ko e Lēsoní Pē

Kapau ʻokú ke ʻilo e kakai ʻokú ke akoʻí pea fakakaukau ki heʻenau ngaahi fie maʻú, te ke fili e ngaahi fehuʻi fakataumuʻa ke tokoniʻi kinautolú, kae ʻikai ke fakamahinoʻi pē ha ngaahi fakakaukau.

Hangē ko ʻení: ʻIkai ko e fehuʻi pē, “Ko e hā e ngaahi sitepu ʻo e fakatomalá?” mahalo te ke fehuʻi, “Te ke fakaleleiʻi fēfē ha meʻa ʻi hoʻo ʻilo kuó ke fai ha fehalaākí?”

Ako mo Fakakaukau Lahi

Ke teuteu ke akoʻi ʻa e ongoongoleleí, ako e folofolá mo e ngaahi akonaki ʻa e kau palōfita mo e kau ʻaposetolo ʻo onopōní, pea lotu ke ʻiate koe ʻa e Laumālie Māʻoniʻoní mo kinautolu ʻokú ke akoʻí (vakai, T&F 42:14; 50:21–22).

Kapau ʻokú ke fie fehuʻi ki he kakaí e ngaahi fehuʻi fakatupu fakakaukaú, ʻoku fie maʻu ke ke fai e fakakaukau tatau. Fakakaukauloto ki he meʻa ʻokú ke akó. Te ke fakatokangaʻi ko e meʻa ʻokú ne ʻai ke ke fakakaukau moʻoní ʻa e ngaahi fehuʻi ʻokú ke fehuʻi loto peé. Tokanga ki he ngaahi fehuʻi ʻoku fakatupu fakakaukau kiate koé. Ko e ngaahi fehuʻi ʻeni ʻoku nau fakatupu ha fakakaukau mo ha fakamoʻoni lahi ange, ko e ngaahi fehuʻi tatau te ke lava ʻo fai ʻi hoʻo tokoni ki he niʻihi kehé ke ako kau ki he ongoongoleleí.

Hangē ko ʻení: ʻIkai ke fehuʻi pē, “Te tau maʻu fēfē ʻa e ʻofa faka-Kalaisí?” mahalo te ke lava ʻo fehuʻi, “ʻOkú ke pehē ko e hā hono ʻuhinga e Molonai 7:48 ʻi heʻene pehē ke lotu ke maʻu e ʻofa faka-Kalaisí ʻʻaki ʻa e ivi kotoa ʻo e lotó’?”

Fakahoko Māmālie e Ngaahi Fehuʻi Loloto Angé

Taimi ʻe niʻihi ʻoku lelei taha ke fakahoko māmālie e ngaahi fehuʻi ʻoku nau fakatupu ha fakakaukau lahi angé pea fakakaukauloto kiate kitá, mahalo te ke fie maʻu ke fai ha fehuʻi ʻi he kamatá ʻoku faingofua ke tali pea muimuiʻi ʻaki ha ngaahi fehuʻi kehe ʻoku fakatau ki ha ngaahi tali faʻa fakakaukau. Ko e niʻihi ʻeni ʻo ha ngaahi sīpinga faingofua:

Fehuʻi Fakafeʻiloakí	Fehuʻi ki Hono Muimuiʻí
Naʻe taʻu fiha ʻa Siosefa Sāmita ʻi heʻene ʻalu ki he Vaoʻakau Tapú?	Ko e fē taimi kuó ke lotu ai ki he Tamai Hēvaní mo e faʻahinga holi moʻoni naʻe maʻu ʻe Siosefá?
ʻOkú ke tui nai ki he ʻOtuá?	Ko e hā ʻoku fai ʻe he ʻOtuá ʻi hoʻo moʻuí?
Ko e hā kuó ke fai kimuí ni ke tokoniʻi e niʻihi kehé?	ʻOku liliu fēfē hoʻo fakakaukau ki he ngāue tokoní ʻi hoʻo ʻilo ko e fānau kotoa kitautolu ʻa e ʻOtuá?

Kapau te ke fekumi ki he fakahinohino ʻa e Laumālie Māʻoniʻoní ʻi hoʻo fai ʻa e fehuʻi ko ʻení, mahalo ʻe lahi ange he taimí ni hoʻo fai e ngaahi fehuʻi totonú. He ʻikai te ke ʻilo. Mahalo te ne liliu ha moʻui ʻa ha taha.

Maʻuʻanga Fakamatalá

1. “Kuo pau ke ke fakaʻaongaʻi hoʻo tauʻatāina ke filí ke fakamafaiʻi ʻaki e Laumālié ke ne akoʻi koe” (Richard G. Scott, “Ke Maʻu Ha Tataki Fakalaumālie,” Liahona, Nōvema 2009, 8).

Ngaahi Lēsoni ʻo e Sāpaté

Tefito ʻo e Māhina Ní: Hoko ʻo Anga Faka-Kalaisi Lahi Ange

Tokoni ki Hono Fai ʻo e Ngaahi Fehuʻí

• Tatali ki he ngaahi talí.

• Fakaʻaongaʻi ʻa e ngaahi fehuʻi vakaiʻí ke kamataʻi ha fakakaukau lahi ange.

• Fakaʻehiʻehi mei he ngaahi fehuʻi ʻoku fakatupu kē pe fakaʻaiʻai ʻa e fakakikihí.

• Fai he taimi ʻe niʻihi e ngaahi fehuʻi ʻoku nau fakatupu e fakakaukau fakalongolongó.

Ki ha tokoni lahi ange, vakai, ʻOku ʻIkai ha Ui ʻe Mahuʻinga Ange ʻi he Faiakó: Ko ha Maʻuʻanga Fakahinohino ki hono Akoʻi ʻo e Ongoongoleleí (2000), 76–77.

Kau ʻi he Fepōtalanoaʻakí

Ngaahi Meʻa ke Fakalauloto ki ai ʻi he Sāpaté

• Kuo fai atu nai ʻe ha taha ha fehuʻi ʻokú ne ʻai koe ke ke ʻilo lahi ange ki he ongoongoleleí pe liliu hoʻo moʻuí ʻi ha founga?

• Naʻe fakaʻaongaʻi fēfē ʻe he Fakamoʻuí ʻa e ngaahi fehuʻí ʻi Heʻene faiakó?

Ngaahi Meʻa Te ke Lava ke Faí

• ʻI hoʻo ako e folofolá he uike ní, hiki ha lisi ʻo ha ngaahi fehuʻi ʻokú ke fakakaukau ki ai.

• ʻI he lotú, fai ha fehuʻi ko ha konga ʻo e fealēleaʻaki fakakalasí.

Tā fakatātaaʻi ʻo e ngaahi nāunaú ʻe Sergey Markov/Hemera/Thinkstock; tā fakatātaaʻi ʻo e ʻulú ʻe he johavel/iStock/Thinkstock

Tā fakatātaaʻi ʻo e nimá ʻe he ilyast/iStock/Thinkstock