Hanga Hake

Fai ʻe ʻEletā Adrián Ochoa

ʻO e Kau Fitungofulú

Mei he “Hanga Hake,” Liahona, Nōvema 2013, 102.

“Ko ia mou leʻo, pea lotu maʻu ai pē” (Luke 21:36).

ʻI hoku taʻu valú, naʻe fekau mai au mo hoku kāinga ʻe toko ua ke ō ʻo fakatau mei ha kolo ofi mai pē. ʻI heʻeku manatu ki aí, ʻoku ou ofo ʻi he lahi ʻo e loto falala mai ʻa ʻeku kuifefiné, mehikitangá mo hono malí (uncle) kiate kimautolú. Naʻe maama pea tafitonga e langi pongipongí ʻi heʻemau ʻalu atu ʻi heʻemau fanga hoosi ʻe toko tolú.

ʻI he vaeuaʻangamālie ʻo e toafá, ne mau fie hifo mei he hōsí ʻo mapu. Ne fuʻu fakalata ʻemau vaʻingá kae ʻikai ke mau fakatokangaʻi ʻa e ʻao kaupoʻuli ʻi he langí. ʻI he taimi ne mau fakatokangaʻi ai ʻe hoko ha matangí, naʻe ʻikai ha taimi ke mau heka ai ki heʻemau fanga hōsí. Naʻe ʻuha lahi mo ʻuha ʻaisi pea ko e meʻa pē ne mau lava ʻo faí ko hono toʻo e nofoʻá pea fakamalumalu he kafu ne ʻi he nofoʻá. Pea ne hola ʻemau fanga hōsí.

ʻIkai ha hoosi, viviku pea momoko, ne mau kamata lue leva ʻi he vave tahá ki ha kolo ofi mai. Ne tuʻuapō pea mau toki ʻilo ha ʻapi mo tukituki ʻi he matapaá. Ne holo mātuʻu kimautolu ʻe he fāmili ko iá, fafangaʻi kimautolu ʻaki ha polito piini ifo, pea fakamohe kimautolu ʻi ha loki ne faliki makamaka pē.

Ne mau ʻā hake ʻi he pongipongí ko ha ʻaho laʻā pea fakaʻofoʻofa e langí. Ne tukituki mai ha tangata he matapaá ko hono kumi e tamaiki tangata mole ʻe toko tolu. He ʻikai pē ngalo e meʻa ne mau mātā ʻi heʻemau foki ki ʻapí—ko ha kakai tokolahi ne nau fekumi kiate kimautolu he poó kakato. Naʻe tuʻu ʻi muʻa ʻeku kui fefine ʻofeiná mo hoku mehikitangá mo hono malí. Ne nau fekita mai kiate kimautolu mo tangi, pea fiefia ko e maʻu ʻenau fānau molé.

ʻOku tokaimaʻananga mai ʻetau Tamai Hēvaní. ʻOkú Ne tali loto vēkeveke mai ke tau foki ange ki ʻapi. ʻOku ʻi ai ha ngaahi fakaʻilonga ʻo ha matangi mālohi fakalaumālie ʻi hotau lotolotongá. Tuku muʻa ke tau sio hake pea teuteuʻi kitautolu ʻi hono fakamālohia ʻetau fakamoʻoní he ʻaho kotoa.

Tā fakatātā ʻa Shawna Tenney