Pōpoaki ʻa e Faiako ʻAʻahí
Ko e Misiona Fakalangi ʻo Sīsū Kalaisí: Mā ʻo e Moʻuí
Ako ʻi he faʻa lotu ʻa e fakamatala ko ʻení pea feinga ke ke ʻilo e meʻa ke vahevahé. ʻE fakatupulaki fēfē ʻe he mahino ʻokú ke maʻu ki he moʻui mo e misiona ʻo e Fakamoʻuí hoʻo tui kiate Iá mo tāpuekina ai kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Toʻo mei he In Remembrance of Me, tā ʻe Walter Rane
Naʻe folofola ʻa Sīsū, “Ko au ko e mā moʻui kuo ʻalu hifo mei he langí: kapau ʻe kai ʻe ha tangata ʻa e maá ni, ʻe moʻui taʻe ngata ia” (Sione 6:51). Naʻe pehē ʻe ʻEletā D. Toti Kulisitofasoni, “ʻOku hanga ʻe Sīsū ʻo akoʻi mai kitautolu ko ʻEne kau ākongá, ʻoku totonu ke tau fekumi ki he ʻOtuá he ʻaho kotoa ke maʻu ha meʻakai—ha tokoni mo ha meʻa ke tau moʻui ai—ʻa ia ʻoku tau fie maʻu he ʻaho ko iá. Ko e fakaafe ko ia ʻa e ʻEikí … ʻoku hā ai ha ʻOtua ʻofa, ʻokú Ne ʻafioʻi ʻa e meʻa siʻisiʻí, mo e ngaahi fie maʻu fakaʻaho ʻEne fānaú pea vēkeveke ke tokoniʻi tahataha kinautolú. ʻOkú Ne talamai te tau lava ke kole ʻi he tuí ki he Tokotaha ko iá, ʻʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate iaʻ (Sēmisi 1:5).”1 ʻI he mahino kiate kitautolu ʻe foaki mai ʻe Sīsū Kalaisi ʻetau ngaahi fie maʻú, te tau tafoki kiate Ia ki heʻetau maʻuʻanga tokoni fakalaumālié.
ʻOku fakaafeʻi kitautolu ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá “ke kau fakataha ʻi he fononga ʻo e ngaahi fuofua kau ākonga ʻa Kalaisí ne nau fakaʻamua e mā ʻo e moʻuí—ko kinautolu naʻe ʻikai tafoki ka naʻe haʻu kiate Iá, ʻo nofo mo Iá, pea ʻilo naʻe ʻikai ha toe founga ke nau maʻu ai e malú mo e fakamoʻuí.”2
Ngaahi Potufolofola Kehé
Mei he Folofolá
Naʻe akonaki ʻa Sīsū Kalaisi ki ha fuʻu kakai ʻe toko 4,000 tupu. Hili ha ʻaho ʻe tolu, naʻá Ne folofola ki Heʻene kau ākongá: ʻoku ou ʻofa mamahi ki he kakaí, koeʻuhí … ʻoku ʻikai haʻanau meʻa ke kai:
“Pea kapau te u fekau ke nau ʻalu fiekaia ki honau ngaahi falé, te nau pongia ʻi he halá. …
”Pea peheange ʻene kau ākongá kiate ia, ʻE maʻu mei fē ʻe ha taha ʻa e mā ke fakamākona ʻaki ʻa kinautolú ni ʻi heni ʻi he toafá?
“Pea fehuʻi [ʻe Sīsū] kiate kinautolu, ʻOku fiha hoʻomou foʻi maá? Pea nau pehē, ʻOku fitu.”
Pea “toʻo [ʻe Kalaisi] ʻa e foʻi mā ʻe fitú, ʻo ne fakafetaʻi, mo tofitofi, pea ʻange ki heʻene kau ākonga ke tufaki; …
“Pea naʻa nau maʻu mo e ngaahi ika iiki: pea [naʻá] ne tāpuaki mo fekau ke tufaki foki ia.
“Pea naʻa nau kai, ʻo mākona: pea nau tānaki ʻa e toenga kaí ko e kato ʻe fitu.” (Vakai, Maʻake 8:1–9.)