Ngaahi tohi mei he Kui-Fefine ko Uitoló

ʻEletā Richard G. Scott

ʻO e Kōlomu ʻo e Kau ʻAposetolo ʻe Toko Hongofulu Mā Uá

ʻI he kei siʻi ʻa ʻEletā Lisiate G. Sikotí, naʻe ʻikai mēmipa ʻene tamaí ʻi he Siasí. Naʻe kau ʻene faʻeé ki he Siasí, ka naʻe ʻikai ke ne faʻa ʻalu ki he lotú. ʻI he taʻu valu ʻa Lisiaté, naʻe ʻikai ke papitaiso ia. Pea naʻe haʻu leva ʻene kui-fefine ko Uitoló ʻo ʻeva.

Ko ha faʻifaʻitakiʻanga lelei ʻaupito ʻa e kui-fefine ko Uitoló. Naʻá ne tokoniʻi ʻa Lisiate mo hono ngaahi tokouá ke nau ako e mahuʻinga ko ia ke papitaiso mo ʻalu ki he lotú. Ne ʻikai fuoloa kuo papitaiso ʻa Lisiate mo hono taʻoketé.

Ko e taimi kotoa pē naʻe lea ai ʻa Lisiate ʻi he lotú, ʻe tā telefoni ki heʻene Kui-Fefine ko Uitoló ke ʻomi ʻene ngaahi fakakaukaú. Taimi siʻi pē te ne maʻu ha tohi ʻi he meilí mo ha lea naʻe tohi ʻe heʻene kui fefiné maʻana. ʻI heʻene kiʻi matuʻotuʻa angé, te ne ʻomai pē ha fokotuʻutuʻu mo e ngaahi fakakaukau ke tokoni ki ai ke faʻu ʻene lea pē ʻaʻana. ʻOku ʻiloʻi maʻu pē ʻe Lisiate ʻoku ʻofa ʻene kui Fefine ko Uitoló ʻiate ia mo e ongoongoleleí.

Naʻe fetaulaki ʻa Lisiate mo ha toe faʻifaʻitakiʻanga lelei ʻe taha ʻi he kolisí. Ko hono hingoá ko Sēniné. ʻI ha pō ʻe taha naʻá ne talaange ai kiate ia, “Ko e taimi te u mali aí, ʻe fakahoko ia mo ha taha ʻosi ngāue fakafaifekau, ʻi he temipalé.” Naʻe fakakaukau ʻa Lisiate ke ne lotu fekauʻaki mo e ʻalu ʻo ngāue fakafaifekaú. Taimi nounou pē naʻá na fakatou ʻalu mo Sēnine ʻo ngāue fakafaifekau. Hili ʻena foki ki ʻapí, naʻe mali ʻa Lisiate mo Sēnine ʻi he Temipale Manitai ʻIutaá.