Ko e Meʻa ʻOku Tau Tui Ki Aí
Ngaahi Tāpuaki Fakapēteliaké: Ko e Tataki Fakalaumālie ki Hoʻo Moʻuí
ʻOku ʻi ai ha faʻahinga ʻe ua ʻo e kau pēteliaké ʻi he Siasí: (1) ko e ngaahi tamaí mo e (2) kau tangata ʻoku fakanofo ki he lakanga ʻo e pēteliaké ʻi he Lakanga Taulaʻeiki Faka-Melekisētekí. ʻE lava ke foaki ʻe he ngaahi tamai ʻoku nau maʻu ʻa e Lakanga Taulaʻeiki Faka-Melekisētekí ha tāpuaki ki he kau mēmipa honau fāmilí, ka ʻoku ʻikai lekooti ʻe he Siasí ʻa e ngaahi tāpuakí ni, neongo ʻe lava ke lekooti ia ʻe he fāmilí. ʻI he tafaʻaki ʻe tahá, ʻoku lekooti ʻe he Siasí ʻa e ngaahi tāpuaki ʻoku foaki ki he kau mēmipa moʻui taau ʻo e Siasí ʻe ha pēteliake kuo fakanofo; ʻoku ui ʻa e ngaahi tāpuaki ko ʻení ko e “tāpuaki fakapēteliaké.”
ʻOku foaki ʻe he kau pēteliaké ʻa e ngaahi tāpuakí ʻo fakatatau ki he ueʻi ʻa e Laumālie Māʻoniʻoní. ʻE lava ke maʻu ʻi ho tāpuaki fakapēteliaké ha ngaahi fakatokanga mo e ngaahi talaʻofa, pea ʻe ala fakahā ai ʻa e meʻa ʻoku ʻamanaki mai ʻe he ʻEikí meiate koé pea mo e meʻa te ke malavá. ʻE fakahoko e ngaahi tāpuaki kuo talaʻofa maí ʻi he taimi ʻa e ʻEikí—ʻo fakatatau ki hoʻo faivelengá. Te ke toki maʻu pē ʻa e ngaahi tāpuaki kuo talaʻofaʻaki maí ʻi hoʻo muimui ki he ngaahi akonakí. ʻE lava ke toki hoko ha niʻihi ʻo e ngaahi tāpuakí ʻi he moʻui ka hoko maí. He ʻikai ʻoatu ʻi ho tāpuaki fakapēteliaké ʻa e fakaikiiki kakato ʻo hoʻo moʻuí. Hangē ko ʻení, kapau ʻoku ʻikai ʻasi ai ha ngāue fakafaifekau taimi kakato pe ko e mali temipalé, ʻoku ʻikai ʻuhinga ia he ʻikai te ke maʻu ʻa e faingamālie ko iá.
ʻE fakahā foki ʻi hoʻo tāpuaki fakapēteliaké hoʻo hako ʻi he fale ʻo ʻIsilelí—ʻe lava ke ke haʻu mei he hako ʻo ʻIfalemí, Siutá, Manasé, pe ko e taha ʻo e ngaahi hako kehé.1 ʻOku mahuʻinga ʻa e hako ko ʻení koeʻuhí ko e fuakava faka-ʻĒpalahamé, ʻa ia ʻoku kau ai ʻa e talaʻofa ʻa e ʻEikí kia ʻĒpalahame ʻo fakafou ʻi hono hakó “ʻe tāpuekina ʻa e ngaahi faʻahinga kotoa pē ʻo e māmaní, ʻio ʻaki ʻa e ngaahi tāpuaki ʻo e Ongoongoleleí.” (ʻĒpalahame 2:11). ʻOku kau kotoa ʻa e kau mēmipa ʻo e Siasí ki he fale ʻo ʻIsilelí, tatau ai pē pe ko e tupuʻanga tonu pe ohi fakalaumālie. ʻI heʻene peheé, ʻoku ʻi ai leva hotau fatongia ʻi hono tufaki ʻo e ongoongoleleí ki he māmaní.
Talanoa mo hoʻo pīsopé pe palesiteni fakakoló, ʻa ia ʻe lava ke ne ʻoatu haʻo fakaongoongolelei ke maʻu ha tāpuaki fakapēteliake. Te ke lava ʻo fakalahi ʻa e aʻusia ʻo e maʻu ha tāpuakí kapau te ke ʻaukai mo lotu kimuʻa. ʻE lava ke kau atu ha mēmipa ho fāmili ofí ʻi he taimi ʻe maʻu ai ho tāpuaki fakapēteliaké.
Hili hono maʻu ho tāpuakí, ʻe paaki ha tatau ʻo e tāpuakí ʻo ʻave atu kiate koe. ʻOua ʻe fakahāhāholo ia; ʻoku fakatāutaha ʻa e akonakí mo e ngaahi talaʻofá kiate koe pea ʻoku ʻikai totonu ke vahevahe noaʻia ia mo e niʻihi kehé. Ako maʻu pē ia; te ne ʻoatu ha fakahinohino, fakafiemālie, mo ha maluʻi.