Kae ʻOua ke Tau Toe Feʻiloaki
Ko e ʻOfa Moʻoní
Mei he “Ko e Fekau ʻOku Lahí,” Liahona, Nōv. 2007, 28–29.
ʻOku tataki kitautolu ʻe he ʻofá ki he nāunau mo e ngeia ʻo e moʻui taʻengatá.
Ko e ʻofá ko e kamataʻanga, loto-mālie, mo e ngataʻanga ʻo e hala ʻo e tuʻunga fakaākongá. ʻOkú ne fakafiemālieʻi, akonakiʻi, faitoʻo, mo fakanonga. ʻOkú ne tataki kitautolu ʻi he ngaahi teleʻa ʻo e fakapoʻulí pea mo e veili ʻo e maté. ʻI hono fakaʻosingá, ʻoku tataki kitautolu ʻe he ʻofá ki he nāunau mo e ngeia ʻo e moʻui taʻengatá.
Kiate au, kuo fakahaaʻi maʻu pē ʻe he Palōfita ko Siosefa Sāmitá ʻa e ʻofa haohaoa ʻa Kalaisí. ʻOku fehuʻi ʻe he tokolahi pe ko e hā ʻoku tokolahi ai hono kau muimuí peá ne tauhi kinautolú. Ko ʻene talí: “Koeʻuhí he naʻá ku maʻu ʻa e tefitoʻi moʻoni ʻo e ʻofá.”1
ʻOku fakahoko ʻa e talanoa ʻo ha kiʻi tamasiʻi taʻu 14 ʻa ia naʻe haʻu ki Nāvū ʻo fekumi ki hono tokouá, ʻa ia naʻe nofo ofi ai. Ne aʻu atu ʻa e kiʻi tamasiʻí ʻi he faʻahitaʻu momokó ne ʻikai ha paʻanga mo ha ngaahi kaungāmeʻa. ʻI heʻene fehuʻi fekauʻaki mo hono tokouá, naʻe ʻave ʻa e tamasiʻí ki ha fuʻu fale lahi naʻe hangē ha hōtele. Naʻá ne fetaulaki ai mo ha tangata ʻa ia naʻá ne pehē ange, “Hū mai foha, te mau tokangaʻi koe.”
Naʻe tali ia ʻe he tamasiʻí pea naʻe ʻomi ia ki he falé, ʻa ia naʻe fafangaʻi, fakamāfanaʻi, pea foaki mo ha mohenga ke ne mohe ai.
ʻI he ʻaho hono hokó naʻe momoko ʻaupito, ka neongo iá, naʻe teuteu e kiʻi tamasiʻí ke ne lue ʻi he maile ʻe valu ki he feituʻu naʻe nofo ai.
ʻI he mamata ki ai e tangata ʻo e falé, naʻá ne talaange ki he kiʻi tamasiʻí ke nofo ʻi ha taimi nounou. Naʻá ne pehē ʻoku ʻi ai ha timi ʻoku nau mei aʻu mai pea ʻe lava ke heka foki mo kinautolu.
ʻI he talaange ʻe he kiʻi tamasiʻí naʻe ʻikai ke ʻi ai haʻane paʻangá, naʻe talaange ʻe he tangatá ke ʻoua ʻe hohaʻa ki ai, he te ne tokangaʻi ia.
Naʻe toki ʻilo ʻe he kiʻi tamasiʻí kimui ko e tangata ʻo e falé ko Siosefa Sāmita, ko e palōfita Māmonga. Naʻe manatuʻi ʻe he kiʻi tamasiʻi ko ʻení ʻa e ngaahi ngāue ʻofa faka-Kalaisi ko ʻení ʻi he toenga ʻo ʻene moʻuí.2
ʻI ha pōpoaki ʻo e Kuaea Tāpanekale Māmongá ʻi he Hivá mo e Folofolá, naʻe vahevahe ha talanoa kau ki ha tangata toulekeleka mo ha fefine naʻá na mali ʻi ha ngaahi taʻu lahi. Koeʻuhí he naʻe mole māmālie e vakai ʻa e uaifí, naʻe ʻikai toe lava ke ne tokangaʻi ia hangē ko ia kuó ne fai ʻi he ngaahi taʻu lahi. Naʻe kamata ke valivali ʻe he husepānití hono ngeʻesi nimá maʻana, ʻo ʻikai toe fakakounaʻi.
Faitaaʻi ʻe Jupiterimages/liquidlibrary/Thinkstock
“Naʻá ne ʻiloʻi te ne lava ʻo sio ki hono ngeʻesi nimá ʻi he taimi te ne sio ofi ai ki aí, pea te ne malimali ai. Naʻá ne saiʻia ke sio ki ai ʻoku fiefia, ko ia naʻá ne valivali maʻu pē hono ngeʻesi nimá ʻo laka hake ʻi he taʻu ʻe nima kimuʻa peá ne toki mālōlō.”3
Ko ha sīpinga ia ʻo e ʻofa haohaoa ʻa Kalaisí. Ko e taimi ʻe niʻihi ʻoku ʻikai maʻu e ʻofa maʻongoʻonga tahá ʻi he ngaahi meʻa ʻoku fakamanatu ʻe he kau fatu taʻangá mo e kau punaké. ʻOku faʻa hā ʻa e ʻofa lahi tahá ʻi he ngaahi ngāue angaʻofa mo tokanga faingofua ʻoku tau fakahoko ki he niʻihi ʻoku tau feohi ʻi he hala ʻo e moʻuí.
ʻOku tolonga ʻo taʻengata ʻa e ʻofa moʻoní. ʻOku faʻa kātaki mo faʻa fakamolemole taʻengata ia. ʻOku tui, ʻamanaki lelei, pea kātakiʻi ʻa e ngaahi meʻa kotoa pē. Ko e ʻofa ia ʻoku maʻu ʻe heʻetau Tamai Hēvaní kiate kitautolú.