Ne Fakaʻau ke u ʻIloʻi ʻa e Fakamoʻuí

Brian Knox, ʻAlesona, USA

ʻI hoku ʻuluaki taʻu ʻi he akoʻanga māʻolungá, ne u fai ai ha tukupā ke lau ʻa e Fuakava Foʻoú mei he kamataʻangá ki heʻene ʻosi. ʻI he tuku ʻa e akó mo e fakaʻosinga ʻo e uiké, naʻá ku ʻalu ki he fungavaka ki ʻolunga homau falé ʻo lau ʻa e folofola ʻa e Fakamoʻuí mo ʻEne ngaahi maná mo ʻEne moʻuí.

Neongo ne ʻikai faʻa mahino ki heʻeku fakakaukau kei siʻí ʻa e lea ʻo e Tohi Tapú, ka naʻe fakaʻau ke u ʻiloʻi ʻa Sīsū Kalaisi. Naʻá ku ʻiloʻi ko e ʻAlo Ia ʻo e ʻOtuá, pea naʻe fekauʻi mai Ia ke ne fakalelei maʻa ʻetau ngaahi angahalá. Naʻá ku ʻiloʻi naʻá Ne ʻaʻeva, lea, pea faitapuekina e kakai angamaheni, mo vaivai—hangē ko aú.

Naʻá ku faʻa puputuʻu he taimi ʻe niʻihi lolotonga ʻeku lau ʻa e ngaahi konga faingataʻa ʻi he ngaahi ʻipiseli ʻa Paulá mo e tohi ʻa Sione ʻi he tohi Fakahaá, ka naʻá ku ongoʻi maʻu pē ʻa hono moʻoni ʻo ʻenau ngaahi akonakí. Naʻá ku fakatokangaʻi naʻe tokoniʻi au ʻe he lau folofolá ʻi he ngaahi ʻaho faingataʻa he akó mo ʻomi ha tataki ʻi hono fakahoko e ngaahi fili mahuʻingá.

Hili ha ngaahi taʻu lahi, ʻi heʻeku teuteu ki he ngāue fakafaifekaú, ne u fehuʻia ai ʻeku ngaahi taumuʻa ke ngāué. Naʻá ku ongoʻi naʻe ʻikai ʻi ai ha meʻa mātuʻaki makehe fekauʻaki mo au pe ko ʻeku fakamoʻoní. Naʻá ku fakakaukau pe ko ʻeku teuteu ki he ngāue fakafaifekaú ʻoku makatuʻunga ia ʻi he fatongia ki heʻeku ongomātuʻá mo ʻeku kau takí, ʻa ia naʻa nau ngāue mālohi ke akoʻi kiate au ʻa e ongoongoleleí. Naʻe aʻu ʻou fakakaukau mahalo ʻoku lelei ange e ʻEikí ia ʻi he ʻikai ke u ngāue fakafaifekaú.

ʻI he ʻaho ʻe taha lolotonga ʻeku lau e Tohi ʻa Molomoná, naʻe ongo ʻa e ngaahi lea ʻa ʻApinetaí ki hoku lotó:

“ʻE pehē ʻa hono taki atu, ʻo kalusefai, mo tāmateʻi. …

“Pea naʻe pehē hono maumauʻi ʻe he ʻOtuá ʻa e ngaahi haʻi ʻo e maté, kuó ne ikuna ʻa e maté. …

“Pea ko ʻeni ʻoku ou pehē kiate kimoutolu, ko hai ha taha te ne fakamatala ki hono tupuʻangá?” (Mōsaia 15:7-8, 10; toki tānaki atu hono fakamamafaʻí).

Naʻá ku toutou lau ʻa e laine fakaʻosi ko iá, mo fifili pe naʻe ʻi ai pē kimuʻa. ʻI hono lau ʻo e Fuakava Foʻoú, naʻá ku ako ki he moʻui ʻa e Fakamoʻuí pea mo e toʻu tangata ʻo kinautolu ne fononga fakataha mo Iá. Ka ko e niʻihi ʻo e toʻu tangata ʻa e Fakamoʻuí he ʻikai lava ke nau ʻaʻahi ki he kakaí he ʻahó ni ke akoʻi ʻa ʻEne ʻofá, ʻEne Fakaleleí, mo Hono Siasí. Ko ia te u fakatonuhiaʻi fēfē ʻa e ʻikai vahevahe ʻeku fakamoʻoni kiate Iá?

Naʻe finangalo e ʻEikí ke u vahevahe ʻa e ongoongo fakafiefia ʻo e ongoongoleleí kuó u maʻú. Naʻá ku ʻiloʻi ʻoku moʻoni ʻa e ongoongoleleí, pea naʻá ku fie maʻu ke vahevahe ʻa e ngaahi moʻoni ko ia ne u ako lolotonga ʻeku lau e folofolá.

Ne ʻikai fuoloa mei he aʻusia ko ʻení, naʻá ku hū leva ʻo ngāue fakafaifekau. Te u pehē ʻi he ʻahó ni ne makatuʻunga ʻa ʻeku holi ke ngāué ʻi he meʻa naʻá ku ako kei siʻi fekauʻaki mo e Fakamoʻuí ʻi hono lau ʻo e folofolá.