Pōpoaki ʻa e Faiako ʻAʻahí
Ko e Ngaahi ʻUlungaanga ʻo Sīsū Kalaisí: ʻIkai Haʻane Angahala
Ako ʻi he faʻa lotu ʻa e fakamatala ko ʻení pea fekumi ke ʻiloʻi e meʻa ke vahevahé. ʻE fakatupulaki fēfē ʻe he mahino ki he moʻui mo e ngaahi fatongia ʻo e Fakamoʻuí hoʻo tui kiate Iá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Ko hotau Fakamoʻuí pē, ʻa Sīsū Kalaisi, naʻe malava ke Ne fakahoko ha fakalelei maʻá e faʻahinga ʻo e tangatá. Naʻe pehē ʻe Palesiteni Tieta F. ʻUkitofa, Tokoni Ua ʻi he Kau Palesitenisī ʻUluakí, “Naʻe finangalo lelei ʻa Sīsū Kalaisi, ko e Lami taʻe-hano-melé, ke hilifaki ʻEne moʻuí ki he ʻesi-feilaulaú peá Ne fuesia e totongi ʻo ʻetau ngaahi angahalá.”1 ʻE lava ke tokoniʻi kitautolu ʻe he mahino ko ia naʻe ʻikai ha angahala ʻa Sīsū Kalaisí ke fakatupulaki ʻetau tui kiate Iá pea feinga ke tauhi ʻene ngaahi fekaú, fakatomala, pea hoko ʻo haohaoa.
Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko Sīsuú … naʻe sino kakano mo laumālie, ka naʻe ʻikai te Ne tukulolo ki he ʻahiʻahí (vakai, Mōsaia 15:5).” “Te tau lava ʻo tafoki kiate Ia … koeʻuhí he ʻoku mahino kiate Ia. ʻOku mahino kiate Ia ʻa e faingataʻá, pea toe mahino foki mo e founga ke ʻikunaʻi ʻakí. …
“… ʻE lava ke tāmateʻi ʻe he mālohi ʻo ʻEne Fakaleleí ʻa e nunuʻa ʻo e angahala ʻiate kitautolú. ʻI heʻetau fakatomalá, ʻoku fakatonuhiaʻi mo fakamaʻa kitautolu ʻe Heʻene fakalelei ʻaloʻofá (vakai, 3 Nīfai 27:16–20). ʻOku hangē ia naʻe ʻikai ke tau moʻulaloá, ʻo hangē kapau ne ʻikai ke tau tukulolo ki he ʻahiʻahí.
“ʻI heʻetau feinga ʻi he ʻaho ki he ʻaho mo e uike ki he uike ke muimui ʻi he founga ʻa Kalaisí, ʻoku ʻiloʻi ʻe hotau laumālié ʻa hono mahuʻingá, mole ai e fefaʻuhi ʻi he lotó, pea ngata ʻa e ngaahi ʻahiʻahí.” 2
Ngaahi Potufolofola Kehé
Mei he Folofolá
Naʻe totongi ʻe he Fakamoʻuí ʻa e mamafa ʻo ʻetau ngaahi angahalá ʻo fakafou ʻi Hono ʻAloʻi fakalangí, ʻEne moʻui taʻe-hano-melé, ʻEne mamahi mo tafe Hono taʻataʻá ʻi he Ngoue ko Ketisemaní, ʻEne pekia ʻi he kolosí pea mo ʻEne Toetuʻu mei he fonualotó. ʻE lava ke tau toe hoko ʻo maʻa ʻi heʻetau fakatomala mei heʻetau ngaahi angahalá, ʻo fakafou ʻi he Fakalelei ʻa Sīsū Kalaisí.
Naʻe akoʻi ʻe he Tuʻi ko Penisimaní hono kakaí kau ki he Fakalelei ʻa Sīsū Kalaisí hili iá peá ne fehuʻi kiate kinautolu pe naʻa nau tui ki heʻene ngaahi leá. “Naʻa nau kaila kotoa ʻi he leʻo pē taha, ʻo pehē: … kuo fakatupu [ʻe he Laumālié] … ha fuʻu liliu lahi ʻi loto ʻiate kimautolu, pe ʻi homau lotó, ʻo ʻikai ai te mau toe maʻu ha holi ke faikovi, kā ke failelei maʻu ai pē. …
“Pea ʻoku mau loto-fiemālie ke fai ha fuakava mo homau ʻOtuá ke fai ʻa hono finangaló, pea talangofua ki heʻene ngaahi fekaú ʻi he meʻa kotoa pē” (Mōsaia 5:1–2, 5).
Te tau lava foki ʻo maʻu ha “fuʻu liliu lahi” hangē ko e kakai ʻo e Tuʻi ko Penisimaní, ʻa ia ne “ʻikai te [nau] toe maʻu ha holi ke faikovi, kā ke failelei maʻu ai pē” (Mōsaia 5:2).