ʻOku Mau ʻOfa kia Sōfia
ʻOku nofo e tokotaha naʻá ne faʻú ʻi Puenosi ʻAile, ʻĀsenitina.
Naʻá ku lotua ʻi he poʻuli lōlō pea ʻi he loto mamahi ke sai hoku tuofefiné.
Tā fakatātaaʻi ʻe Brandon Dorman.
ʻI he 2012 naʻá ku fakakakato ʻa e seminelí mo e akoʻanga māʻolungá, pea naʻe kamata ha ʻepoki foʻou ʻi heʻeku moʻuí. Naʻe lelei ʻa e kamataʻanga ʻo e taʻú, kae tautautefito ki he kemi fakavahaʻa siteiki ʻo e toʻu tupú. Ne u ongoʻi ne tāpuekina mo maluʻi au ʻe he Tamai Hēvaní.
ʻI he ngaahi taʻu kimuʻá, ne u ʻosi fakapapauʻi te u ngāue fakafaifekau taimi kakato, peá u palani ʻi he 2012 ke u tukupā ke fakahaofi e paʻanga kotoa pē te u lavá. ʻOku ou fakamālō ai ki hoku tuofefine lahí, kia Sōfia ko e ngāue naʻá ku lava ʻo maʻu ʻi he kautaha naʻe ngāue aí. ʻI he ʻaho 22 ʻo Fēpuelí, naʻá ma ō lēlue mo Sōfia ki he ngāué. Ko ha ʻaho fakaʻofoʻofa ia, ka ʻi heʻema aʻu atu ki he feituʻu naʻá ma fononga ki aí, naʻá ku fanongo ki ha longoaʻa leʻo lahi, pea fakapoʻuli e meʻa kotoa.
ʻI heʻeku ʻā haké, naʻá ku fēlangaaki mo puputuʻu. Naʻe ofi nai e ngataʻanga ʻeku fononga ʻi he māmaní? Naʻá ku fuʻu fie maʻu ke u aʻusia ha ngaahi meʻa pau, hangē ko e ʻalu ʻo ngāue fakafaifekau mo e maʻu ha fāmilí. Ko ia naʻá ku lotu, ʻo kole ki he Tamai Hēvaní ke ʻomi kiate au ha faingamālie ke u moʻui ke u ʻalu ʻo ngāue fakafaifekau.
ʻI heʻeku tokoto ko ia ʻi he lelue kuo taʻeʻaongá, naʻá ku vakavakai holo ke fakasio hoku tuofefiné, ka naʻe ʻikai ke u sio ki ai. Faifai peá u fanongo ki he kau tangata tāmate afí ʻoku nau kole ki he tokotaha kotoa pē ke nau fakafiemālie, peá u ongoʻi ha ʻamanaki lelei ʻi hoku lotó. Naʻá ku lotua hoku tuofefiné koeʻuhí naʻe ʻikai ke u ʻiloʻi e feituʻu naʻá ne ʻi aí. Naʻá ku ongoʻi ha fiemālie lahi ʻi heʻeku lotú. Ne pau ke u feinga ke kātakiʻi ʻa e mamahi ne u ongoʻí, ka naʻe ʻomi ʻe he Tamai Hēvaní kiate au ʻa e mālohi naʻá ku fie maʻú.
Hili ha houa ʻe taha naʻe fakahaofi au. Naʻá ku ongoʻi naʻe ʻiate au ʻa e ʻEikí lolotonga e taimi ko iá. ʻI hono ʻave au ki he falemahakí ke tafa hoku vaʻé, naʻe ʻikai lava ke taʻofi ʻeku fakakaukau ki hoku tuofefiné mo ʻeku fifili pe naʻe fēfē. Ka ʻi he taimi kotoa pē ne u fakakaukau ai ki aí, naʻá ku ongoʻi ha nonga.
ʻI he ʻaho hono hokó ne fakahā mai ʻe heʻeku ongomātuʻá naʻe ʻikai ke hao ʻa Sōfia mei he fakatuʻutāmakí. Naʻe ʻomi ʻe he ongoongo ko iá ʻa e mamahi lahi taha kuó u ongoʻi ʻi hoku lotó. Ka ʻi he taimi tatau, ne u ongoʻi fiemālie mo houngaʻia ʻi he ngaahi fuakava toputapu naʻe fai ʻe heʻeku ongomātuʻá ʻi he temipalé ʻi hono silaʻi fakataha homau fāmilí ki he taʻengatá.
ʻI heʻeku foki ki ʻapi mei he falemahakí, naʻe tāpuekina ʻe he ʻEikí hoku fāmilí ʻo fakafou ʻi homau ngaahi kaungāmeʻá mo e kāingá, ʻa ia ko ʻemau kau ʻāngeló, ʻi hono ʻomi ʻa e fakafiemālié kiate kimautolú. Te mau houngaʻia maʻu ai pē ʻi he meʻa ko iá. ʻOku ou fakamālō ki he mālohi ʻo e lakanga fakataulaʻeikí, naʻá ku lava ʻo toe lue ʻo vave ange ʻi he taimi naʻe fai ki ai e ʻamanakí. Ne u lava ʻo lue lelei hili pē ha ngaahi māhina siʻi.
ʻOku fakaʻofoʻofa e ongoongoleleí ʻi he founga kotoa pē ʻokú ke vakai atu ki aí. ʻOku ou houngaʻia ʻi he ngaahi temipalé mo e ngaahi ouau fakatemipalé. ʻOku ou ʻilo kuo teuteuʻi ʻe he ʻEikí ha tāpuaki toputapu maʻa hoku tuofefiné. ʻOku ʻikai ke faingofua e moʻuí ʻi he ʻikai ke ne ʻi hení, pea he ʻikai pē, ka ʻoku mālohi ange e fakapapau mo e nonga ʻoku mau maʻú ʻi he mamahi ʻoku mau ongoʻi ʻi heʻene puliá. ʻOku mau ʻofa kia Sōfia ʻaki homau lotó kotoa pea ʻoku mau manatua ia ʻi he ʻaho kotoa pē. Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá he ʻikai fakalata ʻa hēvani kapau he ʻikai kau ai ho fāmilí (vakai, ʻI he Vahaʻa ʻo Hēvani mo Māmaní [DVD, 2005]), pea ʻoku ou fakamoʻoni ʻoku moʻoni ia.
ʻOku ʻofa ʻa e ʻOtuá ʻiate kitautolu, pea he ʻikai te Ne tuku ke tau tūenoa. ʻOku pehē ʻe ʻĪsaia 54:10, “Ko ʻeku ʻofá ʻe ʻikai mole meiate koe, pea ʻe ʻikai hiki ʻa e fuakava ʻo ʻeku melinó, ʻoku pehē ʻe he [ʻEiki] ʻa ia ʻoku ʻaloʻofa kiate koé.”