Hotau Ngaahi ʻApí, Hotau Ngaahi Fāmilí
Houngaʻia ʻi he Ngaahi Fuakava ʻo e Temipalé
ʻOku nofo ʻa e tokotaha naʻá ne faʻú ʻi ʻAlesona, USA.
ʻE lava fēfē ʻe ha faʻahinga meʻa ʻo fakanonga ʻeku loto-mamahí ʻi he fakaʻau ke mate hoku foha ʻoku teʻeki fāʻeleí?
ʻI he uike pē ʻe 14 ʻeku feitama ʻi heʻema pēpē hono tolú, ne fakahā mai ʻe he kau toketaá ʻe tō ʻa e pēpeé koeʻuhí ko e palopalema hono maʻamaʻá. Naʻe fakamamahi ʻa e ongoongó: naʻá ku ongoʻi loto-mamahi, ilifia, mo veiveiua ki he kahaʻú. ʻI he efiafi ko iá, naʻá ma ō mo hoku husepānití ki he temipalé mo ha loto mafasia pea ʻi he loʻimataʻia. Naʻá ma fie maʻu ha ngaahi tali, fakahinohino, mo e mālohi, pea naʻá ma ʻiloʻi ʻe lava ke ma ʻunuʻunu ʻo ofi ki he ʻEikí ʻi he nonga ʻo e temipalé. Naʻá ma ʻohovale ʻi he nonga naʻá ma ongoʻi ʻi he loki silesitialé. Naʻá ku ʻiloʻi ʻe tatau ai pē kapau naʻe ʻikai totonu ke nofo ʻa e pēpē ko ʻení ʻi he māmaní, ʻe lelei ʻa e meʻa kotoa.
Hili mei ai, naʻá ku tūʻulutui ʻo fakahā hoku lotó ki he Tamai Hēvaní. Naʻá ku fakahā kiate Ia ʻoku mahino kiate au naʻe ʻikai fie maʻu ke nofo homa fohá ka ʻoku ʻi ai ha ngaahi tāpuaki pau naʻá ku fakaʻamu ki ai, kapau ʻe lava. Naʻá ku palōmesi foki kapau ʻe hoko ʻeku ngaahi fakaʻamú, heʻikai ke mole ʻeku tuí. Naʻá ku kole ke u nofo mo e foha ko ʻení ʻo kiʻi fuoloa—ke lava ke ne moʻui, ʻo tatau pē pe ko ha taimi nounou pē, kae ʻoua kuo lava kotoa homau fāmilí ʻo fua ia. Naʻe pehē ʻe he kau toketaá kapau ʻe hoko ha mana ʻo kakato ʻema pēpeé, ʻe fāʻeleʻi mai ia ʻoku lanu vāleti, ka naʻá ku lotua ke fāʻeleʻi ia ʻoku lanu pingikī koeʻuhí ke ʻoua ʻe ilifia ʻema ongo kiʻi tamaiki tangata kehé ʻi hono fua hona tehiná. Naʻá ku kole ki he ʻEikí ke tuku ke mau manatuʻi ʻemau fehokotaki taʻengatá hili e mole atu e pēpeé, ʻa ia naʻa mau fakakaukau ke fakahingoa ko Palaiseni.
Hili ha ngaahi uike, naʻe ʻohovale e kau toketaá ʻi he fakalakalaka ʻa e pēpē ko Palaisení he naʻa nau fakatokanga mai ʻe mālōlō pē hili hono fāʻeleʻí. Naʻá ku ongoʻi ha loto mamahi naʻe ʻikai lava ke fakamatalaʻi, ʻi heʻeku ʻilo ʻe mole iá, ka naʻá ku toe fiefia lahi ʻi heʻene kei tupulakí. Naʻá ku mafasia maʻu pē ʻi he feitama he foha koʻeni heʻikai moʻuí; naʻá ku ongoʻi mamahi ʻi he taimi ʻoku fehuʻi mai ai e niʻihi kehé pea ko e tangata pe fefine ʻema pēpeé pe ʻaho ʻe fāʻeleʻi aí pea naʻe pau ai ke u fakangalingali ʻoku lelei pē meʻa kotoa. Ne ma fakatau ha monitoa ke lava ke ma vakaiʻi fakaʻaho ʻaki e tā hono mafú, naʻá ma vēkeveke maʻu pē ke fanongo ki he ongo mahuʻinga ko iá. Ne lahi fau hoku mamahí. Ne u maʻu ha ʻuhinga foʻou ki he Fakalelei ʻa e Fakamoʻuí: naʻe toki mahino kiate au mei he meʻa naʻá ku aʻusiá naʻe ʻikai ngata pē ʻi he mamahi ʻa Sīsū Kalaisi koeʻuhi ko ʻeku ngaahi angahalá ka naʻá Ne ongoʻi foki ʻa e mamahi kotoa pē. ʻI Heʻene hoko ko ʻeku Fakamoʻuí, naʻá Ne fuesia moʻoni fakataha mo au ʻa e mamafasiá koeʻuhí ke ʻoua te u tuenoa.
ʻI he uike hono 37, ne u ʻalu ki falemahaki ʻi heʻeku ʻiloʻi kuo kamata ke lau ʻaho pē moʻui ʻa Palaisení. Naʻe fakailifia ia mo fakaʻofoʻofa fakatouʻosi. Naʻe fakahoko mai ʻe he kau toketaá ʻe malava ke moʻui ia ʻi he vahaʻa ʻo e miniti ʻe 10 ki he ngaahi lau ʻaho. Neongo ʻeku manavasiʻí, naʻá ku ongoʻi e fakapapau ʻa e ʻEikí. Naʻe fāʻeleʻi ʻa Palaiseni Keti Fololeni ʻi he ʻaho 27 ʻo Sānuali, 2012. Naʻá ku tangi ʻi he momeniti ne fāʻeleʻi aí—naʻe lanu pingikī, talavou, pea haohaoa.
Naʻe fakatovave mai ʻema ongo tamaiki tangatá ki he lokí ke mamata mo fua hona tehiná; naʻa mau ʻomi ha taha faitā ke ne faitaaʻi ʻa e momeniti ko iá. Naʻe moʻui ʻa Palaiseni ʻi ha miniti pē ʻe 72, ko hono moʻoní ne fuoloa feʻunga pē ke mau takitaha fua mo ʻofaʻi ia. Ko e taimi pē ia ʻe taha ne mau fakataha kakato ai ko ha fāmili ʻi he māmaní, ka ko e meʻa kotoa pē ia ne mau fakaʻānaua ki aí. Naʻe ʻikai ke pāhia e ongo kiʻi tamaiki tangatá ʻi hona tehiná, hono ʻumaʻi iá, hiva kiate iá, mo kole ke na fua iá. Naʻá ne moʻui fuoloa feʻunga foki ke maʻu ha tāpuaki mei heʻene tamaí, ko ha meʻa naʻe nofo ʻo ʻamanaki mo lotua ki ai hoku husepānití.
ʻOku maʻu homau fāmilí ha fakamoʻoni “ʻoku fakaʻatā ʻe he palani fakalangi ʻo e fiefiá ke tolonga e ngaahi feohi fakafāmilí ʻo fakalaka atu ʻi he faʻitoká” pea ʻoku fakangofua ʻe he ngaahi ouau mo e fuakava fakatemipalé ke “fakatahaʻi e ngaahi fāmilí ʻo taʻengata” (“Ko e Fāmilí: Ko Ha Fanongonongo ki Māmani,” Liahona, Nōvema 2010, 129). Kiate kimautolu, ko e maʻu ʻo ha fāmili taʻengatá ko e kānokató ia. Ko e konga fakaʻofoʻofa taha ʻo e ongoongoleleí ko e ʻikai lava ko ia ʻe he maté ke fakamavaeʻi kitautolú; ʻe hoko fakataha atu ʻetau fonongá.
Kuó u ʻilo ʻoku ʻafioʻi ʻe he ʻOtuá e ngaahi fakaikiikí, ʻo fakafou ʻi he faingataʻa ko ʻení. ʻOkú Ne tokanga mai kiate kitautolu fakatāutaha. Lolotonga e hoko mai e ngaahi ʻahiʻahí mo e faingataʻá, ʻe malava ʻe he ʻOtuá ʻo fakamaʻamaʻa ʻenau mafasiá. ʻOku ou loto houngaʻia lahi ange he taimí ni ʻi ha toe taimi ʻi heʻeku sila ʻi he temipalé ki hoku husepānití pea mo hono fāʻeleʻi ʻema fānaú ʻi he fuakavá. ʻE lava ke mau toe fakataha, koeʻuhí ko e palani fakaʻofoʻofa ʻa e ʻOtuá maʻa hotau ngaahi fāmilí, kau ai ʻa e feilaulau taʻe fakangatangata ʻa e Fakamoʻuí. Naʻá ku faʻa fifili pe te u matuʻuaki fēfeeʻi ʻa e ʻahiʻahi faingataʻa ko ʻení ʻo ʻikai ʻiloʻi ʻa e moʻoni taʻengata ko iá. ʻOku ou houngaʻia moʻoni ʻi he fakamoʻoni naʻá ku maʻu koeʻuhí ko e moʻui nounou ʻa Palaisení—kuo fakaʻā ʻe he ʻOtuá hoku matá mo hoku lotó ki Heʻene ngaahi tāpuakí.