Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha fakakaukau ʻeni ʻe ua.

“Naʻe Papitaiso ʻa Sīsū,” peesi 74: Fakakaukau ke kamata hoʻomou efiafi fakafāmili ʻi ʻapí ʻaki hano hivaʻi e “ʻI he Papitaiso ʻa Sīsū Kalaisí” (vakai, peesi 73). Te mou lava ʻo lau fakataha ʻa e fakamatala ʻi he tohi tapú fekauʻaki mo e papitaiso ʻo Sīsuú pea fakaafeʻi e kau mēmipa ʻo e fāmilí kuo ʻosi papitaisó ke nau vahevahe ʻa e meʻa ne nau ongoʻi mo ako ʻi he taimi naʻe papitaiso mo hilifakinima ai kinautolú. ʻI hoʻomou lau fakataha mo vahevahe e ngaahi fakamoʻoní, tokoniʻi hoʻo fānaú ke mahino kiate kinautolu ʻa e ngaahi fuakava ʻoku fekauʻaki mo e papitaisó. Te ke lava ʻo fakaʻaongaʻi e ngaahi fehuʻi fakafolofola ʻoku ʻoatu ʻi he fakamatala ko ʻení ki hono akoʻi hoʻo fānaú fekauʻaki mo e ngaahi fuakava ʻo e papitaisó.

“Ko e ʻOfa Moʻoní,” peesi 80: Kole ki ha mēmipa ʻo e fāmilí ʻi ha taimi he lolotonga ʻo e uiké ke ne sio ki he fanga kiʻi ngāue angaʻofa faingofua ʻoku hoko he ʻaho takitaha. Kole ki he mēmipa ko iá ke ne vahevahe ʻi he efiafi fakafāmili ʻi ʻapí, ʻa e meʻa naʻe hoko lolotonga ʻa e uiké. Hangē ko e pōpoaki ʻa ʻEletā Uefiliní, “Ko e ʻofá ko e kamataʻangá ia, konga loto, mo e fakaʻosinga ʻo e hala ki he tuʻunga fakaākongá.” Fakakaukau ke tā ha fakatātā faingofua ʻoku hā ai ha hala ʻoku vahevahe ki he ngaahi konga iiki. Fakamatala ange ko e ngāue angaʻofa kotoa pē ʻoku nau fai—tatau ai pē pe ʻoku lahi pe siʻisiʻi—ʻe lava ke valivali ʻe he kau mēmipa ʻo e fāmilí ha konga ʻo e halá. ʻI he feinga ko ia homou fāmilí ke nau fakahā ʻa e ʻofá ki he niʻihi kehé, te mou ʻunu ai ki muʻa ʻi he hala ʻo e tuʻunga fakaākongá.