ʻOku ʻi ai Maʻu Pē ʻa e Taimi ke Lotu
ʻOku nofo ʻa e tokotaha naʻá ne faʻú ʻi Pevalia, Siamane.
Naʻe fuʻu faingataʻa ʻa e akó. ʻE toe fakaʻau nai ke lelei ange ʻa e meʻa kotoa?
“ʻOku ou lotu ʻi he tui. ʻOku ou fakataufolofola ki he Tamai Hēvaní” (“I Pray in Faith,” Children‘s Songbook, 14).
Naʻe pehē ʻe Siohani, “Haʻu foki, Fini. Kuo taimi ke ta ʻalu!”
Naʻe fiu tali ʻa e tokoua ʻo Finí, ʻa Siohani, ʻi he matapā ʻi muʻá. Naʻe ʻikai ke ne loto ke tōmui ki he akó.
Naʻe fakafulofula ʻa Fini. Naʻe ʻikai ke ne fie ʻalu ki he akó. Naʻe toki hiki mai hono fāmilí ki ha ʻapi foʻou. Ko hono ʻuluaki taʻu ia ʻi he akó, pea naʻe hala ke ʻi ai hano kaungāmeʻa ʻi he akó. Naʻá ne ʻofa ki hono ngaahi kaungāmeʻa motuʻá.
“ʻOku ou ilifia!” Naʻe pehē ʻe Fini ʻi heʻene lele ki heʻene faʻeé. “Ko e hā ʻoku fie maʻu ai ke u ʻalu ki he akó?”
Naʻē fāʻofua e faʻē ʻa Finí kiate ia. “ʻE sai pē ia. Naʻá ne pehē, “Ta fai ha lotu.” “ʻOku ʻi ai maʻu pē ʻa e taimi ke lotu.”
Naʻa na tūʻulutui ʻo kole ki he Tamai Hēvaní ke tokoniʻi ʻa Fini. Hili iá pea ʻalu leva ʻa Fini mo hono tokouá ki he akó. Naʻe sai ange ʻa e ʻahó.
ʻI he pongipongi kotoa pē mei ai, naʻe tūʻulutui hifo ʻa Fini ʻo fai ha lotu ki he Tamai Hēvaní ke tokoni.
Ne māmālie pē, ʻa e sai ʻa e meʻa kotoa. Naʻe maʻu ʻe Fini hano kaungāmeʻa, pea naʻe ʻikai ke ne toe ilifia. Hili ha kiʻi taimi siʻi, naʻe kamata ke saiʻia ʻa Fini ʻi he akó.
ʻI ha ʻaho ʻe taha naʻe lue ai ʻa Fini mo hono tokouá ki he akó, pea naʻe ongoʻi fiefia ʻa Fini. Naʻá ne fakatokangaʻi ʻa e ulo ʻo e laʻaá. Naʻá ne fakakaukau ki he ngaahi meʻa fakafiefia kotoa pē naʻá ne akó. Fakafokifā pē, naʻá ne tuʻu maʻu.
Naʻá ne pehē ange kia Siohani, “Naʻe ngalo ha meʻa ʻiate au!” Naʻe toe lele ʻa Fini ki honau falé.
Ne mata hohaʻa ʻene faʻeé ʻi heʻene lele ange ki lotó.
Naʻá ne fehuʻi ange, “Ko e hā e meʻa ʻoku fehalākí?”
Naʻe pehē ange ʻe Fini, “Kuo ngalo ia ke u lotu!” Naʻá ne tūʻulutui hifo. Naʻá ne fie maʻu ke fakamālō ki he Tamai Hēvaní ʻi hono tokoniʻi iá.
Hili ʻene lotú, naʻá ne fāʻofua ki heʻene faʻeé. Naʻá ne pehē “ʻOku ʻi ai maʻu pē ʻa e taimi ke lotu!”.
Naʻe malimali ʻa Fini. Naʻe malimali ʻene faʻeé. Pea ʻi he lele atu ʻa Fini ke maʻu hono tokouá, naʻá ne fakakaukau mahalo ne malimali foki mo e Tamai Hēvaní.