Veika eso mai nai ka 185 ni Koniferedi Raraba ni Lotu i Jisu Karisito ni Yalododonu Edaidai

Me 2015

Veika eso mai nai ka 185 ni Koniferedi Raraba ni Lotu i Jisu Karisito ni Yalododonu Edaidai

“Na ulutaga ni vosa eso ena koniferedi era sa lesi—sega ena lewa vakatamata ia ena veivakauqeti ni Yalotabu,” a vakamacalataka o Elder Dallin H. Oaks ena Kuoramu ni iApositolo Le Tinikarua (tabana 32). Ena dua na koniferedi raraba veivakauqeti ka a tekivutaki ena dua na soqoni raraba ni marama ka qai tini ena Sigatabu ni Siganimate, era veivakavulici na vosa kina me baleta na matavuvale, na lolo, cakacaka ni valetabu, bula vakatisaipeli, na Siga ni Vakacecegu, kei na Veisorovaki ni iVakabula, kei na vuqa tale na ivakavuvuli ni kosipeli (raica na tabana 3).

Oqo eso na ka a yaco:

A kacivaka o Peresitedi Thomas S. Monson eso na valetabu vou me tara mai Abidjan, ena Ivory Coast; Port-au-Prince, mai Haiti; kei Bangkok, e Thailand. Ena ka oqo, e kaya kina o koya, “Eso na veivakalougatataki vakasakiti sa vakarautaki tu ena vukudra na noda lewenilotu yalodina ena veivanua oqo, ka vakakina, ena veivanua kecega e tu kina na valetabu e vuravura raraba” (tabana e 91).
Era tokona na lewe ni Lotu e lima na lewe vou ni Matai ni Kuoramu ni Vitusagavulu, e dua na mataveiliutaki raraba vou ni Cauravou, kei na dua na daunivakasala vou ena mataveiliutaki raraba ni Lalai.
Na ripote vakaiwiliwili ni yabaki e tukuna ni sa 15.3 na milioni na lewe ni Lotu ena 3,114 na iteki kei na 561 na tikina. E tolu na valetabu vovou a vakatabui ena yabaki sa oti, sa 144 kina na valetabu sa vakayagataki tiko.
A vakadewataki na koniferedi ena 95 na vosa. Me salavata kei na dua na veisau a tekivutaki ena Okotova sa oti, eratou lewe tolu a vosa ena dua tale na vosa ka sega ni vosa Vakavalagi.

Ni ra vosa tiko ena mua ni macawa ni Siganimate, e vica vata na vakaitavi era vakadinadinataka na Nona Tucaketale na iVakabula. “O Koya na Luve ni Kalou,” e vakadinadinataka o Peresitedi Thomas S. Monson. “Sai koya ka a duri mai na ibulubulu ena mataka ni matai ni Siganimate oya, ka kauta vata mai kei Koya na isolisoli ni bula tawamudu kivei keda kece na luve ni Kalou” (tabana e 93).