Douglas D. Holmes

iMatai ni Daunivakasala ena Mataveiliutaki Raraba ni Cauravou

“Na itabatamata itabagone oqo e levu cake na kaukauwa ni talairawarawa vei ira mai na veitabatamata sa oti. Au vakabauta oqori na tiki ni nona gauna kei na vakavakarau na Turaga me baleta na gauna eda bula donumaka,” e kaya o Baraca Douglas D. Holmes, ka a tokoni ena 4 ni Epereli, 2015, me matai ni daunivakasala ena mataveiliutaki raraba ni Cauravou.

A sucu o Baraca Holmes ena 27 ni Feperueri, 1961, mai Salt Lake City, Utah, vei rau o Dee W. kei Melba Howell Holmes ka tubucake mai Cottonwood Heights, Utah.

Ni oti nona veiqaravi ena Tabana ni kaulotu na Scotland Glasgow mai na 1980 ki na 1982, a rawata o Baraca Holmes e dua na diqiri ni bejila ni family science mai na Brigham Young University ena 1986 ka qai toso yani me rawata e dua na diqiri ni master of business administration mai na Marriott School of Management ni univesiti oya.

Ni oti nona taurivola, a daunivakasala o koya ena tabana ni manidia ena tolu na yabaki oti qai laki qarava e dua na cakacaka ka rawaka kina vakavinaka ena tabana ni veitaratara, ka yaco kina me ivukevuke ni peresitedi veiliutaki e qarava na vakatorocaketaki ni tuvaka kei na vakatubuiyau ni kabani na Media One. Mai na 2000 me yacova na nona kacivi vakaperesitedi ni kaulotu ena 2010 ka vakakina mai na 2013, sa vakacakacakataki koya tikoga ena tabana ni vakatubuilavo kei na volitaki iyauqaqa.

Sa vagoleya vakalevu na nona gauna kei na taledi ki na veisoqosoqo sega ni rawatubu, ka veiqaravi ena veimatabose ni United Way of Davis County, Utah; Parents for Choice in Education; the Safe Harbor Women’s Shelter in Davis County; kei na Academy for Creating Enterprise.

Sa veiqaravi oti vakailiuliu ni kaulotu ena tabanalevu, peresitedi ni Cauravou, bisopi, kei na dua na gauna lekaleka ga oqo vakadaunivakasala ena mataveiliutaki ni iteki. A vakatulewataka na Tabana ni Kaulotu na Michigan Detroit mai na 2010 ki na 2013.

A vakamautaki Erin Sue Toone ena 22 ni June, 1985, ena Valetabu e Salt Lake. Erau nodratou itubutubu e ono na gone.

E kaya o Baraca Holmes, “Keitou sa raica na mana ni vosa ena neitou bula, se nodra vosa na parofita se na vosa ni ivolanikalou se na vakasolokakana ni Yalo Tabu.