Meda Torocake Vata

Mai vei Linda K. Burton

Peresitedi Raraba ni iSoqosoqo ni Veivukei

Ni da sa yalewa kei na tagane daumaroroya na veiyalayalati, sa dodonu sara meda veilaveti cake ka veivukei vakai keda meda tamata yaco, e sa vinakata vei keda na Turaga meda vakakina.

Na ka e toka tikiva na vosa veivakauqeti, sere, kei na masu e dau tara na yaloda ena gauna ni koniferedi, na ka era kaya vei au e vuqa na marama ni ra taleitaka o ya na nodra dau lesu yani mai na itutu ni vunau na Mataveiliutaki Taumada kei na Kuoramu ni iApositolo Le Tinikarua vata kei na nodra itokani tawamudu. Eda sa qai sega beka ni taleitaka noda rogoci ira na Veitacini mera vakaraitaka nodra lomani ira na watidra?

President Boyd K. Packer and his wife, Donna, at the Brigham City Utah Temple cornerstone ceremony, 23 September 2012.

Ni tukuni watina, o Donna, a kaya kina o Peresitedi Boyd K. Packer, “Ena vuku ni noqu ilesilesi, sa noqu itavi vakalou meu tukuna na dina: E uasivi sara o koya.”¹

President Dieter F. Uchtdorf and his wife.

“O koya na rarama ni noqu bula,”² e kaya o Peresitedi Dieter F. Uchtdorf baleti watina, o Harriet.

President Henry B. Eyring and Sister Eyring at their wedding.

E kaya o Peresitedi Henry B. Eyring, baleti watina, o Kathleen, “O koya e [dua] e dau cakava meu dua na tamata uasivi au rawa niu vakakina.”³

LDS Church President Thomas S. Monson gives his wife, Frances, a kiss at their 60th anniversary celebration, 10/6/2008, at the Lion House. The two met in 1944 and were married in the Salt Lake Temple on Oct. 7, 1948.

A kaya o Peresitedi Thomas S. Monson, baleti nona daulomani o Frances, “Sa noqu bula taleitaki o koya, e noqu itokani nuitaki, ka noqu itau voleka sara. Niu kaya niu vakananumi koya vakalevu e sega mada ga ni se tekivu tukuni rawa kina na titobu ni ka au vakila.”⁴

Au via vakaraitaka talega niu lomana na noqu itokani daulomani, o Craig. E noqu iloloma talei! Niu tukuni watiqu, e yalataki tiko ena dua na malanivosa vakamareqeti ka vakalou ena noqu veivakalougatataki vakapeteriaki ni noqu bula kei na nodra bula na luvequ era “na bula vakavinaka ena nona veimaroroi.” Sa matata kina vei au ni sa mai yaco na yalayala o ya vei Craig. Niu tukuna na vosa nei Mark Twain, au kaya ni “bula e sega kina o [Craig] ena sega niu okata me dua na bula”⁵ Au lomani koya, yaloqu kei na lomaqu!

iTavi kei na iLesilesi Vakalou

Nikua au sa vakacaucautaki ira na tagane vakawati, tama, veitacini tagane, luvena tagane, kei ira na momo era sa kilai ira tiko ka ra sa cakava tiko na nodra vinaka taucoko mera cakava rawa nodra itavi va-Kalou me vaka e tukuni tiko ena ivakaro ni matavuvale, oka kina na vakatulewa vakadodonu kei na qarava ka taqomaka nodra matavuvale. Mo ni kila tiko niu kila vakamatata tiko na ulutaga ni bula vakatama, vakatina, kei na vakamau ena rawa ni dredre ki na vuqa eso. Au kila ni so na lewe ni Lotu era nanuma ni nodra vuvale ena sega ni rawata na cecere era vakasamataka tiko me kena e uasivi. E vuqa era bula rarawa ni ra sa guilecavi, vakacacani, vakatotogani, kei na ivalavala kei na itovo e cala. Au sega ni tokoni ira na tagane kei na yalewa sa lomadra dina se lecava nodra veivakararawataki, veivakacacani, kei na veilecayaki ena nodra itikotiko. Ia au na vosa tiko ena dua tale na ka nikua.

Au vakabauta sara ena sega vakadua ni na serau vakalevu cake o tagane vei watina me vakataka na gauna e qarava tiko kina na itavi solia mai na Kalou ni sa matabete kilikili—vakabibi ena nona itikotiko. Au taleitaka ka vakadinata na vosa oqo nei Peresitedi Packer kivei ira na tagane vakawati kei na tama kilikili: “Sa tu vei kemuni na kaukauwa ni matabete mai vua na Turaga me taqomaki kina na nomuni vuvale. Ena yaco mai ena so na gauna ni ka duadua ga e rawa ni veitaqomaki ki na nomuni matavuvale mai na sasaga ni meca sa ikoya na kaukauwa oqori.”⁶

Ira na iLiuliu kei na Qasenivuli Vakayalo ena iTikotiko

Ena itekivu ni yabaki oqo au a tiko ena dua na somate ni dua na tagane vakasakiti sara—o Momo Don nei watiqu. E dua na luvei Momo Don a wasea e dua na ka e sotava ni se gone lailai, ni oti toka ga nodrau volia na imatai ni nodratou vale na nona itubutubu. Ena vuku ni lima tiko na gone lalai mera vakani ka vakaisulutaki, sa sega kina na ilavo me vakabai na itikotiko. Ni taura vakabibi e dua na nona itavi vakalou me taqomaka na nona matavuvale, a cobara sara o Momo Don eso na kau ena qele, kauta mai eso na wa, ka vesuka na wa mai na dua na kau ki na dua tale me wavokita na itikotiko. A qai kacivi iratou na luvena. A vakaraitaka vei iratou na kau kei na wa ka vakamacalataka, kevaka ratou na tiko ga e loma ni bai tu vakawawa o ya, e ratou na taqomaki.

Dua na siga erau wanono ena kurabui na dauveituberi ni vuvale ni rau voleka yani ki na vale ka raica e lima na gone lalai era tucake tu ena talairawarawa ena yasani wa, ni ra vinakata na polo sa qiqi yani e taudaku ni nodra yalayala ki gaunisala sara. A cici e dua na gone vei tamana, ka mani, cici o koya ka kauta mai na polo.

Ena gauna ni veibulu, a tagi o luvena ulumatua ni vakamacalataka tiko ni ka ga e dau nuitaka tu ena bula oqo o ya me vakataki tamana daulomani.

Sister Burton's son and grandson reading together.

E kaya o Peresitedi Ezra Taft Benson:

“Isa, kemuni na tagane vakawati kei na tama kei Isireli, sa rawa mo ni cakava e vuqa na ka mera vakabulai ka bula vakacerecerei kina na nomuni matavuvale! …

“Nanuma tiko na nomuni veikacivi tabu ni tama kei Isireli—na veikacivi bibi duadua ena gauna oqo kei na veigauna tawamudu—na veikacivi o na sega vakadua ni vagalalataki mai kina.”

Sister Burton's son and grandson on a bed together.

“Mo na vukea na kena tauyavu e dua na itikotiko mena dau tiko kina na Yalo ni Turaga.”⁷

Sa veirauti vinaka na vosa vakaparofita oqori ena siga nikua.

Ena dredre sara beka, vei ira na tagane ni veiyalayalati mera bula voli ena vuravura oqo e sega walega ni dau vakawalena na nodra ilesilesi kei na itavi vakalou ia e dau vakauta tiko na itukutuku lasu me baleta na ibalebale dina ni “tagane qaqa.” E dua na itukutuku lasu na “Me baleti au ga.” Ka tiko talega e yasana kadua na itukutuku torosobu ka veivakacacani o ya ni ra sa sega ni gadrevi na tagane vakawati se tama. Au sa vakamasuti kemuni mo ni kakua ni rogoca na veilasutaki tiko i Setani! Sa kau tani mai vua na madigi vakalou me tagane vakawati se tama. Ena vuku ga ni vuvutaki ira sa tiko na nodra ilesilesi tabu ena sega ni yaco vua, sa lomana dina me “rarawa na tamata kecega … me vakataki koya”!⁸

Veilaveti ka Veivukei ena Noda iLesilesi Veivakataucokotaki

Taciqu kei na ganequ, meda veivukei vakai keda! Ni da sa yalewa kei na tagane daumaroroya na veiyalayalati, sa dodonu sara meda veilaveti cake ka veivukei vakai keda meda tamata yaco sa vinakata vei keda na Turaga meda vakakina. Ka gadrevi meda cakacaka vata mera laveti cake na itabatamata sa tubu cake tiko mai ka vukea mera yacova na kedra ituvaki vakalou ka taukena na bula tawamudu. Sa rawa meda cakava me vakataki Elder Robert D. Hales kei na watina o Mary, ka muria na vosa vakaibalebale “Ko ni laveti au kau na laveti kemuni, meda torocake vata.”⁹

Eda kila mai na ivolanikalou ni “sa sega ni vinaka … me tiko duadua na tamata.” Oqori na vuna a bulia kina na Tamada Vakalomalagi “e dua na dauveivuke e yaga vua.”¹⁰ Na malanivosa dauveivuke e yaga e kena ibalebale “e dua na dauveivukei sa yaga, kilikili, se duavata kei koya.”¹¹ Kena ivakaraitaki, e rau rairaivata na ligada ruarua ia e rau sega ni tautauvata. Na ka dina, e rau veibasai sara ga, ia e rau veivukei vakai rau ka veiganiti vakai rau. Ni rau cakacaka vata, rau kaukauwa sara. Ni rau cakacaka vata, rau na kaukauwa cake.¹²

Ena wase e baleta na matavuvale, e tukuni tiko ena ivoladusidusi ni Lotu na ka oqo: “Na ivakarau vakayalo ni tagane kei na yalewa sa ikoya me rau vakataucokotaki rau.”¹³ Yalovinaka e sega ni tukuni na “veisisivi vakai kemudrau” ia na “veivakataucokotaki vakai kemudrau”! Eda tiko oqo meda veivukei, veilaveti cake, ka reki vata ni da saga tiko meda tamata yaco vinaka sara. E veivakavulici matua kina o Sister Barbara B. Smith, “Ena levu sara na noda bula marau kevaka meda rekitaka na nodra rawa-ka na tamata ka segai ni noda walega.”¹⁴ Ni da vakasaqara meda “veivakataucokotaki” ka sega ni “veisisivi,” sa rawarawa sara meda veivakayaloqaqataki vakai keda!

Niu se tinani gone lailai tiko vei iratou na luvequ lalai, ena veisiga ni oti na veisautaki daipa, masi ni yaya ni kana kei na veivunauci, e sega ni dua e lagata vakamatata cake na sere ni Lalai “Au marau ni yaco mai vale o ta.”¹⁵ Au luluvu niu vakadinadinataka, niu sega ni dau marau ni dau curu mai katuba o Craig ni oti mai nona oca vakacakacaka. E dau kidavaki keitou yadua ena imoko kei na iregu ka vukica na vuqa na veika dredre kei na leqa eso ni siga o ya me gauna marautaki nei ta. Au diva me a lailai cake noqu vakaogai au ena veika me caka yadudua ka rai ga vakayalomatua, vakataki koya, ena veika e bibi duadua. E a rawa beka meu cegu mada vakawasoma ka marautaka na gauna tabu vakamatavuvale ka vakavinavinakataki koya vakawasoma ni vakalougatataka na neitou bula!

Meda Dau Veivakacaucautaki

Dua na gauna oti tikoga qo, a kaya vei au e dua na sisita yalodina ena Lotu e dua na ka bibi sara a masulaka tiko mai vakabalavu. A lomaleqataka tiko eso na marama ena nona tabanalevu. A kaya vei au ni dau vakamosira na yalona ena nodra dau vosa beci ira na watidra ka talanoataki ira ena so na gauna, ena matadra mada ga na luvedra. A qai kaya na gauna ni se goneyalewa tu kina a dau gadreva dina ka masulaka me kunea ka vakamautaka e dua na lewe ni matabete kilikili ka tara cake vata kei koya e dua na matavuvale mamarau. A tubu cake o koya ena vuvale e ‘vakatulewa’ ga kina o tinana ka sa dau vakamuria tu ga o tamana na vosa nei tinana me kune vakacegu tikoga na vuvale. E nanuma o koya ni tiko e dua tale na sala e vinaka cake. E sega ni raica o koya me matanataki oqo ena nona vuvale a tubu cake kina, ia ni dau masulaka me dusimaki, a vakalougatataki koya na Turaga me kila na sala me tauyavutaka kina e dua na vuvale vata kei watina me na ciqomi kina ena yalololoma na Yalotabu. Au sa sotava na vale o ya kau vakadinadinataka ni sa itikotiko tabu!

Kemuni na taciqu kei na ganequ, sa vakawasoma beka na noda “dauveivakacaucautaki”?¹⁶

Meda na dikevi keda mada ena vica na taro oqo. Me veiganiti toka, sa rawa me baleti keda kece na taro oqo, se da vakamau se sega se cava sara na ituvaki ni noda vuvale.

Na cava na iotioti ni gauna au a vakacaucautaka dina kina na watiqu, ki vua ga se e matadra na luvei keirau?
Na cava na iotioti ni gauna au a vakavinavinaka, vakaraitaka noqu lomana, se nanumi koya ena vakabauta ena noqu masu?
Na cava na iotioti ni gauna au a tarova meu kua ni cavuta e dua na ka e rawa ni vakatubu rarawa?
Na cava na iotioti ni gauna au a vakatutusa kina ka vakamamasu meu vosoti—ka sega ni cavuta kina na vosa “ia kevaka ga mo a” se “ia kevaka mo a sega ga ni”?
Na cava na iotioti ni gauna au a digitaka kina meu marau ka sega ni vakaukauwataka niu “donu”?

Ia, ke dua vei ira na taro oqo e vakayavalati iko se vakila vakalailai ni o cala, nanuma ni a vakavulica o Elder David A. Bednar na “kilai ni cala, sai koya na mosi kina na yalo me vaka na mosi ni mavoa ki na yago—na ivakasala ki na leqa kei na veitaqomaki mai na ikuri ni leqa.”¹⁷

Au sa sureti keda yadua meda muria na vakamamasu yalodina nei Elder Jeffrey R. Holland: “Kemuni na taciqu kei na ganequ, ena ilakolako balavu oqo me da vakataka na noda iVakabula, me da kakavaki yani meda tagane ka yalewa ‘uasivi sara’ ena dua mada ga na itovo oqo—sega ni cala ena vosa, se me vakamatatataki, meda vosa ga ena yame vou, na nodra vosa na agilosi.”¹⁸

Niu mai vakavakarau tiko nikua ki na madigi oqo, sa vakavulici au na Yalotabu, kau sa vakadeitaka meu vosa ga ena loloma, vakalevu cake vei noqu daulomani kei na veika baleti koya, meu laveti ira cake na tagane ena noqu matavuvale ka vakavinavinakataka na sala era vakayacora kina na nodra ilesilesi vakalou veivakataucokotaki. Kau sa vakadeitaka meu muria na vosa vakaibalebale “Ko ni laveti au kau na laveti kemuni, meda torocake vata.”

Sa na rawa beka meda vakasaqara vata na veivuke ni Yalo Tabu me vakavulici keda ena sala meda veilaveti cake kina vakavinaka ena noda ilesilesi ni veivakataucokotaki ni da sa luvena tagane kei na yalewa ni veiyalayalati ni noda itubutubu lomani vakalomalagi?

Au kila mai na kaukauwa gugumatua ni Veisorovaki i Jisu Karisito kei na noda vakabauti Koya, eda na cakava rawa. Sa noqu masu ni da na vakararavi ga Vua me vukea noda veivukei vakai keda meda bula marau kina ka tawamudu ni da torocake vata, ena yaca i Jisu Karisito, emeni.