Elder Kim B. Clark

Matai ni Kuoramu ni Vitusagavulu

Na bula ni vuli ka—vakagonevuli vakakina vakaqasenivuli—ena yaga vei Elder Kim Bryce Clark ena nona ilesilesi vou ena Matai ni Kuoramu ni Vitusagavulu. A tokoni ena 4 ni Epereli, 2015, ena tekivuna nona veiqaravi ni oti ga e vica na macawa ena nona vakacavara na nona ilesilesi vakaperesitedi ni Brigham Young University–e Idaho.

“Au sa vuli tiko niu se qai yabaki lima,” e kaya na Vitusagavulu kacivi vou. “Au taleitaka na vuli kei na veivakavulici.”

A sucu mai Salt Lake City, Utah, ena 20 ni Maji, 1949, vei rau o Merlin kei Helen Mar Clark, ka qase duadua vei iratou e lewe tolu na gone. A tiko voli ga e Salt Lake City ena nona gauna ni gone me yacova ni sa yabaki 11, ni sa taura o tamana e dua na cakacaka mai Spokane, Washington.

E dina ni a nakita me vuli ena Brigham Young University e Provo, Utah, ni se tiko ena vuli torocake e ra, qai nanuma ni dodonu me dikeva mada eso tale na digidigi ka lewa me sa na kerekere ki na Harvard University mai Massachusetts—e dua na vanua ka na yaco e muri me nona itikotiko ena sivia e tolu na yabaki tini.

Ni oti nona imatai ni yabaki e Harvard, a laki kaulotu o Elder Clark ena Tabana ni kaulotu ena Ceva kei Jamani mai na 1968 ki na 1970. Ni lesu mai, a vuli e BYU, ka rau sota kina ena dua na gauna lekaleka kei Sue Lorraine Hunt ena nona tabanalevu. Erau a vakamau ena vica ga na vula i muri ena ika 14 ni June, 1971. Erau nodratou itubutubu e vitu na gone.

Ni oti sara ga nodrau vakamau erau a toki na veiwatini ki Boston, Massachusetts, ka laki vakacuruyaca tale kina e Havard o Elder Clark. A rawata mai kea e dua na diqiri ni bachelor of arts, dua na diqiri ni master of arts, kei na dua na PhD—taucoko ena economics. A yaco me dua na lewe ni qasenivuli ni Tabana ni vuli Bisinisi e Havard ena 1978 o Elder Clark ka qai kacivi e muri me dini ni koronivuli ena 1995. Ena 2005 a lesi o koya me peresitedi ni BYU–Idaho, ka veiqaravi kina me voleka ni yabaki tini.

Sa veiqaravi oti o Elder Clark vakaperesitedi ni kuoramu ni italatala qase, sekeriteri liu ni tabanalevu, daunivakasala nei bisopi, bisopi, lewe ni matabose e cake, daunivakasala nei peresitedi ni kaulotu ni iteki, ka Vitusagavulu ni iWasewase.