Elder Vern P. Stanfill

Matai ni Kuoramu ni Vitusagavulu

E vakabauta o Elder Vern Perry ni sega ni dua na ka e vakacalaka. E vakabauta o koya ni tu na ilesunisala ena bula oqo vei ira na tamata ena dua na inaki ka na rawa vua na Turaga me vakauqeti ira na Luvena me ra idewadewa ni veivakalougatataki vei ira tale eso.

E dau taleitaka o Elder Stanfill na veiqaravi vei ira na tani ena kosipeli, vakauasivi na cakacaka vata kei ira na tamata yadudua.

A sucu ena 8 ni Okosita, 1957, vei rau o Jed kei Peggy Stanfill, a tubu cake o Elder Stanfill ena dua na vanua ni susu bulumakau volekati Townsend, Montana. A vulica na bibi ni cakacaka vakaukauwa ka tara cake e dua na ivakadinadina ni iVakabula o Jisu Karisito. E ikatolu vei iratou e va na gone, e rua na tuakai Elder Stanfill ka dua na ganena gone eratou sa veiqaravi oti ena yalodina ena Lotu.

“Sa dau tiko ena noda bula na liga ni Turaga e dina ni tu na noda malumalumu eso,” e kaya o koya. “Keirau sega ni tamata vinaka sara kei na watiqu. E sega ni vinaka sara na neirau matavuvale. Keirau tamata ga vakataki kemuni ka sa tovolea tiko me keirau bulataka na neirau bula e veisiga yadua ka vakatara me mai tiko kina na Turaga.”

Ni oti na qaravi kaulotu tudei e Toulouse, Varanise, ka saga tiko e dua na diqiri ena agricultural economics ena Brigham Young University, a sotavi Alicia Cox o koya ka rau mani vakamau. Erau a vakamau ena 17 ni Tiseba, 1980, ena valetabu e Salt Lake.

Ni oti na taurivola, erau toki lesu tale na veiwatini na Stanfills ki Montana me rawa ni veivuke o koya ena kena vakatulewataki na vanua ni teitei ni matavuvale, ka susu kina na bulumakau, na comadu, kei na kakana sorenikau. A volitaka na bisinisi o koya ena 1998 ka tekivuna e dua na bisinisi ni volitaki iyauqaqa kei na iyaya vakailavo, vakakina na kena tuvalaki na veika ni soli ilavo kei na esiteti.

Sa dau vakaitavi o Elder Stanfill ena vuka vakabisinisi kei na ivakalasa ka tu vua na kena ivola ruarua.

Me ikuri ni nodra susugi cake e va na luvedrau yalewa kei na watina, a donumaki Elder Stanfill na madigi me veiqaravi ena Lotu vakaperesitedi ni kuoramu ni italatala qase, bisopi, lewe ni matabose e cake, ka Vitusagavulu ni iWasewase. A veiqaravi tiko ena iKaono ni Kuoramu ni Vitusagavulu ena nona mai kacivi ki na Matai ni Kuoramu.