M. Joseph Brough

Karua ni Daunivakasala ena Mataveiliutaki Raraba ni Cauravou

Ena loma ni tolu na yabaki ni peresitedi voli ni Tabana ni Kaulotu na Guatemala Guatemala City Central (mai na 2011 ki na 2014) o M. Joseph Brough, erau a yali ruarua kina na tamana kei na tamai watina.

E dina ni a rawa ni lesu tale ki Amerika na watina me laki veibulu, erau a lewa vakaveiwatini ena gauna ruarua oqori me tiko ga e Guatemala ka tomana tiko nodrau cakacaka ni kaulotu. “Keirau kila ni na vinaka cake vei keirau me keirau tikoga ka cakacaka ena kena vinaka duadua keirau rawata,” e kaya o Baraca Brough, ka a kacivi ena 4 ni Epereli, 2015, me karua ni daunivakasala ena mataveiliutaki raraba ni Cauravou. “Oqori sara ga na ka erau na namaka vei keirau na tamana kei na tamaqu.”

A sucu o Baraca Brough mai Salt Lake City, Utah, ena 11 ni Tiseba, 1963, vei rau o Monte J. kei Ada B. Brough. A tiko voli mai Farmington, Utah, kei Robertson, Wyoming ena nona gauna ni itabagone. Eratou a toki na matavuvale ki Minnesota ena gauna a kacivi kina o tamai Joseph, o koya a qai veiqaravi e muri me lewe ni Vitusagavulu, me peresitedi ni kaulotu. Sa qase toka ena vulitorocake o Joseph ena gauna e mai cava kina na veiqaravi vakaperesitedi ni kaulotu nei tamana. A sega ni lesu tale ki na vulitorocake o Joseph, ia a taura ga na veitarogi ka tautauvata kei na veitarogi ni vulitorocake ka gole sara yani ki na Weber State University mai Ogden, Utah.

Erau a cikeva na nona itubutubu me vakaotia mada na semineri ena sitivikiti ni va na yabaki. Ena nona vuli semineri tiko e Davis High School a sotava kina o koya na watina e muri, o Emily Jane Thompson. Erau a vakamau ena 25 ni Epereli, 1985, ena valetabu e Salt Lake; erau nodratou itubutubu e va na gone.

Ni bera ni rau vakamau na veiwatini, a veiqaravi o Baraca Brough vakadaukaulotu ena Tabana ni kaulotu na Guatemala Quetzaltenango. Na nona peresitedi ni kaulotu, o Jorge H. Perez, sa yaco me “tamata qaqa ena noqu bula,” e kaya o koya.

O koya a tauyavutaka ka taukena na Rotational Molding of Utah, a rawata e dua na bachelor’s degree ni veika vakailavo kei na dua na master of business administration mai na Univesiti e Utah. Ena Lotu sa veiqaravi oti vakabisopi, peresitedi ni Cauravou ena tabanalevu ka lewe ni matabose e cake.