Na Rai Tawamudu ni Kosipeli

Mai vei Elder Rafael E. Pino

Ena Vitusagavulu

Me baleta na vakatulewa ni tawamudu, ena yaga me da rai ena rai vakosipeli.

Ena dua na ivakatakila a soli vei Mosese, a tukuni kina vei keda na nona inaki vakatakilai na Tamada Vakalomalagi: “Raica oqo na inaki kei na lagilagi ni noqu cakacaka—io me ra tucake tale mai na mate na tamata kecega ka rawata na bula tawamudu.”¹ Me vaka na iyatuvosa oya, na nona gagadre na Tamada me vakarautaka ki na tamata kecega na madigi me rawata na taucoko ni marau. E vakaraitaki mai na ivakatakila ni gauna oqo ni a bulia na Tamada Vakalomalagi e dua na ituvatuva cecere ni marau me baleti ira kece sara na Luvena, e dua na ituvatuva digitaki me rawa kina ni da lesu tale ka laki bula vata kei Koya.

Ni da kila na ituvatuva ni marau oqo sa vakarautaka vei keda e dua na rai tawamudu ka vukei keda me da tugana sara na ivakaro, na cakacaka vakalotu, na veiyalayalati, kei na veivakatovolei kei na veika dredre.

E dua na ivakavuvuli bibi mai vei Alama: “A sa solia vei rau na vunau na Kalou, ia sa vakatakila talega vei rau na sala sa vakarautaki tu me da bula kina.”²

E taleitaki ni da kila na veitaravi ni ka e yaco ena iwalewale ni veivakavulici. A vakavuvulitaka taumada na Tamada Vakalomalagi vei Atama kei Ivi na ituvatuva ni veivueti, ka qai solia vei rau na ivakaro.

Oqo e dua na dina cecere. Ni kilai na ituvatuva ena vukei ira na tamata me ra maroroya na ivakaro, vakatulewa vakavinaka cake, ka dodonu na nodra inaki.

Ena gauna au veiqaravi voli kina ena lotu, au sa vakadinadinataka na nodra gumatua kei na yalodina na lewe ni Lotu ena veimatanitu, eso vei ira e yaco tu kina na veilecalecavi vakapolitiki, veimaliwai vakatamata, se na bula vakailavo. E dua na vuna levu au raica rawa vei ira na lewenilotu yalodina oqo sai koya na ivakarau ni rai e tu vei ira me baleta na tawamudu. Na rai tawamudu ni kosipeli eda na kila kina na noda itutu ena ituvatuva ni Kalou, me da ciqoma na dredre ka toso ki liu ena kedra maliwa, vakatulewa, ka yavutaka na noda bula ki na noda icavacava vakalou.

Na rai taucoko sai koya na ivakarau eda raica kina e dua na ka ni toka mai vakayawa, ka rawa kina vei keda me da marautaka na kena yaga dina.

E vaka ni da tu ena loma ni dua na veikau ka tu e matada e dua na vunikau. Kevaka eda sega ni vakasuka vakalailai ki muri, eda na sega ni marautaka na irairai dina ni dua na veikau. Au a gade ena dua na gauna ki na veikauloa na Amazon mai Leticia e Colombia, voleka ena kedrau yalayala o Brazil kei Peru. Au a sega ni kila rawa na kena vakaitamera me yacova na gauna au qai vukabaleta kina ka taucoko na noqu raica yani.

Ni ra se lalai na luvei keirau, eratou dau sarava e dua na sala ni retioyaloyalo dau vakaraitaki mai kina e dua na parokaramu ka vakatokai Na Cava o Raica? Ena toso voleka na itaba ki na dua na ka, me ra qai kilakila tiko na gone se cava oya ni sa toso tiko mai vakayawa. Ni sa qai taucoko na irairai ni ka oya, ena rawarawa nomu kila ni pusi, dua na vunikau, dua na vuanikau se cava tale.

Au nanuma ena dua na gauna eratou sarava tiko na parokaramu oya ka vakaraitaka voleka sara mai e dua na ka rairai ca sara vei iratou, via rerevaki sara toka; ia ni rabailevu mai na itaba, eratou qai kila ni oya e dua na pisa vakaturuweli. Ratou qai kaya mai, “Tata, volia vei keitou e dua va saraga ya!” Ni ratou qai kila se cava oya, e dua na ka a sega ni rairai vinaka vei iratou sa yaco me dua na ka rairai totoka.

Meu wasea tale mada e dua na ka. Ena neitou vale eratou dau taleitaka na luvei keirau na vakasotara vata na ibulibuli duidui eso. Eda sa cakava taucoko beka e dua na vakasota ibulibuli. Eso e levu sara na kena veitikina lalai. Au nanuma ni dua vei iratou na luvei keirau (au na sega ni tukuna na yacana me taqomaki) e dau vakaraica matua na veitikina yadua, ni dua e sega ni coba rawa ena vanua e nanuma ni dodonu me coba kina, ena cudru ka nanuma ni sega ni vinaka ka via viritaka laivi sara. A qai vulica me vakasotara vata ni sa qai kila ni veitikina lalai yadua e tiko na kena itokatoka ena iyaloyalo levu, kevaka sara mada e sega ni kila ena dua na gauna.

Oqo e dua na sala me da vakananuma kina na ituvatuva ni Turaga. Me da kakua ni lomaleqa soti ena kena veitikina era tatawasewase tu ia tovolea mo raica na iyaloyalo taucoko, me toka ena nomu vakasama na iotioti ni ibulibuli. E kila na Turaga na vanua me coba kina na veitikina yadua me rawa ni okati kina ena ituvatuva. Na ivakaro kece e tawamudu na kena bibi ena loma ni ituvatuva cecere ni marau.

Sa bibi sara kina me da kakua ni vakatulewataka na veika e tawamudu na kena yaga ni da rai tiko vakayago. Me baleta na vakatulewa ni tawamudu, ena yaga me da rai ena rai vakosipeli.

E vakavuvulitaka o Elder Neal A. Maxwell: “E dina ni o ‘kelei tu’ ena inuinui cecere ka iotioti, eso tale na ka eda vakanuinui kina ena bula oqo sa duatani tale. Eda vakanuinui beka me tubu na isau, dua na veigadivi vinaka, da qaqa ena veidigidigi, se dua na vale levu—na veika ena rairai mai se sega ni rairai mai. Na vakabauta na iTuvatuva nei Tamada ena kauta mai na vosota ena maliwa sara mada ga ni ivocavoca ni inuinui leleka vaoqo. Na vakanuinui eda na ‘gumatua [kina] ena cakacaka vinaka’ ena inaki vinaka kevaka sara mada ga e kena irairai ni ra inaki lusi (raica na V&V 58:27).”³

Ni sega vei keda na rai tawamudu, se ni yali, e rawa ni vakavuna me tiko vei keda na rai vakavuravura me ivakatagedegede yadua ka vakataulewa ka sega ni sala vata kei na loma ni Kalou.

E tukuni ena iVola i Momani na ivakarau ni bula nei Nifai kei na nodrau ivakarau o Leimani kei Lemueli. Eratou sotava kece e vuqa na veivakararawataki kei na levu na dredre; ia, e duidui sara na ivakarau ni nodra dui raica. O Nifai e kaya, “A sa vakalougatataki keimami vakalevu na Turaga, keimami sa kana lewe ni manumanu droka vakalevu ena lekutu ka sa to vakalevu na medra sucu na neimami gone, era sa kaukauwa na neimami yalewa me vaka na tagane, era sa vosota ka sega ni vosakudrukudru ena nodra lako tiko.”⁴

O Leimani kei Lemueli, ena yasana kadua, erau vosa kudrukudru sara vakaca. “Erau sa vosakurukudrutaki tamadrau vakaoqo koi rau na qase, ko Leimani kei Lemueli. Erau sa vosakudrukudru ni rau sa sega ni kila na loma ni Kalou o koya sa buli rau.”⁵ Ni sega ni kilai se sega ni kauwaitaki na “loma ni Kalou” sai koya e dua na sala ena yali kina na rai tawamudu, na vosakudrukudru e dua na kena ivakatakilakila. E dina ni rau a vakadinadinataka o Leimani kei Lemueli e vuqa na cakamana ni ratou tiko vata kei Nifai, erau kaila mai vakasauri, ka kaya: “Ka da sa mai tiko voli ena lekutu ka vuqa na yabaki; era cakacaka tikoga na noda yalewa ni ra sa bukete tu ka ra vakasucu ena lekutu, era sota kaya na ka rarawa kecega, sa vo ga na mate; ia e vinaka cake me ra a mate ga mai Jerusalemi me ra kakua kina ni mai rarawa tu vakaoqo.”⁶

Oqori e rua na ivakarau ni vakasama duidui sara, e dina ni viavia tautauvata na dredre kei na veivakararawataki eratou sotava. E laurai, ni duidui na ivakarau ni rai.

A vola o Peresitedi Spencer W. Kimball na veika oqo: “Kevaka eda raica na bula oqo ni sai koya sara ga na ka taucoko, ena yaco na mosi, yaluma, druka, kei na lekaleka ni bula me dua na leqa levu. Ia kevaka eda raica na bula me dua na ka tawamudu ka lesu sara vakayawa ki na veigauna sa sivi ni bula taumada qai dodo yani ki na veisiga ni mataka ni oti na mate, sa na qai laurai na veika kece ena kedra irairai dodonu.”⁷

A talanoataka o Elder David B. Haight e dua na italanoa me baleta na dausivisivi o Michelangelo me vakaraitaka na kena bibi me da raica na veika kece ena kena rai dodonu: “Ni sivia tiko o dausivisivi e dua na tiki ni mapolo, dau lako mai e veisiga e dua na gonetagane ka mai sarasara galugalu toka. Ni sa basika mai na vatu oya na ivakatakarakara kei Tevita, sa vakarau tu me qoroya o vuravura taucoko, qai tarogi Michelangelo na cauravou, ‘O kila vakacava ni tiko i loma ya o koya?’”⁸

Na ivakarau ni rai e raica kina na dausivisivi na tiki ni mapolo oya e duatani mai na nona na gonetagane a sarava tiko na nona cakacaka. Nona raivotu na daucakacakaniliga ena veika e rawa ka muloni koto ena vatu a rawa kina me bulia e dua na cakacaka ni liga.

E kila na Turaga na veika e vinakata me rawata mai vei keda yadua. E kila o Koya na mataqali veisau e vinakata me rawata ena noda bula, ka sega ni tu vei keda na dodonu me da tarogi Koya. Ni sa duatani na Nona vakanananu ka duatani na noda vakanananu.⁹

Au vakadinadinataka ni tiko e dua na Tamada Vakalomalagi dauloloma, lewa dodonu, ka loloma cecere sa vakarautaka tu e dua na ituvatuva me baleta na noda marau tawamudu. Au vakadinadinataka ni o Jisu Karisito na Luvena ka iVakabula ni vuravura. Au kila ni o Peresitedi Thomas S. Monson e dua na parofita ni Kalou. Au tukuna na veika oqo ena yaca i Jisu Karisito, emeni.