Mary R. Durham

Karua ni Daunivakasala ena Mataveiliutaki Raraba ni Lalai

Ni tovolea me qarava vakatautauvata tiko na ogaoga ni bula vakavuvale, veikacivi ni Lotu, cakacaka, kei na itavi tale eso ena nona gauna taucoko ni bula vakawati, sa raica rawa o Mary Richards Durham ni gauna erau vakaliuca kina kei na watina na Turaga, ena donu ga mai na veika kece tale. “E sa dua na ka kamikamica. Kevaka o vakabauta, na Turaga ena vakalougatataki iko,” e kaya o koya.

E dua na ulutaga sa raica o koya na kena talevi voli vakavuqa. A kacivi o koya me peresitedi ni Goneyalewa ena tabanalevu ni veiqaravi tiko ena mataveiliutaki ni iteki na watina. E muri rau qai veiqaravi vata ni laki vakatulewataka na watina na Tabana ni Kaulotu na Japan Tokyo mai na 2000 ki na 2003. Ena gauna oqo sa na veiqaravi o koya vakaikarua ni daunivakasala ena mataveiliutaki raraba ni Lalai ka tekivuna na watina na veiqaravi vaka Vitusagavulu ni iWasewase.

“Ni keirau vakaivuataki vata vakakina vata kei na Turaga, sa rawarawa na veika kece,” e kaya o koya.

A sucu o Mary Lucille Richards ena ika 15 ni Maji, 1954, mai Portsmouth, Virginia, vei rau o L. Stephen Richards Jr. kei Annette Richards. Ni saga tiko o tamana na nona diqiri ni vuniwai, eratou a toki na matavuvale ki Minneapolis, Minnesota, ni bera ni ratou qai laki vakaitikotiko e Salt Lake City, Utah.

Ni susugi cake ena nodrau vakabauta kei na loloma na nona tubutubu kei na matavuvale levu, sa yaco me kila ni dina na kosipeli. “Sa dua na gauna marautaki na kena bulataki na kosipeli. E sega ni dredre. E lasa,” e kaya o Sisita Durham.

Ni goneyalewa voli, a vakauqeti na yalona ena bibi ni kena vaqarai e dua na cauravou bula kilikili me vakawatitaka ka sasagataka tiko ena masumasu e veisiga kei na lolo e veimacawa. Ni oti na vulitorocake a lako ki na Brigham Young University ena dua na sikolasivi ni danisi ka sota kina kei Mark Durham, ka a vuli tiko ena University of Utah. “Sega ni bera na noqu raica ka vakila na nona vinaka,” e kaya o koya.

Erau a vakamau na veiwatini ena June 1974 ena Valetabu e Salt Lake. E vitu na luvedrau.

Sa veiqaravi oti o Sisita Durham vakaperesitedi ni iSoqosoqo ni Veivukei, daunivakasala ena mataveiliutaki ni iSoqosoqo ni Veivukei ni tabanalevu, dauveivakavulici ena iVunau ni Kosikpeli, peresitedi ni Goneyalewa ena tabanalevu, ena dua na gauna walega oqo, vaka lewe ni matabose raraba ni Lalai.