Elder Hugo Montoya

Matai ni Kuoramu ni Vitusagavulu

A vakadrukai o Elder Hugo Montoya ena nona kacivi ki na Matai ni Kuoramu ni Vitusagavulu. A kune vakacegu o koya ena veimalanivosa malumu nei Peresitedi Thomas S. Monson ena dua na gauna ni vuli veituberi vei ira na Vakaitutu Raraba vovou: “O ni tiko eke baleta ni ko ni lomana na iVakabula.” A vakila o Elder Montoya na nona laveti cake, ni kila ni sa biuti koya na nona veikacivi vou ena veitalai ni Turaga.

“Au lomana na iVakabula, kau na lako ena vanua cava ga e vinakata meu lako kina,” e kaya o koya. “Au na cakava na ka kecega e kerei meu cakava. Au na tukuna na ka kecega e kerei meu tukuna.” A tokoni o Elder Montoya ena soqoni ena yakavi ni Vakarauwai ni ika 185 ni Koniferedi Raraba Vakayabaki ni Lotu.

E kunea talega o Elder Montoya na igu mai na iyau ni vakabauta ni nona matavuvale. Na tukana vakarua o Rafael Monroy sa dua na turaga kilai ena itukutuku makawa ni Lotu e Mexico. Ena 1915 erau a vesu kina o Baraca Monroy kei na dua tale na lewenilotu, o Vicente Morales, mai na dua na ilawalawa dauveisaqa ena gauna ni Veisaqasaqa e Mexico. A tukuni vei rau ruarua ni rau na sereki kevaka, ena loma ni veika tale eso, me rau cakitaka na nodrau lotu.

Erau bese ka rau qai lauvana mate mai na dua na ilala tauridakai.

E kaya o Elder Montoya na nona ivakaraitaki na tukana vakarua sa veivakayarayarataki sara vakalevu ena nona bula. “Au sa vulica ni rawa ni vakamalumalumutaki na yalorere ena yalo ni vakabauta kei na ivakadinadina ni o kila o sa cakava tiko na ka dodonu.”

A sucu o Elder Montoya ena 2 ni Epereli, 1960, mai Fresno, California, vei rau o Abel Montoya kei Maclovia Monroy. E levu ga na gauna ena nona bula a vakaitikotiko kina mai Mexico.

A vakamautaki Maria del Carmen Balvastro mai Hermosillo; erau a vauci ena Valetabu na Mesa Arizona ena 6 ni Epereli, 1983. E lima na luvedrau.

Ni oti nona veiqaravi vakadaukaulotu tudei ena Tabana ni Kaulotu na Mexico City North mai na 1979 ki na 1981, a veiqaravi vakaperesitedi ni Cauravou ena tabanalevu, lewe ni matabose e cake, bisopi, peresitedi ni iteki, daudikevifika ni iwasewase, ka Vitusagavulu ni iWasewase.

A taurivola mai na Sonora State University ena 1986 ena dua na diqiri ni idinia ni tabana ni teitei ka cakacaka ena vicavata na itutu vakamanidia ena Xerox ka vakakina vaka qasenivuli ni Inisitute ni Lotu.