Digitaka mo Vakadinata

Mai vei Elder L. Whitney Clayton

Ena Mataveiliutaki ni Vitusagavulu

Sa vakarautaka na iVakabula na Nona kosipeli me rarama ni veidusimaki vei ira sa digitaka mera vakadinata ka muri Koya.

Ena Janueri sa oti, a vuka tiko o Sailor Gutzler yabaki vitu kei na nona matavuvale mai Florida ki Illinois ena dua na waqavuka vakaitaukei. A pailate tiko o tamai Sailor. Ni sa buto na vanua, a yaco e dua na leqa vakamisini ena waqavuka ka voca yani ena veidelana buto loa mai Kentucky, ka laki vakatobuicu ena veivanua voravora. Era a mate kece ena vakacala-ka oqo vakavo ga o Sailor. A ramusu na ligana ena vakacala-ka oqo. A mamavoavoa ka drakusi na yagona ka yali na nona ivava. E a 38 na diqiri Faraneiti na ivakarau ni batabata (se 3 na diqiri Celsius)—oqo e dua na bogi batabata, tautau na uca, ena bogi batabata oqo e Kentucky—ka dara tu ga o Sailor e dua na tarausese lekaleka, siqeleti, kei na dua na sitokini.

A tagici tinana kei tamana, ia a sega ni dua me vosa mai. A mani vakayaloqaqataki koya, ka taubale yani sega na ivava me takosova na vanua lala me vakasaqara veivuke, vuto takosova na wai, takosova na qara, ka bolea curuma yani na vuniberi loa vakavotona. Mai na dua na delana lailai, a raica rawa sara o Sailor e dua na rarama vakayawa, volekata ni dua na maile. A qai sagai koya mai ena buto kei na veikau me gole ki na rarama o ya, a mani yacova rawa na vale oqo ni dua na turaga yalovinaka a se bera mada vakadua ni sotava ka totolo na nona vukei koya. Sa bula o Sailor. Sa totolo sara na nona kau yani ki valenibula me vukei me na bula yani.¹

A vakabulai o Sailor baleta ni a raica e dua na rarama vakayawa ka lakova qaqa yani—ni o ya e vanua lala rerevaki, na titobu ni ka vakadomobula a sotava, kei na mavoa sa tu vua. E dredre me vakasamataki rawa na nona cakava rawa o Sailor na veika a cakava ena bogi o ya. Ia na ka ga eda kila ni sa raica rawa ena rarama ni vale vakayawa o ya na madigi me vakabulai kina. O ya na inuinui. A yaloqaqa ni sa kila se cava sara na veika ca sa yaco, ena vakabulai o koya ena rarama o ya.

E vica vei keda ena sotava beka na ka vakadomobula vakataki Sailor. Ia oi keda kece, ena dua na gauna, eda na sagai keda yani vakaukauwa vakayalo ka valuta yani na noda ilakolako rarawa. Ena veigauna oqori, se cava sara na kena buto loa se sa sega na inuinui, kevaka meda na vakasaqara, ena dau tikoga e dua na rarama vakayalo e kacivi keda tiko, ka solia tiko mai na inuinui ni da na vakabulai ka vakacegui. Na rarama oqori sa mai vua na iVakabula ni kawatamata kecega, ni sai Koya na Rarama kei Vuravura.

Na raici ni rarama vakayalo e duidui mai na kena raici e dua na cina vakayago. Na noda kila na rarama vakayalo ni iVakabula e tekivu ena noda gadreva meda vakadinata. Sa vinakata tiko na Kalou meda gadreva taumada meda vakadinata. “Dou yadra mada ka vakasama … ka vakabauta e vica na tikina” e vakavulica vaqo o parofita Alama, “ia, kevaka dou sa sega ni rawa ni vakabauta, dou rogoca mada ga ka vakasamataka, de mani rawa mo dou vakabauta e vica na tikina [mai vua na iVakabula].”²

Na veikacivi nei Alama meda gadreva ka vakadinata ka “vagalalataka” na yaloda ena vuku ni vosa ni iVakabula e vakavotuya na noda vakadinata ka vakabauta e gadrevi kina na noda digidigi yadua kei na cakacaka. Sa dodonu meda “yadra mai ka vakasamataki [keda].” Eda na kerea ni bera ni soli mai; eda na vakasaqara ni bera ni kunei; eda na tukituki ni bera ni dola mai vei keda. Sa qai soli mai kina na iyalayala oqo: “Ni sa rawata yadua ko koya sa kerekere; ka sa kunea ko koya sa vakasaqara; ka na dolavi vua sa tukituki.”³

E sega tale ni dua na vakamamasu yalololoma vei keda meda vakadinata me vakataka mai vua na iVakabula Vakai Koya, ena Nona gauna veivakalotutaki e vuravura, ena Nona a kerei ira na tawa-vakabauta era a vakarorogo:

“Kevaka kau sa sega ni kitaka na cakacaka i Tamaqu, kakua ni vakabauti au.

“Ia kevaka kau sa kitaka, dou vakadinata na cakacaka, kevaka dou sa sega ni vakabauti au, mo dou kila kina ka vakadinata, ni sa tiko vei au ko Tamaqu, kau sa tiko vei koya koi au.”⁴

Ena veisiga eda na sotava yadua na veivakatovolei. Sa veivakatovolei ni noda bula oqo: eda na digitaka beka meda vakadinati Koya ka vakatara na rarama ni Nona kosipeli me tubu e lomada, se eda na sega ni vakadinata ka saga ga meda lako duadua ena butobuto? Sa vakarautaka na iVakabula na Nona kosipeli me rarama ni veidusimaki vei ira sa digitaka mera vakadinata ka muri Koya.

Ni oti na voca o ya, sa tu na digidigi nei Sailor. Sa rawa vua me toka duadua ga ena waqavuka ena butobuto, kei na rere. Ia se balavu sara na bogi, ka sa tekivu me batabata sara. A qai digitaka e dua tale na sala. A cabeta o Sailor e dua na delana, ka raica kina e dua na rarama ena iyala ni vanua.

Vakamalua, ni sa sagai koya tiko yani ena bogi ki na rarama o ya, sa ramase cake sara mai. Io, e rairai tiko na gauna a sega ni raica kina. E rairai sega ni laurai mai ena gauna e curuma yani na qakilo se daku ni veivunikau se veikau, ia a gu ga ki liu. Ena gauna ga e raica kina na rarama, sa vakadinadinataka o Sailor ni sa tiko ena sala dodonu. E se bera mada ni kila na mataqali rarama cava o ya, ia sa lako tikoga kina vakadodonu ena vuku ni veika sa kila tiko, vakabauta ka nuitaka tiko ni na raica tale ke gole tikoga ena kena sala dodonu. Ni cakava tiko oqo, ena rawa mena vakabulai koya.

Sa rawa ni vakaoqo na noda bula. Eso beka na gauna eda a vakararawataki, ni da sa oca, ni sa vaka me butobuto ka batabata mai na noda bula. Ena so beka na gauna eda na sega ni raica rawa e dua na rarama ena iyala ni vanua, ka da sa vinakata meda sa soro. Kevaka sa lomada meda vakadinata, kevaka eda sa gadreva meda vakadinata, kevaka eda sa digitaka meda vakadinata, sa qai vakaraitaki vei keda mai na ivakavuvuli kei na ivakaraitaki ni iVakabula na sala ki liu.

Digitaka mo Vakadinata

Me vakataki Sailor ena nona vakadinata ni na taqomaki ena rarama vakayawa o ya, sa vakakina oi keda meda digitaka meda dolava na yaloda ni sa dina vakalou na iVakabula—ki na Nona rarama tawamudu kei na Nona loloma veivueti ni veivakabulai. Era sa vakayaloqaqataki keda na parofita ni veitabayabaki ka vakamasuti keda talega meda vakadinata na Karisito. Na nodra vakatakekere e vakayavutaki ena dua na dina bibi: E sega ni vakasaurarataki keda na Kalou meda vakadinata. Ia e sureti keda o Koya meda vakadinata ena nona talai ira na parofita kei na iapositolo bula mera vakavulici keda, vakarautaka na ivolanikalou, ka kacivi keda tiko ena Nona Yalotabu. Sai keda sara ga meda na digidigi meda ciqoma na veisureti vakayalo oqori, ka digitaka meda raica vakayalo na rarama vakayalo sa kacivi keda tiko kina o Koya. Na vakatulewa meda vakadinata sa digidigi bibi duadua eda na cakava. Ena vakayaco-ka ki na noda vakatulewa taucoko.

E sega ni vakaroti keda na Kalou meda vakadinata vakalevu cake mai na Nona vakaroti keda meda muria e dua na vunau, se cava sara na uasivi ni Nona gadreva me vakalougatataki keda. Ia na Nona kacivi keda meda vakadinati Koya—meda cakava na tiki ni vakabauta o ya ka vagalalataki keda ki na Nona vosa—sa yaco dina tiko nikua. Me vaka e kaya na iVakabula, “Raica au sa tukuna vei kemudou, sa vakarota ko Tamaqu vei ira na tamata kecega me ra veivutuni ka vakabauti au.”⁵

Na vakadinata kei na ivakadinadina kei na vakabauta era sega ni ivakavuvuli veitakavi. Era sega ni tu ga sa yaco vei keda. Na vakadinata e dua na ka eda digitaka—eda vakanuinuitaka, eda cakacakataka, ka solibula kina. Ena sega ni vakacala-ka na noda vakadinata na iVakabula kei na Nona kosipeli ni sega ni vakakina talega ena noda masu kei na saumi ikatini. Eda digitaka vakaidina meda vakadinata, me vaka ga noda muria na ivakaro tale eso.

Mo Cakacakataka na ka o Vakadinata

A sega ni rawa me kila taumada o Sailor kevaka me na yaco na veika e cakava tiko ni sa sagai koya tiko yani ena veiveikau. Sa lakosese ka sa mavoa; ka sa butobuto ka batabata. Ia a biuta na voca ni waqavuka ka vaqaqara yani ena vakanuinui ni na vakabulai, ka qasi ka biliraki koya yani ki liu me yacova ni sa raica e dua na rarama mai liu. Ni sa raica, sa cakava na nona vinaka duadua me goleva yani, ka nanuma tiko na ka sa raica.

Sa vakakina meda sa soli keda ki na inuinui meda raica na rarama vakayalo ena noda vakadinata ka sega ni digitaka meda vakatitiqa. Na noda ivalavala sa ivakadinadina ni noda sa vakadinata ka yaco me sa ka bula ni noda vakabauta. Eda sa digitaka tiko meda vakadinata ni da masu kei na gauna meda wilika kina na ivolanikalou. Eda sa digitaka meda vakadinata ni da lolo, ni da vakatabuya na Siga ni Vakacecegu, ni da sokalou e valetabu. Eda sa digitaka tiko meda vakadinata ni da papitaiso ka kania na sakaramede. Eda sa digitaka meda vakadinata ni da sa veivutuni ka vakasaqara na veivosoti kei na loloma veivakabulai vakalou.

Kakua ni Soro

Eso na gauna na torocake ni veika vakayalo ena rairai toso vakamalua se vagauna. Eso na gauna eda dau vakila ni da sa butusevata, ka da sa caka cala, se sa sega ni gugumatua na noda sasaga vinaka duadua meda kunea kina na iVakabula. Ke o vakasama tiko vaqo, yalovinaka kua ni soro—kua vakadua. Mo vakadinati Koya tikoga kei na Nona kosipeli kei na Nona Lotu. Vakadodonutaka nomu ivalavala ki na veika o sa vakadinata o ya. Ena veigauna vakaoqori ni sa kataremoremo mai na rarama ni nomu vakabauta, vakayacora na nomu nuitaka tiko na loloma kei na loloma soliwale ni iVakabula, e tiko ena Nona kosipeli kei na Nona Lotu, me valuta mate na nomu vakatitiqa. Au sa yalataka ni sa tu vakarau o Koya me ciqomi iko. Ni toso na gauna ko na qai raica o sa cakava na digidigi uasivi o se bau cakava vakadua. Na nomu vakatulewa qaqa mo vakadinati Koya ena vakalougatataki iko vakalevu sara ka tawamudu.

Na Veivakalougatataki ni ko Vakadinata

Au sa vakila na loloma veivueti ni iVakabula ki na noqu bula. Au sa vakasaqarai Koya ena noqu gauna butobuto, ka sa dodoka mai vei au o Koya na Nona rarama veivakabulai. E dua vei ira na gauna rekitaki cecere ena noqu bula o ya meu dau gole vata tu kei watiqu, o Kathy, ka sotavi ira na lewe ni Lotu ena veitiki vuravura e vuqa. Era sa vakavulica vei au na veisotari totoka oqo baleta na loloma ni Kalou kivei ira na Luvena. Era sa vakaraitaka vei au na veigauna tawacava ni bula marau sa yaco me veivakalougatataki vei ira era sa digitaka mera muria na ivakavuvuli ni Turaga o Jisu Karisito. Au sa vulica ni noda vakadinati Koya kei na Nona kaukauwa veivueti sai koya na salatu dina meda “kune vakacegu ena bula oqo, ka rawata na bula tawamudu ena bula sa bera mai.”⁶

Au vakadinadinataka ni sai Jisu Karisito na ivurevure ni rarama kei na inuinui kivei keda taucoko. Sa noqu masu ni da na digitaka taucoko meda vakadinati Koya. Ena yaca i Jisu Karisito, emeni.